Jisas—?Hem i Kamaot Long Weples?

“[Paelat] i go insaed long haos ya bakegen, i askem long Jisas se, ‘?Yu yu blong wea?’ Be Jisas i no ansa long hem.”—JON 19:9.

HED GAVMAN blong Rom, Ponjes Paelat, i askem kwestin ya taem hem i stap jajem Jisas se bambae hem i laef no bambae hem i ded. Paelat i save finis weples long Isrel Jisas i kamaot long hem. (Luk 23:6, 7) Hem i save tu se Jisas i no sem mak olsem ol narafala man. ?Olsem wanem? ?Paelat i wantem save sipos Jisas i bin laef samples bifo finis? ?Hiten rula ya i wantem save trutok mo i wantem folem? Nating se i olsem wanem, Jisas i no givim wan ansa long hem. Ol samting we oli hapen biaen, oli soemaot klia se Paelat i askem kwestin olsem from we hem i wari long posisen blong hem, be i no from we hem i wantem save trutok mo stret fasin.—Matiu 27:11-26.

Yumi glad tumas se olgeta we oli wantem tumas blong save se Jisas i kamaot long weples, oli save faenemaot. Baebol i talemaot klia se Jisas Kraes i blong wea stret. Yu traem tingbaot ol kwestin mo ansa we oli kam biaen.

▪ ?Hem i bon wea? Jisas i bon long wan ples we i no flas nating, long wan vilej blong Juda we oli kolem Betlehem. Taem Meri i “gat bel we klosap i bonem” Jisas, Sisa Ogastas i mekem wan sensas blong kaontem ol man. From samting ya, Meri wetem man blong hem Josef, tufala i mas wokbaot i go long ples blong Josef, hemia Betlehem. Be, from we i gat fulap man, mo tufala i no save faenem wan rum blong stap long hem, tufala i go stap long haos blong ol anamol. Hemia nao ples we Jisas i bon long hem. Taem Jisas i bon, tufala i putum hem i slip long wan bokis we oli stap putum gras long hem blong fidim ol anamol.—Luk 2:1-7.

Plante handred yia bifo, wan profet tok blong Baebol i talemaot ples we Jisas bambae i bon long hem, i se: “Yufala long vilej ya Betlehem, long distrik ya Efrata long Juda, vilej ya blong yufala i wan smol vilej long ol narafala vilej we oli stap raonabaot long yufala, be mi bambae mi mekem we wan pikinini bambae i kamaot long yufala, we hem bambae i rul long ol laen blong Isrel.” * (Maeka 5:2) Betlehem i wan smol vilej we i no naf blong oli kaontem hem olsem wan taon blong Juda. Nating se i olsem, smol vilej ya i kasem wan bigfala blesing. Mesaea no Kraes we ol profet oli tokbaot hem longtaem finis, i kamaot long Betlehem.—Matiu 2:3-6; Jon 7:40-42.

▪ ?Hem i gruap wea? Afta we Jisas mo famle blong hem oli stap smoltaem long Ijip, oli muv i go stap long Nasaret. Nasaret i wan taon long distrik blong Galili. Hem i olsem 96 kilometa long not blong Jerusalem. Long taem ya, Jisas i no gat tri yia blong hem yet. Long naesfala ples ya Nasaret, i gat ol man blong mekem garen, ol man blong lukaot long sipsip, mo ol man we wok blong olgeta i blong hukum fis. Jisas i gruap long wan famle we i gat plante pikinini long hem mo i no rij.—Matiu 13:55, 56.

 Plante handred yia bifo, Baebol i talemaot se Mesaea bambae i “wan man Nasaret.” Gospel blong Matiu i talem se Jisas mo famle blong hem oli kam “stap long wan taon, nem blong hem Nasaret. Samting ya i kamtru blong mekem tok ya i kamtru we ol profet oli bin talemaot bifo blong makem Mesaea se, ‘Bambae oli talem se hem i wan man Nasaret.’” (Matiu 2:19-23) I luk olsem se tok ya ‘man Nasaret’ i kamaot long wan Hibru tok we i blong talem “niufala gru.” I klia se Matiu i stap tokbaot profet tok blong Aesea, we i talem se Mesaea i olsem wan “niufala gru” we i kamaot long King Deved. (Aesea 11:1) Yes, Jisas i kamaot long laen blong Deved, pikinini blong Jese.—Matiu 1:6, 16; Luk 3:23, 31, 32.

▪ ?Hem i stap weples, bifo we hem i kam long wol? Baebol i tijim se Jisas i laef longlongtaem finis, bifo we hem i bon long haos ya blong ol anamol long Betlehem. Profet Maeka i talem se: “Stamba blong man ya, hem i stat longtaem bifo, bifo we bifo olgeta.” (Maeka 5:2, NW) Jisas i fasbon Pikinini blong God. Hem i wan spirit we i laef long heven, bifo we hem i bon olsem man long wol ya. Jisas i talem se: “Mi mi aot long ples ya antap, mi kamdaon.” (Jon 6:38; 8:23) ?Samting ya i save hapen olsem wanem?

Jehova God i yusum tabu spirit blong hem blong mekem wan merikel. * Merikel ya, hemia blong tekem laef blong pikinini blong hem long heven, mo putum i go long bel blong wan gel Jiu we i no slip wetem man yet, nem blong hem Meri. Taswe, pikinini ya i bon olsem wan man we i stret gud olgeta. Merikel ya i no wan samting we i had tumas long God ya we i gat Olgeta Paoa. Enjel blong God i soemaot samting ya, taem hem i talem long Meri se: “I no gat wan samting we i strong tumas, we God i no save mekem.”—Luk 1:30-35, 37.

Yes, Baebol i talemaot ples we Jisas i kamaot long hem. Be i no hemia nomo. Ol fo Gospel ya, Matiu, Mak, Luk, mo Jon, oli talem plante samting long saed blong laef blong Jisas.

[Ol futnot]