Suma na Yesus Krestes trutru?
„Now, di a go na ini Yerusalem, wan heri dyugudyugu kon na ini a foto, èn den sma taki: ’Suma na a sma disi?’ Den sma ben tan taki: ’Disi na a profeiti Yesus fu Nasaret na Galilea!’”—MATEYUS 21:10, 11.
FU SAN EDE wan heri dyugudyugu ben de di Yesus Krestes * kon na ini Yerusalem na a dei dati na ini a yari 33? Furu sma na ini a foto ben yere fu Yesus èn fu den bigi wondru di a ben du. Den ben tan fruteri trawan fu en (Yohanes 12:17-19). Ma den ipi-ipi sma no ben sabi taki a man di ben de na den mindri ben o abi krakti tapu sma na heri grontapu, na ini den hondrohondro yari baka dati, teleki now.
Luku wan tu eksempre di e sori o furu krakti Yesus ben abi tapu libisma.
A kalender di sma e gebroiki na ini furu kondre bigin nanga a yari di sma denki taki Yesus gebore.
Sowan tu milyard sma, disi na wan di fu dri pisi fu a nomru fu sma na grontapu, e kari densrefi Kresten.
Na Islam bribi di abi moro leki wán milyard memre na heri grontapu, e leri taki Yesus na „wan profeiti di bigi moro Abraham, Noa, nanga Moses”.
Na difrenti fasi sma e gebroiki den koni wortu di Yesus ben taki, na ini na aladei libi. Wan tu fu den na:
’Te yu taki Iya, meki a de Iya.’—MATEYUS 5:37.
„No meki yu kruktu-anu sabi san yu reti-anu e du.”—MATEYUS 6:3.
„Nowan sma kan dini tu masra.”—MATEYUS 6:24.
’Yu e luku a splentri na ini trawan ai, ma yu no e si a postu na ini yu eigi ai.’—MATEYUS 7:3.
„Yu musu lobi tra sma leki fa yu lobi yusrefi.”—MATEYUS 22:39.
„Teri den kostu.”—LUKAS 14:28.
A no de fu taki dati Yesus abi krakti tapu libisma. Ma toku sma e denki èn bribi difrenti sani te a abi fu du nanga Yesus. Kande yu e aksi yusrefi: ’Suma na Yesus Krestes trutru?’ Bijbel wawan e taigi wi pe Yesus komoto, fa a ben libi, èn fu san ede a dede. Te yu sabi den tru tori dati di abi fu du nanga en, dan disi kan abi furu krakti tapu yu libi now èn na ini a ten di e kon.
^ paragraaf 3 „Yesus”, na a nen fu a profeiti disi fu Nasaret, èn a nen wani taki „Yehovah na Frulusu”. A wortu „Krestes” wani taki „Salfuwan”, èn disi e sori taki Yesus ben salfu, noso na Gado gi en wan spesrutu frantwortu.