Jesus ¿mëpitataq shamurqan?

“Tsenam [Pilatu] despachunman cutiratsir yape Jesusta taporqan: —¿Mepitataq qam canqui? —nir. Peru Jesusqa upällam cacorqan.” (JUAN 19:9.)

KËTAQA, wanutsiyänampaq juiciota rurëkarmi gobernador Poncio Pilatu Jesusta tapurqan. * Pero pëqa allim musyaq më markapita Jesus kanqantapis (Lucas 23:6, 7). Hinamampis, cuentata qokurqanmi Jesus wakin nunakunanölla mana kanqanta. Tsëqa, ¿manaraq yurir mëchöpis kawanqantatsuraq musyëta munarqan? O, ¿mëchöpis kawanqanta musyarirtsuraq creita munarqan? Manam musyantsiktsu. Pero Jesusqa manam tapukïninkunata contestarqantsu. Tsëpitanam nunakuna musyariyarqan Pilatu rasumpa kaqta y alli rurëta mana kuyanqanta, tsëpa rantinqa autoridad këninllata puntaman churanqanta (Mateo 27:11-26).

Jesus mëpitapis kanqanta rasumpa kaqta musyëta munaqkunaqa, rasumpa kaqtam musyayanqa, Bibliachöqa llapantam Jesuspaq willakun. Qateqninchö rikärishun.

▪ ¿Mëchötaq yurirqan? Jesusqa Judea provinciapa Belen markanchömi yurikurqan, huk waktsalla familiachö. Gobernador Cesar Augustu apuntakoq ëwayänampaq llapan nunakunata mandaptinmi, Josëwan Maria Belen markaman ëwayarqan, tsë markapita Josëpa teytankuna kayashqa kayaptin. Pero Marïapa llullun yurinampaqqa ichikllanam pishirqan. Belen markaman chärirnam posädata tariyarqantsu, tsënam animalkuna punuyanqanllachöna posadakuyarqan. Y tsëchömi Jesus yurirqan (Lucas 2:1-7).

Jesus yurinampaq atska pachak watakuna pishikaptinmi, profëtakuna willakuyashqana kayarqan Jesus mëchö yurinampaq kaqtapis, kënö nir: “Qam Belen Efrata, Judächö waranqakunapita más ichikllëlla kaq, qampitam yarqamunqa Israelpa huk gobernanten” (Miqueas 5:2). * Itsa Belen markataqa, Juda provinciapa listankunallamampis churayaqtsu alläpa ichikllan marka kaptin. Tsënö kaptimpis, tsë markachömi Diospa Akrashqan yurirqan (Mateo 2:3-6; Juan 7:40-42).

▪ ¿Mëchötaq winarqan? Egipto markachömi wallka tiempolla kawarqan. Pero kima watata manaraq cumplirmi Galilea provinciapa Nazaret markanman familianwan ëwakuyarqan, tsëqa 100 kilömetrosnömi Jerusalén markapita këkan. Kë shumaq markachöqa kawayaq murukoqkuna, mitsikoqkuna y pescadorkunam, tsëchömi  wawqinkunawan y paninkunawan Jesusqa winarqan, hinamampis itsa waktsa familia kayarqan (Mateo 13:55, 56).

Hina Diospa Palabranqa unëpitanam willakoq, Diospa Akrashqanqa “Nazaretpitam canqa” nishpa. Tsëmi Mateopis Jesuspaq kënö nishpa willakurqan: “Nazaret marcacho[mi] täcorqan. Tsecuna pasacuptinmi, Diospa profetancuna ‘Nazaretpitam canqa’ nir, escribiyanqancuna cumplirerqan”. Hebreo idiömachö nazareno palabraqa, ‘tseqllipin’ palabrapitam shamun (Mateo 2:19-23). Mateoqa këchö parlëkan profeta Isaías qellqanqampitam, pëmi Akrashqapaq ‘Jesëpa tseqllipinmi’ kanqa, o rey Davidpa teytan Jesëpitam shamunqa nirqan (Isaías 11:1). Y profëtakuna willakuyanqannömi cumplikarqan. Bibliata leirqa Jesëpita y Davidpita Jesus shamunqantam musyarintsik (Mateo 1:6, 16; Lucas 3:23, 31, 32).

▪ ¿Mëchötaq kawar qallarqan? Diospa Palabranqa Jesuspa kawënimpaq willamantsik Patsachö manaraq yurir unëpitana kawanqantam. Miqueas libroqa këtawanmi nin: “Kawëninqa qallanan tiempokunapitam, unë watakunapitam” (Miqueas 5:2). Diospa mayor Tsurin Jesusqa, manaraq kë Patsaman shamurmi ciëlochö huk espïritunö kawarqan. Kikinmi këta willakurqan: “Noqaqa sielupitam cä” (Juan 6:38; 8:23). Pero ¿imanötaq tsëqa pasakurqan?

Jehovämi santo espïritunwan tsëtaqa rurarqan. * Pëmi Tsurimpa kawëninta, Maria shutiyoq judía doncëllapa pachanman churarqan, tsënöpa hutsannaq nunanö yurinampaq. Llapan Puëdeq Diosnintsik tsëta ruranampaqqa manam sasatsu o ajatsu karqan. Y Marïata ángel ninqannömi: “Diospaqqa manam imapis sasatsu” (Lucas 1:30-35, 37).

Pero Bibliaqa maskunatam Jesuspaq parlan. Mateo, Marcos, Lucas y Juan librokuna Jesuspaq parlaptinmi, imanö kawënin kanqanta musyëta puëdentsik.

[Päginapa ura kuchunchö willakïkuna]