Yezu Mutindu Yandi Zingaka

“Madia na mono kele yo yai: na kulanda luzolo ya muntu yina tindaka mono ti na kumanisa kisalu yina ya yandi me pesaka mono na kusala.”​—YOANE 4:34.

DYAMBU yina kupusaka Yezu na kutuba bangogo yina kele na zulu, kemonisa mbote-mbote dyambu yina yandi vandaka kutula na kisika ya ntete na luzingu na yandi. Yezu mpi balongoki na yandi, kusalaka nzyetelo suka ya mvimba na biwanda ya Samaria. (Yoane 4:6) Sambu balongoki ya Yezu kuyindulaka nde ntangu yai yandi fwete vanda na nzala, bo pesaka yandi mwa madya. (Yoane 4:31-33) Na mvutu yina yandi pesaka bo, Yezu kumonisaka na bunkufi lukanu ya luzingu na yandi. Sambu na yandi, kusala kisalu ya Nzambi kuvandaka mfunu mingi kuluta kudya. Na bangogo mpi na bisalu na yandi, Yezu kumonisaka nde luzingu na yandi kusimbamaka na kusala luzolo ya Nzambi. Dyambu yai ketendula nki?

▪ Kusamuna mpi kulonga Kimfumu ya Nzambi Biblia ketendulaka kisalu ya mfunu yina Yezu vandaka kusala na luzingu na yandi, na kutubaka nde: ‘Yesu vandaka kukwenda kutambula na ntoto yonso ya Galilea; yandi vandaka kwenda kulonga mpi kusamuna nsangu ya mbote ya Kimfumu ya Nzambi.’ (Matayo 4:23) Yezu vandaka kaka ve kusamuna to kuzabisa, bankaka Kimfumu ya Nzambi. Kansi yandi longaka mpi bantu, disongidila, yandi tendudilaka bo, mpi kundimisaka bo na kusadilaka bangindu ya mbote. Kimfumu ya Nzambi kuvandaka ntu-dyambu ya nsangu ya Yezu.

Na nsungi ya kisalu na yandi ya kusamuna, Yezu kulongaka bawi na yandi ntendula ya Kimfumu ya Nzambi mpi mambu yina yo tasala. Tala bakyeleka yina kelanda ya ketadila Kimfumu, kumosi ti baverse yina kezabisa beto bangogo ya Yezu na dyambu yango.

▪ Kimfumu ya Nzambi kele luyalu ya zulu, mpi Yezu kele muntu yina Yehowa meponaka na kuvanda Ntotila.​—MATAYO 4:17; YOANE 18:36.

▪ Kimfumu tasantisa zina ya Nzambi, mpi tasala mambu na mpila nde luzolo na yandi kusalama na ntoto bonso yo kesalamaka na zulu.​—MATAYO 6:9, 10.

▪ Na nsi ya Kimfumu ya Nzambi, ntoto ya mvimba takituka paladisu.​—LUKA 23:42, 43.

▪ Kubika fyoti, Kimfumu ya Nzambi takwisa mpi yo talungisa luzolo ya Nzambi sambu na ntoto. *​—MATAYO 24:3, 7-12.

▪ Kusala bimangu Yezu kuzabanaka ntete-ntete bonso “Longi.” (Yoane 13:13) Kansi, na nsungi ya bamvula tatu ti ndambu ya kisalu na yandi, yandi salaka mpi bimangu mingi mpenza. Bimangu yai kulungisaka balukanu zole. Ya ntete, yo sadisaka na kundimisa nde Nzambi muntu kutindaka yandi. (Matayo 11:2-6) Ya zole, yo monisaka na ntwala mambu yina yandi, Ntotila ya Kimfumu ya Nzambi, tasala na kiteso ya kuluta nene na makwisa. Tala mwa bimangu yina yandi salaka.

▪ Yandi lembikaka nzadi-mungwa mpi mipepe ya ngolo.​—MARKO 4:39-41.

▪ Yandi belulaka bambefo, tanga mpi bifwa-meso, bifwa-makutu, mpi bantu ya makulu kifu.​—LUKA 7:21, 22.

▪ Yandi salaka kimangu sambu na kukumisa madya mingi, ebuna yandi disaka kibuka ya bantu yina kuvandaka na nzala.​—MATAYO 14:17-21; 15:34-38.

▪ Na kiteso ya mabaku tatu, yandi futumunaka bantu ya kufwa.​—LUKA 7:11-15; 8:41-55; YOANE 11:38-44.

Yindula mutindu luzingu tavanda na ntoto na nsi ya luyalu ya Ntotila ya ngolo ya mutindu yai!

 ▪ Kumonisa kimuntu ya Yehowa Nzambi Na yina metala kulonga bankaka mambu ya metala Yehowa, ata muntu mosi ve meluta Mwana ya Nzambi, yina kuzabanaka na zina ya Yezu Kristu. Sambu yandi kele kigangwa ya ntete na bingangwa “yonso ya Nzambi salaka,” Yezu kuzingaka bamvula mingi na lweka ya Yehowa na zulu​—kuluta bingangwa yonso ya kimpeve. (Kolosai 1:15) Yindula mabaku yina yandi vandaka na yo, ya kubakisa bangindu ya Tata na yandi mpi kulonguka luzolo, minsiku, mpi banzila na yandi.

Yo yina, Yezu kufwanaka mpenza na kutuba nde: “Ata muntu mosi ve kuzaba kana Mwana kele nani, kansi Tata kaka muntu kuzaba. Ata muntu mosi ve kuzaba kana Tata kele nani, kansi Mwana mpamba muntu kuzaba ti bantu yina ya Mwana zola nde bo zaba kana Tata kele nani.” (Luka 10:22) Ntangu yandi vandaka na ntoto bonso muntu, Yezu kumonisaka Tata na yandi na ntima ya mvimba, Ee, na luzolo yonso mpenza. Bangogo mpi malongi ya Yezu vandaka mpenza ya kuswaswana ti malongi ya bantu yankaka; sambu yo vandaka kukatuka na mambu yina yandi monaka na zulu ntangu yandi vandaka na lweka ya Nzambi ya Kuluta Kuzanguka.​—Yoane 8:28.

Mambu yina Yezu kusalaka na kumonisaka tata na yandi lenda fwanana, ti kisalu yina apareyi yina kekulumusaka mpi kematisaka kura (transformateur électrique) kesalaka. Apareyi yango lenda baka kura yina kele ya mingi mpi kukulumusa yo na kura ya fyoti, ebuna kura yango takuma ya mbote sambu bantu mingi kusadila yo. Ntangu Yezu kuvandaka na ntoto, yandi bakaka mambu yina yandi longukaka na zulu na tata na yandi mpi kuzabisaka yo na mutindu yina ata, bantu ya mpamba yina kuvandaka na ntoto lendaka kubakisa mpi kusadila yo kukonda mpasi.

Tadila mitindu zole ya mfunu yina Yezu kumonisaka tata na yandi.

▪ Na malongi na yandi, Yezu kulongaka kyeleka ya metala Yehowa, disongidila zina na yandi, lukanu na yandi, mpi banzila na yandi.​—YOANE 3:16; 17:6, 26.

▪ Na bisalu na yandi, Yezu kumonisaka mambu mingi ya kitoko ya metala kimuntu ya Yehowa. Yezu kufululaka kimuntu ya tata na yandi na mutindu ya kukuka mpenza na mpila nde, yandi lendaka kutuba na kyeleka yonso nde: ‘Kana beno kezola kuzaba tata na mono, beno tala kaka mono.’​—YOANE 5:19; 14:9.

Beto kesepela na mutindu yina Yezu kuzingaka. Beto lenda baka mambote ya mingi mpenza kana beto tadila kikuma yina yandi fwaka, mpi kana beto sala mambu na kuwakana ti mambu yina beto melonguka.

[Noti na nsi ya lutiti]