Iesu O Fea na Afio Mai Ai?

ʻOna toe ulufale lea o Pilato i le maota o le kovana ma faapea atu iā Iesu: “O fea e te sau ai?” Ae e leʻi tali atu Iesu iā te ia.’​—IOANE 19:9.

O LE fesili lenā a Ponotio Pilato le Kovana o Roma iā Iesu, a o faia lona faamasinoga. * Na iloa lelei e Pilato le vaega o Isaraelu e sau ai Iesu. (Luka 23:6, 7) Na ia iloa foʻi, e lē pei Iesu o isi tagata. Faamata o fia iloa moni e Pilato pe na soifua muamua Iesu i se isi olaga? Faamata e talia e lenei taʻitaʻi faapaupau le mea moni ma gaoioi e tusa ai? Po o le ā lava le manatu sa iā Pilato, ae e leʻi tali Iesu, ma na manino mai ai, na tāua iā Pilato lona tulaga aloaʻia, ae lē o le mea moni ma le faamasinogatonu.​—Mataio 27:11-26.

Ua faigofie ona iloa e i latou e fia iloa faamatalaga moni e uiga i le mea na tupuga mai ai Iesu Keriso, ona ua faamanino mai i le Tusi Paia. Ia iloilo faamatalaga o loo mulimuli mai.

Le nuu na fanau ai

Na fanau Iesu i le aai o Peteleema i Iutaia. Na poloaʻia e Kaisara Aokuso le tusigāigoa, ma na malaga atu Iosefa ma Maria le tinā o Iesu, a o ʻmamafa i lana tama’ i Peteleema, i le nuu na tupuga mai ai Iosefa. Talu ai e leʻi avanoa se fale talimālō, o lea na la nonofo ai i le fale e tuu ai meaʻai a manu, ma sa fanau ai Iesu i inā.​—Luka 2:1-7.

I senituri muamua atu, na valoia mai ai i le Tusi Paia le mea e fanau mai ai Iesu: “O oe, Peteleema Efarata e, o lē e sili ona itiiti ma e lē aofia i le faitau afe o Iuta, e tupu mai iā te oe mo aʻu o lē o le a fai ma pule i Isaraelu.” * (Mika 5:2) E foliga mai e leʻi taʻua Peteleema i le lisi o aai o Iuta, ona e laʻitiiti tele. Peitaʻi, sa maua e lenei aai itiiti se faaeaga sili. O le a tupuga mai ai le Mesia na folafolaina, po o le Keriso.​—Mataio 2:3-6; Ioane 7:40-42.

Le nuu na soifua aʻe ai

E leʻi umi ona nonofo le aiga o Iesu i Aikupito, ae siitia loa i Nasareta, o se aai i le itumalo o Kalilaia, pe tusa o le 60 maila (96 km) i mātū o Ierusalema. O le taimi lenā e leʻi atoa le tolu o tausaga o Iesu. Na ola aʻe o ia i se aiga e toʻatele, i se vaipanoa matagofie ae faalētele le tamaoaiga, e nonofo ai faifaatoʻaga, leoleo mamoe, ma ē faifaiva.—Mataio 13:55, 56.

I senituri muamua atu, sa valoia ai i le  Tusi Paia, o le Mesia e mai i “Nasareta.” Na taʻua e Mataio, na ō atu le aiga o Iesu ma nonofo i “Nasareta, ina ia taunuu ai le upu ua fetalaia mai e ala i perofeta: ʻE taʻua o ia o le Nasareta.’” (Mataio 2:19-23) E foliga mai e fesootaʻi le igoa Nasareta ma le upu Eperu ua faaliliuina o “se tātupu.” O loo faatatau upu a Mataio i le valoaga a Isaia o loo taʻua ai le Mesia, o “se tātupu” po o sē e tupuga mai iā Iese, le tamā o le tupu o Tavita. (Isaia 11:1) O le mea moni, na tupuga mai Iesu iā Iese e ala mai iā Tavita.​—Mataio 1:6, 16; Luka 3:23, 31, 32.

Lona tupuaga

O loo taʻua i le Tusi Paia, ua leva ona soifua Iesu a o leʻi fanau mai i le fale o manu i Peteleema. I le valoaga a Mika, o loo faamatalaina atili ai Iesu “o lē e mai anamuā lona tupuaga, e mai i aso lava ua leva.” (Mika 5:2) Na avea muamua Iesu ma foafoaga agaga, o le Alo ulumatua o le Atua a o leʻi fanau mai o se tagata i le lalolagi. O Iesu lava na fetalai: “Na ou sau mai i le lagi.” (Ioane 6:38; 8:23) O le ā le uiga o lana fetalaiga?

E ala i le agaga paia, na faaliliuina faavavega ai e Ieova le Atua le soifua o lona Alo pele i le lagi i le manava o Maria le taupou Iutaia, ina ia fanau mai ai o se tagata lelei atoatoa. * O se vavega na faigofie i le Atua, o Lē e ou le malosi uma lava. Ua moni ai upu a le agelu iā Maria, “e faataunuuina e le Atua ana folafolaga uma.”​—Luka 1:30-35, 37.

E tele isi faamatalaga o le soifuaga o Iesu, o loo faamatalaina i Evagelia a Mataio, Mareko, Luka, ma Ioane.

[Faaopoopoga i lalo]