Zezi​—Ki mannyer i ti viv son lavi?

“Mon nouritir se pour obei lavolonte sa enn ki’n anvoy mwan, e fini travay ki i’n donn mwan.”​—ZAN 4:34.

KONTEKS dan ki Zezi ti dir sa parol i fer nou aprann bokou lo sa ki ti pli enportan dan son lavi. Zezi ek son bann disip ti pe vwayaze depi bomaten dan Samari, en pei ki ti annan bokou montanny. (Zan 4:6) Son bann disip ti mazinen ki Zezi ti lafen, alor zot ti ofer li en pe manze. (Zan 4:31-33) Dan larepons ki i ti donn zot, Zezi ti montre kwa ki ti bi son lavi. Pour li, fer travay son Papa ti pli enportan ki manze. Zezi ti viv pour akonplir lavolonte Bondye e i ti demontre sa atraver son parol ek aksyon. Ki sa ti enplike?

▪ Anons e ansenny lo Rwayonm Bondye Labib i eksplik sa travay ki Zezi ti fer dan son lavi an dizan: “Zezi ti pe ansenny bann dimoun dan tanp e anons Bonn Nouvel.” (Lik 20:1) Zezi pa ti zis anons konsernan Rwayonm Bondye avek lezot. I ti osi ansenny bann dimoun, andotmo i ti enstri zot, eksplik zot e i ti konvenk zot par servi bann bon rezonnman. Rwayonm Bondye ti tenm mesaz Zezi.

Diran son minister, Zezi ti ansenny bann dimoun kwa sa Rwayonm Bondye e ki sa Rwayonm pou fer. Not sa bann laverite lo Rwayonm ek sa bann verse Labib ki’n ganny site ki montre sa ki Zezi ti ansennyen lo sa Rwayonm.

▪ Rwayonm Bondye i en gouvernman dan lesyel e Bondye in swazir Zezi konman son Lerwa.​—MATYE 4:17; ZAN 18:36.

▪ Sa Rwayonm pou glorifye non Bondye e i pou akonplir son lavolonte lo later parey dan lesyel.​—MATYE 6:9, 10.

▪ Later antye pou vin en paradi anba dominasyon Rwayonm Bondye.​—LIK 23:42, 43.

▪ Tre byento Rwayonm Bondye pou vini e i pou akonplir plan Bondye pour later. *​—MATYE 24:3, 7-12.

▪ I ti fer bann gran mirak Zezi ti ganny rekonnet prensipalman konman “Met [oubyen Ansenyan, NW].” (Zan 13:13) Par kont, pandan sa trwa-zan edmi ki i ti fer son minister, i ti osi fer plizyer gran mirak. I ti annan omwen de rezon akoz i ti fer sa bann mirak. Premyerman, sa bann mirak ti prouve ki Bondye menm ki ti’n anvoy li. (Matye 11:2-6) Dezyenmman, zot donn nou en avangou konsernan sa ki Zezi pou fer konman Lerwa dan lavenir dan lemonn antye. Not serten sa bann mirak ki i ti fer.

▪ I ti kalme en gro tanpet lo lanmer ek bann gro divan.​—MARK 4:39-41.

▪ I ti geri bann dimoun malad enkli bann ki pa ti war kler, bann sourd ek bann ki ti paralize.​—LIK 7:21, 22.

▪ I ti fer en ptigin manze vin en kantite pour nouri en lafoul dimoun ki ti lafen.​—MATYE 14:17-21; 15:34-38.

▪ Dan omwen trwa lokazyon Zezi ti resisit bann mor.​—LIK 7:11-15; 8:41-55; ZAN 11:38-44.

Zis mazinen ki mannyer lavi pou ete anba dominasyon sa Lerwa pwisan!

 ▪ I ti fer dimoun konn personnalite Bondye Kot i konsern ansenny dimoun lo Zeova, napa personn ki pli kalifye ki son prop Garson, sa enn ki nou konnen konman Zezi Kri. Konman sa “premye-ne tou kreasyon,” Zezi ti viv ansanm avek Zeova dan lesyel pour pli bokou letan ki okenn lanz. (Kolosyen 1:15) Zis mazin sa bann loportinite ki i ti gannyen pour aprann o profon fason panse son Papa e aprann konn Son lavolonte, standar ek fason ki i fer keksoz.

Zezi ti alor kapab dir: “Personn pa konnen ki son Garson i ete eksepte son Papa, e personn pa konn mon Papa eksepte son Garson ek bann ki son garson in swazir pour revel li.” (Lik 10:22) Kan i ti lo later konman en zonm, Zezi ti volonterman fer tou dimoun konnen ki mannyer son Papa i ete e i ti fer li avek bokou lazwa. Zezi ti koz e ansenny dan en fason inik akoz i ti servi sa ki i ti’n aprann direkteman avek Bondye Tre O kan i ti dan lesyel.​—Zan 8:28.

Sa ki Zezi ti fer pour montre ki mannyer son Papa i ete i kapab ganny konpare avek en masin elektrik ki transform voltaz kouran. Sa masin i kapab pran elektrisite ki annan en voltaz o e transform li dan en voltaz ki dimoun i kapab servi. Kan Zezi ti lo later, i ti pran sa ki i ti’n aprann dan lesyel lo son Papa e transform li dan en fason ki bann dimoun ki lo later pou fasilman kapab konpran e aplike.

Annou vwar de fason enportan ki Zezi ti fer dimoun konn son Papa.

▪ Dan son lansennyman, Zezi ti fer konnen laverite lo Zeova par egzanp, Son non, son lavolonte ek fason ki i fer keksoz.​—ZAN 3:16; 17:6, 26.

▪ Atraver son bann aksyon, Zezi ti ansenny bann dimoun bokou zoli laspe dan personnalite Zeova. Zezi ti reflekte personnalite son Papa sitan byen ki i ti kalifye pour dir: ‘Si ou anvi konnen ki mannyer mon Papa i ete, zis get mwan.’​—ZAN 5:19; 14:9.

Nou emerveye par lafason ki Zezi ti viv. Nou pou kapab benefisye en kantite si nou egzaminen akoz i ti mor e si nou aplik sa ki nou aprann lo li.

[Not anba lo paz]