“Kots ëj nduny diˈibë tsyejpy pënëts të xykyexy, ujts jotkëdakpëts extëm jyawë ngay nˈiigyëts.” (FWANK 4:34)

KO DUˈUNË Jesus jyënany, yëˈë yajnigëxëˈk tiko naty të myiny yä Naxwiiny. Të naty tyuˈuyoˈoy tukkujkxyëë mët ja yˈëxpëjkpëty mä tun kopk diˈib Samaria (Fwank 4:6). Ta ja yˈëxpëjkpëty wyinmääytyë ko waˈan yuˈoˈkënë ets yˈawäˈänëdë käˈäy ukën (Fwank 4:31-33). Per extëmë Jesus yˈatsooy, ta nˈijxëm tiko naty të myiny yä Naxwiiny. Jesus mas jëjpˈam tpëjtaky ti naty ja tyeety të tyuknipekyëty ets kyaj dyuˈunëty ja käˈäy ukën. Mëdë kyäjpx myaytyakën ets mët tijaty tyuun, dyajnigëxeˈky ko päätyë naty të myiny parë ttunanë tyeety tyuunk. ¿Tijaty tyuun?

▪ Jesus käjpxwäˈkx ets tukniˈˈijxë Diosë yˈAnaˈamën Mä Biiblyë jyënaˈany ko “Jesus tyukˈyoˈoytyaabyë naty ja Galikeeë it, yaˈëxpeky” ets “tkäjxwaˈxy ja oybyë ayuk diˈibë nyigajxypy ja tsäjpotmëdë kutujkën” (Matewʉ 4:23). Jesus kyaj jeˈeyë ojts tnimaytyaˈagyë Diosë yˈAnaˈamën, nanduˈunën tyukniˈˈijxë ets yaˈëxpejky extëm mbäädë jäˈäy tjaygyukëdë. Ets yëˈë kyäjpxkopkˈäjt ja Diosë yˈAnaˈamën.

Nuˈunë Jesus tmëduunyë Dios, ojts ttukniˈˈixë ja yˈëxpëjkpëty ti duˈun yˈandijpy Diosë yˈAnaˈamën ets ti tyunaampy. Min nˈokˈijxëm tijatyë Jesus myaytyak ets mä yajpääty mä Biiblyë.

▪ Diosë yˈAnaˈamën, yëˈë tuˈugë gobiernë diˈib tsäjpotm, etsë Jyobaa yëˈë yajtunaambyë Jesus extëmë Rey (MATEWɄ 4:17; FWANK 18:36).

▪ Tyäˈädë Anaˈamën, yëˈë yajwäˈätsaambyë Diosë xyëë ets ttunanë Diosë tsyojkën yä Naxwiiny duˈun extëm yajtuny tsäjpotm (MATEWɄ 6:9, 10).

▪ Tyäˈädë Diosë yˈAnaˈamën yëˈë yajjëmbitaampy tukëˈëyë naxwinyëdë jantsy tsuj (LUCAS 23:42, 43, Traducción del Nuevo Mundo).

▪ Tsojk myinäˈänyë tyäˈädë Anaˈamën ets ttunäˈänyë Diosë tsyojkën yä Naxwiiny (MATEWɄ 24:3, 7-12). *

▪ Tyuunë miläägrë Ja Jesusë yˈapostëlëty ojts tyijëdë “Yaˈëxpëjkpë” (Fwank 13:13). Per nan ojts yaˈixyˈaty extëm ja diˈib tyuumbyë miläägrë nuˈun ojts kyäjpxwaˈkxy tëgëk jëmëjt ja kujm. ¿Tiko ttunyë miläägrë? Tim jawyiin, yëˈë parë ojts dyaˈixyëty ko yëˈë natyë Dios të kyexyëty, ets ja tuˈuk, yëˈë parë dyaˈijxë ti tyunaampy abëtsemy nyaxwinyëdë ko tyëkët rey (Matewʉ 11:2-6). ¿Tijaty miläägrë tyuun?

▪ Yajmoongëdakë mëk poj etsë mejny (MARKɄS 4:39-41).

▪ Yaˈijxpëjkë wiints, yajmëdoobëjkë nat, yajˈyoˈoyëˈkë tekymyäˈät ets yaˈˈagëdakë päˈäm jäˈäy (LUKɄS 7:21, 22).

▪ Ojts dyajmayë käˈäy ukën parë dyajkääyë may jyaˈay (MATEWɄ 14:17-21; 15:34-38).

 ▪ Tëgëëgë oˈkpë dyajpëdeˈky (LUKɄS 7:11-15; 8:41-55; FWANK 11:38-44).

Extëm nˈijxëm, mëjwiin kajaa ndukˈoyˈatäˈänëm yä Naxwiiny ko naty yˈaneˈemy ja rey diˈib jantsy oy tunäämp.

▪ Yajnigëxëˈkë Jyobaa jyaˈayˈäjtën Kyaj jyaˈˈatyë wiinkpë jäˈäy extëmë Jesukristë, Diosë yˈUˈunk, diˈib mbäät xytyuknijäˈäjëm wiˈixën jyaˈayˈatyë Jyobaa. Pes tamë natyë “Kristë mä kyajnëmë naty ti kyojy”, nituˈugë anklës jeky kyaˈijty mëdë Dios extëmë Jesukristë (Kolosʉ 1:15). Okwinmay nuˈunë Jesus tjäjty tnijäˈäjë ti diˈibë Tyeety tsyejpy, wiˈix jyaˈayˈaty, wiˈix wyinmay ets wiˈix tijaty ttuny.

Pääty duˈun jyënany: “Ni pën tkaˈixyˈaty ja nDeetyëts, ëjts jeˈeyë, jaˈa yˈUˈunk. Es ni pënëts ëj xykyaˈixyˈaty, yëˈëyëtsë nDeety es ja jäˈäyëty diˈibëts ëj të nnaytyukˈixyëty mä yëˈëjëty” (Lukʉs 10:22). Päätyë Jesus tyukniˈˈixëyanë jäˈäy wiˈixë Tyeety jyaˈayˈaty ets jyantsy tyukxondak ko duˈun ttuuny. Kyaj naty mbäät pën tnimaytyaˈagyë Jyobaa extëm yëˈë, pes tukëˈëyë tijaty tukniˈˈijxë, yëˈë diˈib jyäjt tsäjpotm Tyeety wyindum (Fwank 8:28).

Tijatyë Jesus jyäjt mä Tyeety, duˈun tyukniˈˈijxë extëm mbäädë naxwinyëdë jäˈäy tjaygyukë.

Min nˈokˈijxëm majtsk peky wiˈixë Jesus ojts xytyukˈixyˈäjtëmë tyeety.

▪ Ko tyukniˈˈijxë, ojts tnimaytyaˈaky yajxon pënën Dios: ti txëˈaty ti tyuknibëjtakëp ets wiˈix tijaty ttuny (FWANK 3:16; 17:6, 26).

▪ Tijaty tyuun, ojts dyajnigëxeˈeky kanäk naxë Jyobaa jyaˈayˈäjtën. Jesus, yajxonën dyajnigëxeˈky wiˈix jyaˈayˈatyë tyeety, duˈunxyëp extëm jyënany: “Pën mnijawëyandëp wiˈixëtsë ndeety, ijxtëgëts ëjts” (FWANK 5:19; 14:9).

Duˈunë duˈun, mëjˈixy mëjmëdoy njäˈäwëm extëmë Jesus jyukyˈajty ets mbäät mëjwiin kajaa ndukˈoyˈäjtëm pën njaygyujkëm tiko Jesus yˈoˈky ets pën nguytyuˈunëm tijaty nnijäˈäjëm.

[Notë diˈib noky ëxˈääy]