ROMAMIUT naalagaatitaat Pontiusi-Pilatusi Jiisusip inuuin­nar­neranik toqutaaneranil­luun­niit kinguneqar­tus­samik kil­lisior­neqar­nerani taama aperivoq. * Pilatusip Jiisusi Israelip ilaanit sumin­ngaan­neer­nersoq nalun­ngilaa. (Lukasi 23:6, 7) Aam­ma nalun­ngilaa Jiisusi nalingin­naan­ngil­luin­nar­tuusoq. Eq­qarsaatiginer­paa Jiisusi sior­natigut inuusimanersoq? Naalak­kersuisup Guutimik nalusup taas­suma ilumoor­toq ilumut akueriumaner­paa, taman­nalu naaper­torlugu iliuuseqarumaner­pa? Aperinerminut sunaluun­niit pis­sutigisimagaluar­pagu Jiisusip taan­na akiuman­ngilaa, er­niin­narlu paasinarsivoq Pilatusip atorfim­mini ingerlal­luar­nis­sani ilumoor­tumin­ngar­nit eq­qor­tumin­ngar­nil­lu soqutiginerugaa. — Mat­thæusi 27:11-26.

Qujanar­tumik Jiisusip sumin­ngaan­neer­neranik paasin­nik­kusut­tut Biibilimeersumik akis­sutis­sarseriaan­naap­put. Uku eq­qarsaatigeriak­kit:

Il­loqarfeeq­qami Betlehemimi Judamiit­tumi er­nif­fis­satut naleq­qup­pal­laan­ngitsumi inun­ngor­poq. Kaasarip Augustusip inun­nik kisitsisitseq­qunera pis­sutigalugu Maria, taamani Jiisusimik naar­tusoq, uialu Josefi Betlehemimut, Josefip siuaasaasa najugarisimasaan­nut, aal­lar­tariaqar­put. Aap­pariit taak­ku il­loqarfim­mi inun­nik ulik­kaar­tumi tamatumani un­nuif­fis­sarsin­ngeriaramik nersutaasivim­mi un­nuiin­nar­tariaqarsimap­put. Jiisusi tas­sani inun­ngor­poq nersutaatil­lu nerisarfian­nut in­nar­tin­neqarluni. — Lukasi 2:1-7.

Jiisusip inun­ngor­nis­saa ukiunik hundredelin­nik sioq­qul­lugu sumi inun­ngor­nis­saa Biibilimi siulit­tuutigineqarsimavoq: “Il­lit Betlehemi, Efrata, Judap eq­qarleriis­sor­taan­ni mikisuuvutit. Ilin­nit piumaar­poq Israelimi naalagan­ngor­tus­saq.” * (Mika 5:1) Betlehemi Judami il­loqarfiit nalunaarsor­neqarfian­nut ilan­ngun­neqas­sal­luni mikival­laarsimagunar­poq. Taamaat­torli il­loqarfeeraq taan­na im­mik­korluin­naq it­tumik ataq­qinaateqalerumaar­poq, tas­sami Mis­siarsi, imaluun­niit Kristusi, tas­sani inun­ngor­tus­saavoq. — Mat­thæusi 2:3-6; Johan­nesi 7:40-42.

Sivikitsumik Egyptenimiilaariarlutik Jiisusip ilaqutai Nazaretimut Galilæamiit­tumut, Jerusalemimit 100 kilometerit mis­siliorlugit avan­nar­pasin­nerusumiit­tumut, nuup­put. Taamani Jiisusi suli pingasuliisiman­ngilaq. Nunami tas­sani alianaatsumi naasoris­saasoqarfiul­lunilu savaatileqarfiul­lunilu aalisar­toqarfiusumi Jiisusi ilaqutariis­suar­ni pigis­saar­tuugunan­ngitsuni peroriar­tor­poq. — Mat­thæusi 13:55, 56.

 Ukiunik hundredelin­nik sioq­qul­lugu Mis­siarsip ‘nazaræeriunis­saa’ Biibilimi siulit­tuutigineqarsimavoq. Iivangkiiliumik al­lat­toq Mat­thæusi Jiisusip ilaqutai pil­lugit al­lap­poq ‘il­loqarfim­mi Nazaretimik atilim­mi najugas­sit­tut eq­quuteq­qul­lugu pruf­fiititigut oqaaserisaq: “Nazaræerimik taaneqas­saaq.”’ (Mat­thæusi 2:19-23) Taaguutip nazaræerip oqaatsil­lu hebræerisuup “naaneq”-up isumaat as­sipalugiin­nguatsiar­put. Mat­thæusip pigunar­paa Mis­siarsip Esajap siulit­tuutaani Isajimit ‘naanerar­neqar­nera’, tas­sa imaap­poq Isajip — kun­ngip Daavip ataataata — Mis­siarsi kinguaariumaaraa. (Esaja 11:1) Aap, Isajip Jiisusi Daavi aq­qutigalugu kinguaaraa. — Mat­thæusi 1:6, 16; Lukasi 3:23, 31, 32.

Biibilimi al­laatigineqar­poq Jiisusi Betlehemimi nersutit inaan­ni inun­ngoq­qajar­nanili piulersimasoq. Pruf­fiiti Mika siusin­nerusuk­kut is­suar­neqar­toq nangil­luni al­lap­poq taan­na ‘aal­laaveqar­toq qangarsuarmit, itsarsuarmit’. (Mika 5:1) Jiisusi nunarsuarmi inun­ngun­ngik­kal­larami Guutip angajul­liliaatut qilam­mi anersaajul­luni piusimavoq. Jiisusi nam­mineq ima oqar­poq: ‘Qilam­mit aq­qar­punga.’ (Johan­nesi 6:38; 8:23) Qanoq taamaat­toqarsin­naagami?

Jehovap Guutip anersaani il­ler­nar­toq atorlugu er­nermi qilam­miusup inuunera niviarsiap juutiusup Mariap il­liaanut tupin­nar­tulior­nik­kut nuup­paa, taan­na inut­tut naam­mal­luin­nar­tutut er­niusin­naanias­sam­mat. * Taamatut tupin­nar­tulior­neq Guutimut ajugaqan­ngitsumut ajor­naateqan­ngilaq. In­ngilip Mariamut oqalut­tup oqar­neratut ‘Guutimut sumik ajor­nar­toqan­ngilaq’. — Lukasi 1:30-35, 37.

Biibilimi oqalut­tuarineqaan­nan­ngilaq Jiisusi sumin­ngaan­neer­nersoq. Aam­ma iivangkiiliuni sisamaasuni — Mat­thæusip, Markusip, Lukasip Johan­nesil­lu iivangkiiliuini — oqalut­tuarineqar­poq Jiisusip suna ulap­putigisimagaa.