Hin-o Gud ba hi Jesu-Kristo?
“Han pagsulod niya ha Jerusalem, an bug-os nga bungto naukay [nagkasaramok], nga nasiring: Hin-o ini? Ngan an kadam-an siniring: Ini amo hi Jesus, an manaragna nga Nasareton ha Galilea.”—MATEO 21:10, 11.
KAY ano nga nagkasaramok an mga tawo pag-abot ni Jesu-Kristo * ha Jerusalem han katsaringsing han 33 K.P.? Kay hinbaroan han damu hito nga syudad an mahitungod ha iya ngan an urusahon nga iya ginbuhat. Padayon hira nga nagpinanumat ha iba mahitungod ha iya. (Juan 12:17-19) Pero diri hira maaram nga hi Jesus, nga ira kaupod, makakaimpluwensya ha kalibotan tubtob yana!
Tagda an pipira han daku nga impluwensya ni Jesus ha kasaysayan han tawo.
An kalendaryo nga komon nga ginagamit ha daku nga bahin han kalibotan iginbasar ha tuig kon kakan-o gintotoohan nga natawo hi Jesus.
Mga duha ka bilyon, haros ikatulo ka bahin han populasyon han kalibotan, an nag-aangkon nga Kristiano.
Igintututdo han Islam, nga may sobra usa ka bilyon nga membro ha bug-os nga kalibotan, nga hi Jesus “mas bantogan nga propeta kanda Abraham, Noe, ngan Moises.”
Damu han mag-opay nga ginyakan ni Jesus an puplunganon na yana. Ini an pipira:
Kon tampaluhon ka ha imo too nga nawong, ihatag an kaluyo.—MATEO 5:39.
‘Mas maopay an paghatag kay ha pagkarawat.’—BUHAT 20:35.
“Waray makakagserbi ha duha nga agaron.”—MATEO 6:24, NW.
“Ayaw ilabog an mga perlas ha mga baboy.”—MATEO 7:6, NW.
‘An ngatanan nga buot niyo buhaton han mga tawo ha iyo, buhata man niyo ha ira.’—MATEO 7:12.
‘Ihapa an magagasto.’—LUKAS 14:28.
Nakaimpluwensya gud hi Jesus ha katawohan. Kondi, iba-iba an ira opinyon ngan gintotoohan mahitungod ha iya. Salit bangin ka magpakiana, ‘Hin-o gud ba hi Jesu-Kristo?’ An Biblia la an nagsusumat kon diin hiya tikang, kon paonan-o hiya nagkinabuhi, ngan kon kay ano nga hiya namatay. An paghibaro hito mahimo magkaada daku nga epekto ha imo kinabuhi—yana ngan ha tidaraon.
^ par. 3 An “Jesus,” nga amo an personal nga ngaran hini nga propeta tikang ha Nasaret, nangangahulogan hin “hi Jehova an Kaluwasan.” An pulong nga “Kristo” usa nga titulo nga nangangahulogan hin “Dinihogan nga Usa,” nagpapasabot nga hi Jesus gindihogan, o ginpili han Dios para ha espesyal nga posisyon.
