Ri Mini’ Jesus Kristus?
Ri Mini’ Jesus Kristus?
“Faani yan Jesus nga lan yu Jerusalem ma ga’ngin yang u lan fare binaw ni yibe tolul riy. Me fith e girdi’ ni be lungurad, ‘I mini’ e cha’nem?’ Me fulweg fapi girdi’ ni pire’ ni pire’ ni be lungurad, ‘Ereray fare profet i Jesus ni yib u Nazareth nib binaw ni bay u lan yu Galile.’”—MATTHEW 21:10, 11.
MANG fan ni yoor lungun e girdi’ u nap’an ni yan Jesus Kristus a nga Jerusalem ko duw ni 33? Boor e girdi’ u lan e re mach nem ni kar rung’aged murung’agen nge pi n’en ni ke rin’ nib pag feni fel’. Ma aram mu u rogned murung’agen ngak yugu boch e girdi’. (John 12:17-19) Machane, pi girdi’ nem e dar nanged ni ke yib be’ nga fithik’rad nra thilyeg rarogon e fayleng nge taw ko ngiyal’ ney ni gad bay riy!
Am lemnag boch e kanawo’ ni ke thilyeg Jesus rogon e par ko girdi’ riy.
▪ Calendar nib ga’ ni yima fanay u boor e nam u fayleng e ba puluw ko rofen ni yima lemnag ni kan gargeleg Jesus riy.
▪ Sogonap’an l’agruw e bilyon e girdi’ u fayleng e yad ma yog ni yad e Kristiano.
▪ Teliw ni Islam e boor ko reb e bilyon e girdi’ u fayleng ni yad ma un ngay, ma yad ma machibnag ni Jesus e ir “reb e profet ni kab ga’ ngak Abraham, nge Noah, nge Moses.”
▪ Boor ko pi thin rok Jesus e ba ga’ ni ma yog e girdi’ u gubin e rran. Ma boch riy e baaray:
‘Mu pag ngki batnag e ba’ ni gilay’ i linglingim.’—MATTHEW 5:39.
‘Mu fek u reb e mayel.’—MATTHEW 5:41.
‘Dariy be’ nrayog ni nge mang sib rok l’agruw i masta.’—MATTHEW 6:24.
‘Dab mpied ban’en nib thothup ngak e babiy.’—MATTHEW 7:6.
‘Mu rin’ed ngak e girdi’ e tin ni gimed ba adag ni ngar rin’ed ngomed.’—MATTHEW 7:12.
‘Mu guy ko ba gaman e salpiy rom fa danga’.’—LUKE 14:28.
Dariy e maruwar riy ni ke thilyeg Jesus e par ko girdi’. Yugu aram rogon, ma ba thilthil e pi n’en ni ma lemnag e girdi’ u murung’agen Jesus. Ere sana aram fan ni ga ra lemnag ko, ‘Ri mini’ Jesus Kristus?’ Kemus ni goo Bible e be yog e gin ni yib Jesus riy, nge rogon e par rok, nge fan ni yim’. Ga ra nang e pi n’ey u murung’agen Jesus ma rayog ni nge thilyeg e par rom e chiney i yan ngaram.
[Footnote]
a “Jesus,” ni fithingan e re profet nu Nazareth ney e be yip’ fan ni “Jehovah e Ra Pi’ e Yafas.” Fare bugithin ni Kristus e ba liw ni be yip’ fan e “En ni Kan Dugliy,” ma be dag ni ke dugliy Got Jesus nga reb e liw nib ga’ fan.