Jisu e Lako Mai Vei?

“E curu lesu [o Pailato] ina vale ni kovana qai kaya vei Jisu: “O iko mada mai vei?” E sega ni sauma o Jisu na nona taro.”​—JONI 19:9.

A TAROGA qori na Kovana ni Roma o Ponitio Pailato ena veilewai e vakatau kina nona bula se mate o Jisu. * E kila o Pailato na yasayasa e lako mai kina o Jisu. (Luke 23:​6, 7) E kila tale ga ni sega ni tamata wale. A lomatarotarotaka beka o Pailato se a bula tu e liu o Jisu se sega? E kauaitaka dina na iliuliu lotu butobuto qo na ka dina qai via cakava kina e dua na ka? Se mani cava e vakasamataka ena gauna oya, a sega ni via sauma na nona taro o Jisu. A qai kilai e muri ni a kauaitaka ga vakalevu o Pailato na nona cakacaka, sega ni ka dina se na lewadodonu.​—Maciu 27:​11-​26.

Eso era na via kila dina na vanua e cavutu mai kina o Jisu, e vinaka mada ga ni sega ni vakadredretaki qori vei ira. Na iVolatabu e vakamatatataka na vanua e lako mai kina o Jisu. Meda raica mada qo na ka e tukuna.

▪ Vanua e sucu kina Ni cakacakataki ena gauna qo, e laurai ni a sucu o Jisu volekata na itekitekivu ni gauna sa kilai nikua me 2 B.S.K. A susu ena dua na vuvale dravudravua ena koro o Peceliema e Jutia. A “bukete levu” tu o Meri na tinai Jisu ena gauna a lewa kina o Sisa Akusito mera volai na lewenivanua taucoko, erau mani gole o Meri kei Josefa i Peceliema ni cavutu mai kea o Josefa. Erau sega ni kunea rawa e dua na rumu ni vulagi ena koro osooso oya, erau mani gole ena dua na valenimanumanu. A sucu e keri o Jisu rau qai vakadavori koya ena ikanakana ni manumanu.​—Luke 2:​1-7.

Ena vica vata na senitiuri yani e liu, a parofisaitaka na iVolatabu na vanua ena sucu kina o Jisu: “Ko iko, Peci-leema Efiraca, ko sa lailai dina vei ira na lewe udolu e Juta, ia maivei iko ena lako mai vei au ko koya ena lewai ira na Isireli.” * (Maika 5:2) E kena irairai ni sega ni wili me siti ena vanua o Juta o Peceliema ni koro lailai ga. Ia e dua na ka vakasakiti ena yaco ena koro lailai qo. Ena lako mai kina na Mesaia yalataki se Karisito.​—Maciu 2:​3-6; Joni 7:​40-​42.

▪ Vanua e susu kina Eratou tiko ga vakalekaleka mai Ijipita na vuvale i Jisu, oti eratou toki i Nasareci e dua na siti ena yasayasa o Kalili e rauta ni 96 na kilomita ena noca kei Jerusalemi. A se bera ni yabaki tolu ena gauna qori o Jisu. Era tu ena vanua totoka qo na dauteitei, ira na ivakatawa ni sipi kei ira na dauqoli. A tubu cake o Jisu ena dua na vuvale levu, e rairai sega soti ni vutuniyau.​—Maciu 13:​55, 56.

A parofisaitaka na iVolatabu ena vica na  senitiuri e liu ni na vakatokai na Mesaia me “kai Nasareci.” E kaya na dauvola kosipeli o Maciu ni ratou mai tiko na vuvale i Jisu e “Nasareci. Qo e vakayacori kina na ka era tukuna na parofita: ‘Ena vakatokai me kai Nasareci.’” (Maciu 2:​19-​23) Na yaca kai Nasareci e rairai vosa veiwekani kei na “tabana” ena vosa vakaIperiu. A tukuna tiko o Maciu na parofisai i Aisea e vakatokai kina na Mesaia me “dua na tabana” ena dulumi i Jese, kena ibalebale na Mesaia ena basika mai na yatukawa i Jese na tamai Tui Tevita. (Aisea 11:1) Ena vuku i Tevita, e rawa ni tukuni kina ni kawa i Jese o Jisu.​—Maciu 1:​6, 16; Luke 3:​23, 31, 32.

▪ Bula tu mai lomalagi E vakavuvulitaka na iVolatabu ni a bula tu mai ena dua na gauna balavu sara o Jisu ni bera ni sucu ena valenimanumanu mai Peceliema. E tomana na parofisai i Maika sa cavuti oti ni “nona lako mai sa ka mailiu sara, mai na gauna makawa dina.” (Maika 5:2) Ni Luvena ulumatua na Kalou, a dua tu na ka bula vakayalo mai lomalagi o Jisu ni bera ni sucu vakatamata e vuravura. A tukuna sara ga o koya: “Au . . . lako sobu mai lomalagi.” (Joni 6:​38; 8:​23) E rawa vakacava oya?

E vakayagataka o Jiova na yalona tabu me tokia vakacakamana kina na bula i Luvena mai lomalagi ina katonigone i Meri na goneyalewa Jiu me sucu kina me tamata uasivi. * E sega ni dredre vua na Kalou Kaukaua duadua me cakava qori. Me vaka e vakamacalataka na agilosi vei Meri, “ni sega ni dredre vua na Kalou me vakayacora nona vosa.”​—Luke 1:​30-​35, 37.

E sega ni tukuna ga na iVolatabu na vanua e cavutu mai kina o Jisu. Ena kilai e levu tale na ka a cakava ena va na Kosipeli​—Maciu, Marika, Luke, kei na Joni.

[iVakamacala e ra]