YESU Gu Ba Ko Aye Rogoho

“[Pirato] ki rimi ku bambu bazogo yo berewe, ki ya fu Yesu, ‘Mo aenge wari?’ Ka Yesu akaraga nga pai fu ko wa sa ya.”​—YOANE 19:9.

PONDIO PIRATO nangia gu bazogo nga ga aRomo ko asana gu sanahe re ho ga Yesu raka aduni rogo asada. Pirato aima ino gu papara Yisaraere Yesu aye rogoho. (Ruka 23:6, 7) Ko aima inoho a nga Yesu angianga kungbo kumba te. Ya mo Pirato aabakabangiriko abaka si singia Yesu araki mbata? Ya mo gu bazogo apagano re aduna nyemu rengo na ka mangapai kuti ni? Ka si vura du nga kina ginipai nadu, Yesu aima ká ka karagapai, na si aima du niyuguyuguhe gbaiga nga Pirato aduna kina nyemu gako apai zanga du na nyemu rengo na rurupai.​—Matayo 27:11-26.

Ani na tambuahe tipa gupai nga, agu aboro nzunzu naida ka ino wari Yesu ayeni, i rengbe arengba ka inoho niipo. Ziazia Kekeapai nayugo wari Yesu Kristo aenge ni ziazia. Oni bingo agi apai re.

▪ Gu ba i avunguko rogoho I avungu Yesu rogo gu gbaria nga ga Yuda nangia Betereme. Kaisara Auguseto arũ ndika aboro ke rimoyo rogo agu arago i avunguyo rogoho. Sidu, Yosefa aguari na Maria ri naima “gbe na gude” ki ndu ku Betereme yo tipa ka ke rimoyo. Ho i adani yo, i aarengbanga ka bi ba ka i ra rogoho te, sidu, i ki ndu kina ku bambu anyaa yo, na yo du Maria avungu Yesu ni ki pigiko rogo barigo anyaa.​—Ruka 2:1-7.

Dungu akama agarã kusayo, nebi agumbapa gu ba i ka vunga Yesu rogoho ki yaa: “Ako Betereme Efurata, wa du mo ni umba ro dagba angbatunga aYudo ono boro ayé yo du mo ni tipa re nikadu ni bazogo aYisaraere.” * (Mika 5:2) Si nawira gupai nga, wa Betereme angia wiri tooni rago gbua, si du i aayamanga rimoho ti ni ku dagba agu abaakporo nangia ga Yuda ya. Ono tie, si adu nga bakerepai nika manga rogo gi wiri tooni rago re. Si adu nga Masiya, watadu Kristo, nika ye Betereme yo.​—Matayo 2:3-6; Yoane 7:40-42.

▪ Gu ba ko asono rogoho Fuo raka Yosefa na Maria gbiati tooni Yesu Ezipeta yo tipa bete regbo, i aguari ki ga ku Nazareta yo, nangia gu bakporo nadu Gariraya yo baturõho aduwa amairo 60 (akirometere 96) ti Yerusarema ku nodiyo. Ti gu regbo re, garã Yesu aadanga ti biata te. Yesu asono rogo gi rago nadu na abasopobino rogoho na abazogo anyaa, gbiati abaziatĩo re, na Maria aima ru ki vungu kura agude fu Yosefa.​—Matayo 13:55, 56.

Badungu akama agarã kusayo mbata fu vungayo Yesu, Ziazia Kekeapai ape gupai nga Masiya nikangia “boro Nazareta.” Gu bake Wene Pangbanga nangia Matayo ake gupai  nga, Yosefa aga na gako aborokporo ka raka “Nazareta [yo]; gu pai du ni digisidigisi he anebi agumba ha, ya ‘I aya ti [Masiya] boro Nazareta.’” (Matayo 2:19-23) Gu fugo nga “boro Nazareta” si mbedi ambeda na gu nga “be ngua.” Si nirengo nga, Matayo aafura tipa gu sangbanebi nga ga Yesaya nga gu naya tipa Masiya wee ko nikangia “be ngua” nika kura ti Yisai, du rogoyo nga Masiya nikangia tita Yisai, nangia ba Davide. (Yesaya 11:1) Yesu aye ti gu ngbatunga nangia ga gu wiri Yisai nangia Davide.​—Matayo 1:6, 16; Ruka 3:23, 31, 32.

▪ Gu ba ko aenge rogoho Ziazia Kekeapai nayugo gupai nga, ga Yesu raka atona bakuru kusayo mbata fu vungayo ko bambu anyaa yo Betereme yo. Gu sangbanebi nga ga Mika, si ape gupai berewe nga Masiya adu ho “bakuru yo, ti tonatona arame.” (Mika 5:2) Wangia Yesu bambata Wiri Mbori, ko aima raka ngbangbaturũ yo mbata fu vungayo ko auru kpotosende niboro. Yesu aya ningbako wee: ‘Mi aye ngbangbaturũ yo.’ (Yoane 6:38; 8:23) Yesu awiri paye ngbangbaturũ yo wai?

Yekova Mbori amangi iiriwopai nga ka dia ga Yesu unga ngbangbaturũ yo kini moihe ku rukumbu gu ngasudee yo nangia Maria ri vunguko sende no. * Si niwiri taatapai fu Mbori Duna Tanduapai Dũ ko mangi iiriwopai wa gure. A wa gu maraika Mbori akediko fuo Maria agumbaha, “anga ga Mbori pai ho sa ka zanga tandu te.”​—Ruka 1:30-35, 37.

Ziazia Kekeapai nagumba kura dungu apai furani tipa Yesu. Agu Akitabu Wene Pangbanga du biama, nga Matayo, Marako, Ruka, na Yoane, si nagumba badungu apai furani tipa wai gako raka adu.

[Gu rukutu kekepai du bandu waraga yos]