Jesu—Abephila Njani?

“Kudla kwami kukwenta intsandvo yalongitfumile, nekucedzela umsebenti wakhe langinike wona.”—JOHANE 4:34.

SIMO Jesu labekuso ngesikhatsi asho lamavi langenhla, siveta lokunyenti mayelana naloko lobekubalulekile ekuphileni kwakhe. Jesu kanye nebafundzi bakhe besebahambe endzaweni yaseSamariya lenemagcuma kusukela ekuseni. (Johane 4:6) Ngesizatfu sekutsi bebacabanga kutsi Jesu ulambile, bafundzi bakhe bamniketa kudla. (Johane 4:31-33) Nakabaphendvula, Jesu wachaza injongo yekuphila kwakhe. Kuye, kwenta umsebenti waNkulunkulu bekubaluleke kakhulu kwendlula kudla. Ngemavi nangetento, Jesu waphilela kwenta intsandvo yaNkulunkulu. Loku bekuhlanganisa ini?

▪ Kushumayela nekufundzisa ngeMbuso waNkulunkulu Nalichaza umsebenti lobewubalulekile kuJesu, liBhayibheli litsi: “Jesu walihamba lonkhe laseGalile, afundzisa, . . . ashumayela liVangeli lembuso.” (Matewu 4:23) Jesu akazange amane nje ashumayele, nobe amemetele uMbuso waNkulunkulu kulabanye. Waphindze wabafundzisa—lokusho kutsi wabacecesha, wabachazela, waphindze wabacinisekisa asebentisa tizatfu letinengcondvo. UMbuso bekungiwo losihloko semlayeto waJesu.

Kuwo wonkhe umsebenti wakhe, Jesu wafundzisa tilaleli takhe ngaloko uMbuso waNkulunkulu longiko kanye nangaloko lotawukwenta. Naka nankha emaciniso lalandzelako lamayelana neMbuso, kanye nemavesi lakhonjiwe laveta emavi Jesu lawasho ngalendzaba.

▪ UMbuso waNkulunkulu unguhulumende wasezulwini, futsi Jehova ubeke Jesu kutsi abe yiNkhosi yawo.—MATEWU 4:17; JOHANE 18:36.

▪ UMbuso utawungcwelisa libito laNkulunkulu futsi ubangele kutsi intsandvo yakhe yentiwe emhlabeni njengasezulwini.—MATEWU 6:9, 10.

▪ Nasekubusa uMbuso waNkulunkulu, wonkhe umhlaba utawugucuka ube lipharadisi.—LUKHA 23:42, 43.

▪ UMbuso waNkulunkulu utawufika ngekushesha futsi ufeze intsandvo yaKhe emhlabeni. a—MATEWU 24:3, 7-12.

▪ Kwenta timangaliso Ngalokuyinhloko, Jesu bekatiwa ngekuba ‘nguMfundzisi.’ (Johane 13:13) Nanobe kunjalo, emsebentini wakhe lowatsatsa iminyaka lemitsatfu nencenye, waphindze wenta timangaliso letinyenti. Letimangaliso abetenta ngetinjongo letimbili. Kwekucala, betifakazela kutsi abetfunywe nguNkulunkulu. (Matewu 11:2-6) Kwesibili, betiveta loko latawukwenta ngelizinga lelikhulu esikhatsini lesitako, njengobe ayiNkhosi yeMbuso waNkulunkulu. Asewunake nati letinye timangaliso latenta.

▪ Wekhuta lwandle lolunemagagasi futsi wathulisa tivunguvungu.—MAKHO 4:39-41.

▪ Welapha bantfu labagulako, lokufaka ekhatsi timphumphutse, tihhulu, tinchute kanye netishosha.—LUKHA 7:21, 22.

▪ Wandzisa kudla, futsi wakwati kondla ticumbi tebantfu lebetilambile.—MATEWU 14:17-21; 15:34-38.

▪ Tikhatsi letintsatfu, wavusa bantfu labafile.—LUKHA 7:11-15; 8:41-55; JOHANE 11:38-44.

Asewucabange nje kutsi kuphila emhlabeni bekungaba njani nakubusa iNkhosi lenemandla langaka!

 ▪ Kwembula buntfu baNkulunkulu Jehova Endzabeni yekufundzisa labanye ngaJehova, kute umuntfu lokufanelekela kancono kwendlula iNdvodzana yakhe, lenguJesu Khristu. Njengobe ‘alitubulo layo yonkhe indalo,’ Jesu waphila kanye naJehova ezulwini sikhatsi lesidze kwendlula nanobe ngusiphi lesinye sidalwa semoya. (Kholose 1:15) Cabanga ngematfuba labenawo ekucondza kucabanga kwaBabe wakhe kanye nekufundza ngentsandvo, timiso, kanye netindlela taKhe.

Jesu abengasho kufanele kutsi: “Kute lowatiko kutsi iNdvodzana ingubani ngaphandle kweYise, kantsi kute lowatiko kutsi uYise ngubani ngaphandle kweNdvodzana nalabo iNdvodzana lefuna kumbonakalisa kubo.” (Lukha 10:22) Ngesikhatsi aphila emhlabeni njengemuntfu, Jesu abekulungele futsi akujabulela kwembula buntfu baBabe wakhe. Indlela Jesu labefundzisa futsi akhuluma ngayo beyehlukile, ngobe abechaza tintfo latibona ngemehlo akhe ngesikhatsi asezulwini futsi akanye naNkulunkulu Losetikwako Konkhe.—Johane 8:28.

Loko Jesu lakwenta nakembula Babe wakhe kungafananiswa nemsebenti wethransifoma (sigubhu sagesi). Lesigubhu sehlisa emandla agesi, kute bantfu bakwati kuwusebentisa. Ngesikhatsi asemhlabeni, Jesu watsatsa loko labekufundze ezulwini ngaBabe wakhe wakufundzisa ngendlela bantfu basemhlabeni labebatawukucondza ngayo futsi bakwati kukusebentisa.

Cabanga ngetindlela letimbili letibalulekile Jesu lamembula ngato Babe wakhe.

▪ Ngetimfundziso takhe, Jesu wenta bantfu balati liciniso ngaJehova—lokufaka ekhatsi libito, injongo, kanye netindlela takhe.—JOHANE 3:16; 17:6, 26.

▪ Ngetento takhe, Jesu wembula tici letinhle tebuntfu baJehova. Wabuveta ngalokuphelele buntfu baBabe wakhe, kwate kwafanana nekutsi utsi: ‘Nangabe ufuna kwati kutsi Babe unjani, buka mine.’—JOHANE 5:19; 14:9.

Iyasimangalisa indlela Jesu labephila ngayo. Singazuza kakhulu nasihlola sizatfu sekufa kwakhe, bese siphila ngekuvumelana naloko lesikufundzako.

[Umbhalo longentansi]