Isua A Nun Dân

“Mitîrtu duhzâwng tih leh, a hna thawh zawh tûr hi ka chaw a ni.”—JOHANA 4:34.

ISUA’N he thu a sawi laia thil awm dân hian a nuna a ngaih pawimawh ber chu a târ lang chiang hle. Isua leh a zirtîrte chu Samari tlâng ram kal tlangin tûk pumin kêin an kal a. (Johana 4:6) Isua rîlṭâm tawh an rin avângin, zirtîrte chuan ei tûr an pe a. (Johana 4:31-33) A chhân lêtnaah Isua chuan nuna a thiltum ber chu a khaikhâwm a ni. A tân chuan Pathian hna thawh chu ei leh in aiin a pawimawh zâwk a. A ṭawngkam leh a thiltihah Isua chu Pathian duhzâwng ti tûrin a nung a ni. Chutah chuan eng nge tel?

▪ Pathian Ram chanchin hrilh leh zirtîr Bible chuan Isua nuna a hna ber chu: “Isuan an inkhâwmna inahte zirtîrin, [leh] ram chanchin ṭha chu hrilin . . . Galili ram zawng zawng a fang vêl a,” tiin min hrilh a ni. (Matthaia 4:23) Isua chuan mite hnênah Pathian Ram chu a hril, a nih leh a puang chhuak mai lo. Mite a zirtîr bawk a ni—chu mi awmzia chu, thiam taka chhûtpuina hmangin a kaihruai a, a hrilhfiahin, a hmin bawk tihna a ni a. Pathian Ram chu Isua thu hril thupui ber a ni.

A rawngbâwl chhûng zawng khân, Isua chuan a thu ngaithlatute chu Pathian Ram chungchâng leh chu miin a tih tûrte chu a zirtîr a. A hnuaia târ lan Lalram chungchânga thudik leh chu mi chungchânga Isua thusawi min hriattîrtu Bible chângte hi lo chhinchhiah ang che.

▪ Pathian Ram chu vân lam sawrkârna a ni a, Isua chu Pathianin Lal ni tûra a ruata chu a ni.—MATTHAIA 4:17; JOHANA 18:36.

▪ Lalram chuan Pathian hming a tizahawm, a nih loh leh a tithianghlim ang a, a duhzâwng chu vâna tih a nih angin leiah pawh tihin a awmtîr ang.—MATTHAIA 6:9, 10.

▪ Pathian Ram rorêlna hnuaiah chuan, lei pumpui hi paradis-a chantîr a ni ang.—LUKA 23:42, 43.

▪ Pathian Ram chu a lo thleng thuaiin, lei atâna Pathian thiltum a rawn hlen chhuak thuai ang. *—MATTHAIA 24:3, 7-12.

▪ Thilmak tih Isua chu “Zirtîrtu” tia hriat a ni deuh ber a. (Johana 13:13) Mahse, kum thum leh a chanve rawng a bâwl chhûngin, thilmak tam tak a ti bawk a ni. Chûng thilmakte chuan a lo berah pawh thiltum pahnih a nei a. A hmasain, chûng chuan ani chu Pathian tirh a nihzia a finfiah a. (Matthaia 11:2-6) A pahnihnaah chuan, Pathian Rama Lal a nih huna ropui zâwka a la tih tûrte a târ lang a ni. A thilmak tih ṭhenkhat i lo en ang u.

▪ Ani chuan tuipui phûl but but leh thlipui a hau reh.—MARKA 4:39-41.

▪ Mitdel te, bengngawng te, leh kebai te pawh tiamin dam lote a ti dam.—LUKA 7:21, 22.

▪ Ei tûr tipungin, mipui rilṭâm a hrai.—MATTHAIA 14:17-21; 15:34-38.

▪ A lo berah pawh vawi thum lai mitthi a kaitho.—LUKA 7:11-15; 8:41-55; JOHANA 11:38-44.

Chutiang Lal thiltithei tak rorêlna hnuaia leia nun awm dân tûr chu han ngaihtuah teh!

▪ Pathian Jehova mizia a târ lang Mi dangte hnêna Pathian Jehova chanchin zirtîr thu-ah chuan a hnua Isua Krista tia hriat tâk Pathian  Fapa ngei aia tling zâwk an awm lo. “Thil siam zawng zawnga piang hmasa ber” a nih angin, Isua chu vânah Jehova bulah chuan thlarau thil siam dang zawngte aia rei a awm a. (Kolossa 1:15) A Pa ngaihtuahna la a, A duhzâwng te, A tehna te, leh A kawngte zir theihna hun remchâng a neih nasat dân tûr chu han ngaihtuah teh.

Isua chuan: “Fapa chu tunge a nih, Pa lo chuan tuman an hre lo; Pa pawh chu tunge a nih, Fapa leh an hnêna Fapain a puan duhnate chauh lo chuan tuman an hre lo,” tiin a sawi thei a ni. (Luka 10:22) Mihring anga leia a awm lai khân, Isua chuan inhuam tak leh phûr takin a Pa nihna chu a hriattîr a. A thil thlîr dân chungnung bîk tak ṭanchhana thu sawiin a zirtîr bawk a; vâna Pathian Chungnungbera nêna an awm dun laia a thil hriatte chu a hmang ṭangkai a ni.—Johana 8:28.

A Pa chanchin hriattîrna kawnga Isua thiltih chu electric transformer hnathawh nên khaikhin theih a ni a. Chutiang khâwl chuan electric chak tak chu kawng hrang hranga hman theih tûr tâwkin a tihniam a ni. Chutiang bawkin, Isua chuan vâna a awm laia a Pa chanchin a hriatte chu leia mihring tlâwm takte’n awlsam taka an hriatthiam theih tûr leh nunpui theih tûr âwm tâwkin a pe chhuak a ni.

Isua’n a Pa chanchin a târ lan dân kawng pawimawh tak pahnih i lo ngaihtuah ang u.

▪ Isua chuan a zirtîrnaah Pathian Jehova hming te, a thiltum te, leh a kawngte chungchânga thu dik chu a hriattîr a ni.—JOHANA 3:16; 17:6, 26.

▪ Isua chuan a thiltih aṭangin Pathian Jehova mizia duhawm tam tak a târ lang bawk a. Isua chuan a Pa mizia chu a nihna ang chiaha famkim taka a târ lan avângin: ‘Ka Pa nihna in hriat duh chuan, keimah hi min en mai rawh u,’ tih theih tûr tlukin thu a sawi thei a ni.—JOHANA 5:19; 14:9.

Isua nun dân chu mak kan ti hle a. A thih chhan kan bih chian a, kan thil hriatte mila kan nun chuan nasa takin kan hlâwkpui thei a ni. (w11-E 04/01)

[Footnote]