Sises​—Ia Wasa E Ketisang Ie?

“[Pailet] ahpw pil pedolong nan tehnpese oh patohwan idek rehn Sises, ‘Mehnia men komwi?’ Ahpw Sises sohte ketin sapeng.”—SOHN 19:9.

KEPINA en Rom, Pontius Pailet, idek peidek wet rehn Sises ni ahnsou me kopwung wiawihong ih. Pailet wehwehki denehn Israel me Sises ketisang ie. (Luk 23:6, 7) E pil wehwehki me Sises uhdahn weksang aramas teikan. Ia duwe, Pailet kin wie medemedewe ma Sises sou ketin momourehr mahso? Ia duwe, kaun menet me sohte kin kaudokiong Siohwa uhdahn pahn pwungki oh mwekidki me mehlelo? Sohte lipilipil dah me wiawi, Sises sohte ketin sapeng oh mwuhr e sansalda me Pailet kin nsenohkihte eh doadoahk sang dahme mehlel oh pwung.—Madiu 27:11-26.

E inenen mwahu pwehki e sohte apwal ong irail kan me uhdahn men esehla Sises ren diar iawasa e ketisang ie. Paipel kasalehda ni sansal iawasa Sises Krais ketisang ie. Tehk ire pwukat.

▪ Ia wasa e ketin ipwidi ie Sises ketin ipwidi nan peneinei semwehmwe ieu nan Sudia nan kahnimw en Pedleem. Ntingdien aramas me Sihsar Akustus koasoanehdi kahrehiong Mery inen Sises ni eh “liseian,” oh eh pwoud Sosep en mweselahng Pedleem, wasa me en Sosep peneinei mihmi ie. Pwehki ara sohte kak diarada ara wasahn pweidi nan kahnimwo pwehki eh dirala aramas, ira anahne pweidi nan dewen kamwenge mahn ehu oh ih wasao me Sises ketin ipwidi ie.—Luk 2:1-7.

Sounpar epwiki kei mwomwe, kokohp en Paipel ehu kasalehda wasa me Sises pahn ketin ipwidi ie: “Kowe, Pedleem Eprata, kowe me keieu tikitik nanpwungen kahnimw en Suda kan, ahpw I pahn ketikihda sang rehmw emen me pahn kaunda Israel.” * (Maika 5:2) Pedleem wia kisin wasa tikitik ehu me kahrehda e sohte iang kileldi nanpwungen kahnimw kan nan Suda. Ahpw kisin kahnimw wet pahn waunla. Mesaia de Krais me inoupe mie pahn kohsang Pedleem.—Madiu 2:3-6; Sohn 7:40-42.

▪ Wasa me e ketin tikida ie Mwurin ahnsoukis me re mihmi Isip, en Sises peneineio uhd keseula Nasaret, kahnimw ehu nan Kalili mpen mwail 60 sang paliepeng en Serusalem. Ni ahnsowo, Sises kereniong sounpar siluh. Nan wasa kaselel kiset mie soumwet kan, sounsilepen sihpw kan oh soused kan kin doadoahk wasao. Ih wasao me Sises ketin tikida ie nan peneinei laud ehu me sohte kepwehpwe.—Madiu 13:55, 56.

Sounpar epwiki kei mwowe, Paipel kohpada me Mesaia pahn wia “mehn Nasaret.” Madiu emen me iang ntingihda pwuhken Rongamwahu ko koasoia me sapwellimen Sises peneinei kohla oh kousoanla “nan kisin kahnimw  kis me adaneki Nasaret. Eri, met wiawiher pwe en pweida me soukohp ako mahsanih, dene: ‘E pahn kin mwarenki mehn Nasaret.’” (Madiu 2:19-23) Ahd wet Nasaret mwomwen kohsang lepin lokaiahn Ipru “pons.” Sansal me Madiu kin koasoakoasoia kokohp en Aiseia me kahdaneki Mesaiao, “pons” ehu sang kadaudok en Nanmwarki Depit. (Aiseia 11:1) Sises iei kadaudok en Sehsi sang Depit.—Madiu 1:6, 16; Luk 3:23, 31, 32.

▪ Ia wasa E ketisang Ie Paipel kin padahngki me Sises ketin mour mahsie mwohn eh ketin ipwidi nan dewen mahn nan Pedleem. Kokohp en Maika me kileldi mwoweo doulahte mahsanih me Sises “tepido sang kawao.” (Maika 5:2) Nin duwen sapwellimen Koht Mesenih, Sises ketin wia ngehn emen nanleng mwohn e ketin ipwidi sampah nin duwen aramas emen. Sises pein ketin mahsanih: “I kohdihdo sang nanleng.” (Sohn 6:38; 8:23) Ia duwen met eh kak wiawi?

Siohwa Koht ketin doadoahngki sapwellime manaman pwehn kasauda mouren sapwellime Ohlo ong nan kapehd en Mery, lih en Suhs meipwon men pwe en kak ipwidi wia aramas unsek men. * Soangen manaman wet sohte apwal ong Koht Wasa Lapalahpie. Duwehte dahme tohnlengo koasoiaiong Mery, “sohte mehkot me sohte kak pahn Koht.”—Luk 1:30-35, 37.

Paipel sohte kin ihte mahsanihong kitail ia wasa me Sises ketisang ie. Pwuhken Rongamwahu pahieuo me iei Madiu, Mark, Luk oh Sohn, kin padahkihong kitail laud duwen mwomwen sapwellimen Sises mour.

[Nting tikitik kan me mi pah]