Yesu—Kwaātambile

“[Pilato] wakatwela dikwabo monka mu njibo ya kiketelo kya mambo kamwipangula Yesu amba: Lelo ko wafundukile abe i kwepi? Ino Yesu ne kumulondololapo mpika.”—YOANO 19:9.

MBIKAVU wa Loma Pontyusa Pilato wāipangwile kino kipangujo mu kitatyi kyādi Yesu mu makambakano a mu būmi bwandi. Pilato wādi uyukile i mutamba’ka wa Isalela utambile’ko Yesu. (Luka 23:6, 7) Kadi wādi uyukile amba Yesu i muntu mwishile kulampe na bakwabo. Le Pilato wādi usaka kuyuka shi Yesu wāikele’ko tamba kala? Le bine uno mulopwe wampikwa kwitabija wādi usaka kwitabija ne kulonga mungya bubinebine? Nansha bikale namani, Yesu wāpelele kumulondolola, ne kwija mpika byāmweka patōka amba Pilato utele mutyima bininge pa kitenta kyandi kupita’ko pa bubinebine ne boloke.—Mateo 27:11-26.

Bya dyese, boba basaka binebine kuyuka kwine kwātambile Yesu bakokeja kwikutana mu muswelo upēla. Bible ulombola patōkelela kwine kutambile Yesu Kidishitu. Tala.

▪ Kwaābutwidilwe Mbadilo ya ino myaka ilombola amba Yesu wābutwidilwe mu kisaka kya balanda mu Betelema, kibundi kya ntanda ya Yuda ku dikumbi dya mwaka wa 2 K.K.K. Mulopwe Kesala Akutusa pa kusoñanya kulembwa bu musonko, byālengeja Madia, inandya Yesu, na “dīmi,” ne mulumyandi Yosefa bende ku Betelema ku ba Yosefa. Byobābudilwe kwa kufikila, mwanda wa bantu bāvudile’mo, bano ba mulume ne mukaji bākafikīle mu kipombo, mwine mwābutwidilwe Yesu bāmutūla mu kidīlo.—Luka 2:1-7.

Myaka tutwa kumeso, bupolofeto bumo bwa mu Bible bwālaile kwine kukabutwilwa Yesu, amba: “Ino’nka abe Betelema Efelata abe wi mutyetye kwikala umbukata mwa tununu twa Yuda, mudi abe mukalupuka umo ko ndi ukekala muledi mu Isalela.” * (Mika 5:2) Bimweka amba Betelema wādi mutyetye bininge kabadilwapo mu bibundi bikatampe bya mu Yuda. Inoko, kino kibundi kityetye kyādi kya kwikala na dyese dya pa bula. Meshiasa wālailwe, ke Kidishitu kadi, wādi wa kutamba mu Betelema.—Mateo 2:3-6; Yoano 7:40-42.

▪ Kwaātamine Kisaka kyādi’mo Yesu kyāshikete kitatyi kityetye mu Edipito, kupwa kyavilukila ku Nazala, kibundi kya mu polovenshi wa Ngadilea kintu kya makilometele 96 kungala kwa Yelusalema. Mu kine kitatyi’kya, Yesu wādi kabwenye myaka isatu. Mu ino ntanda ya buya bwa dyangi mwādi babidimye, babimunye, ne babiluwe bengila mingilo yabo, mo mwātamine Yesu mu kisaka kikatampe, kya bantu bampikwa kufuka ku makasa.—Mateo 13:55, 56.

Myaka tutwa kumeso, Bible wālaile amba Meshiasa ukekalanga “bu-Mwine Nazala.” Mateo, mulembi wa Evanjile unena’mba kisaka kya ba Yesu kyāile kushikata mu Nazala  “mwanda wa kunena’mba kifikile ponka kyokya kyanenwe kudi bapolofeto amba: Ukatelwa bu-Mwine Nazala.” (Mateo 2:19-23) Dijina Nazala dikwatañene na kishima kya Kihebelu kyalamwinwe bu “mutombo.” Padi Mateo wādi uvuluka bupolofeto bwa Isaya bwita Meshiasa bu “mutombo” utamba kudi Yese, mwanda wa kulombola amba Meshiasa wādi wa kutamba ku musuku wa Yese, shandya Mulopwe Davida. (Isaya 11:1) Na bubine, Yesu i wa ku musuku wa Yese kupityila kudi Davida.—Mateo 1:6, 16; Luka 3:23, 31, 32.

▪ Kwine kwaātambile dibajinji Bible ufundija amba būmi bwa Yesu bwāshilwile tamba kala kumeso kwa kubutulwa’ye mu kipombo kya mu Betelema. Bupolofeto bwa Mika, botwatelanga dibajinji, bubweja’ko amba Aye i “wa nkungilo ya kala, ya nyeke ne nyeke.” (Mika 5:2) Yesu, byadi Mwana umbajinji wa Leza, wādi kala kipangwa kya ku mushipiditu momwa mūlu kumeso kwa kubutulwa’ye pano panshi. Yesu mwine wānene amba: “Natūkile mūlu.” (Yoano 6:38; 8:23) Le byābwanikile namani?

Yehova Leza wālongele kingelengele kupityila ku mushipiditu sandu wandi na kutundulwila būmi bwa wandi Mwana wa mūlu mu difu dya Madia, mwana-mukaji mujike Mwine Yuda amba abutule Yesu bu muntu mubwaninine. * Kingelengele kya uno muswelo kikokejika enka na bukomo bwa Leza Mwine Bukomo Bonso. Mwikeulu wāsapwidile Madia uno mwanda wānene amba, “kwa Leza kutupu kyakumukolela, mhm.”—Luka 1:30-35, 37.

Kutentekela pa kwitulombola kwātambile Yesu, Bible witusapwilanga bivule. Maevanjile aná—Mateo, Mako, Luka, ne Yoano—etusapwila bivule bitala pa būmi bwandi.

[Kunshi kwa dyani]