Yecu Ka ma En Oa ki Iye

“[Pilato] odok i Praitorion, openyo Yecu ni, ‘In ia ki kwene?’ Ento Yecu pe ogamo doge.”​—JON 19:9.

GABUNA me Roma Pontio Pilato omiyo lapeny meno i kare me pido i kom Yecu. Pilato onongo ngeyo but lobo me Icrael ma Yecu a ki iye. (Luka 23:6, 7) En ongeyo bene ni Yecu pe obedo calo dano ata-ni. Tika Pilato obedo ka penye kekene ka ce Yecu onongo kong okwo con? Mono laloc man ma lakamfiri-ni biye dok bitic ki lok ada? Kadi kumeno nyo pe, Yecu pe ogamo doge dok i nge cawa manok keken onen ka maleng ni Pilato onongo tye ki miti matek pi dog ticce makato lok ada ki ngolo kop atir.​—Matayo 27:11-26.

Tye me yomcwiny ni jo ma gimito ki cwinygi ducu me ngeyo ka ma Yecu oa ki iye gitwero nongone. Baibul nyutu ka maleng ka ma Yecu Kricito oa ki iye. Nen kong wi lok magi.

▪ Ka ma kinywale iye Cura ma kitimo i kareni nyutu ni meno obedo i acakki me mwaka 2 K.M.P., kinywalo Yecu i paco mo me Juda ma kilwongo ni Beterekem. Cik ma Cecar Augucito omiyo oweko Maliam min Yecu, ma onongo “oyac,” kacel ki cware Yucepu gucito i Beterekem gang pa kwaro pa Yucepu ka cone. Pien onongo ot opong woko pigi i ot welo i gang meno, luot man gubedo i ot ma kigwoko iye lee ka ma kinywalo iye Yecu ci kipyelo i weer pa dyang.​—Luka 2:1-7.

Cencwari mapol angec lok pa lanebi me Baibul otito ka ma kibinywalo iye Yecu: “Ento in, Beterekem Eprata, in itidi pe iporre me bedo i kin kaka me Juda, dano ma bibedo laloc i Icrael bibino pi an kun a ki i in.” * (Mika 5:2) Beterekem onongo tidi tutwal ma pe giromo kwanone i kin paci me Juda. Ento, paco man matidi-ni onongo bibedo ki deyo madok pat. Meciya ma kiciko pire-ni nyo Kricito kibinywalo i Beterekem.​—Matayo 2:3-6; Jon 7:40-42.

▪ Ka ma en odongo iye Inge bedo i lobo Ejipt pi kare manok, Yecu kacel ki lunyodone gucito i Najaret, ma tye i Galilaya dok nonge mairo ma romo 60 tung kumalo me Jerucalem. I kare meno Yecu onongo pud mwakane pe o adek. I kabedo man mamwonya ka ma lupwur, lukwat ki lumak rec gibedo ka tic iye kare ki kare-ni, Yecu odongo i ot ma dano pol iye ma bene onongo pe gulony tutwal.​—Matayo 13:55, 56.

Cencwari mapol angec, Baibul onongo dong otito ni Meciya kibilwongone ni “Lanajaret.”  Matayo ma ocoyo jiri owaci, Yecu kacel ki lunyodone gucito ka bedo i “Najaret, wek gin ma yam lunebi guloko ocobbe kakare ni: ‘Gibilwonge ni Lanajaret.’” (Matayo 2:19-23) Nying man ni Lanajaret-ti nen calo kubbe ki nyig lok me leb Ibru ma cung pi “jange.” Ngene kene ni Matayo onongo tye ka tic ki lok pa lanebi Icaya ma olwongo Meciya ni “jange” pa Yece, ma te lokke ni Meciya myero obed lakwaro pa Yece, won Kabaka Daudi. (Icaya 11:1) Ki lok ada, Yecu obedo lakwaro pa Yece kun wok ki i Daudi.​—Matayo 1:6, 16; Luka 3:23, 31, 32.

▪ Ka ma en oa iye kikome Baibul pwonyo ni Yecu ocako kwo wacon ma peya kinywale i ot gwoko lee i Beterekem. Lok pa lanebi Mika ma kinyutu malo ni, medde ki wacci “acakki me binone obedo con, ma i kare macon mada.” (Mika 5:2) Macalo Latin kayo pa Lubanga, Yecu obedo cwec me cwiny i polo ma peya kinywale calo dano i lobo. Yecu kikome owaco ni: “alor piny ki i polo.” (Jon 6:38; 8:23) Man onongo twere nining?

Lubanga Jehovah otimo tango kun tiyo ki cwiny maleng me nako kwo pa Wode me polo ci oketo i latin anyaka mo ma Lajudaya ma nyinge Maliam ma pud pe ongeyo laco wek kinywale calo dano ma pe ki roc. * Tango ma kit meno timone yot bot Lubanga Won Twer Ducu. Kit ma lamalaika otito kwede bot Maliam-mi, “pe tye gin mo ma loyo Lubanga.”​—Luka 1: 30-35, 37.

Baibul wacciwa lok mapol ento pe ka ma Yecu oa ki iye keken. Co angwen ma gucoyo jiri​—Matayo, Marako, Luka, ki Jon​—giwacciwa lok mapol madok i kom kit ma en okwo kwede.

[Lok ma tye piny]