BOEMO boo Jesu a buileng mantsoe ana a le ho bona bo senola ho hongata ka seo a neng a amehile ka sona haholo bophelong. Jesu le barutuoa ba hae ba ne ba qetile nako ea hoseng kaofela ba ntse ba tsamaea sebakeng se lithaba sa Samaria. (Johanne 4:6, NW, mongolo o botlaaseng ba leqephe) Barutuoa ba hae ba ile ba nahana hore Jesu o se a lapile, eaba ba mo botsa hore na ba mo fe lijo. (Johanne 4:31-33) Ha Jesu a ba araba, o ile a akaretsa seo ha e le hantle e neng e le morero oa hae bophelong. O ne a nka ho etsa mosebetsi oa Molimo e le habohlokoa ho feta ho ja. Ka mantsoe le ka liketso, Jesu o ile a phelela ho etsa thato ea Molimo. See se ne se akarelletsa eng?

Ha Bibele e hlalosa mosebetsi oo Jesu a neng a o etsa bophelong, e re: “A potoloha ho pholletsa le Galilea eohle, a ruta . . . le ho bolela litaba tse molemo tsa ’muso.” (Matheu 4:23) Jesu o ne a sa bolele feela, kapa hona ho phatlalatsa ’Muso oa Molimo. O ne a boetse a ruta batho—ke hore o ne a ba rupela, a ba hlalosetsa a bile a ba fa mabaka a utloahalang a ka ba kholisang. Molaetsa oa Jesu o ne o bua ka ’Muso.

Nakong eohle ea tšebeletso ea hae, Jesu o ile a ruta bamameli ba hae hore na ’Muso oa Molimo ke eng le hore na o tla etsa eng. Ela hloko lintho tse latelang tseo e leng ’nete ka ’Muso oo, hammoho le Mangolo a bontšitsoeng ao ho ’ona Jesu a buang ka ’Muso oo.

• ’Muso oa Molimo ke puso ea leholimong ’me Jehova o khethile Jesu hore e be Morena oa oona.—MATHEU 4:17; JOHANNE 18:36.

• ’Muso oo o tla halaletsa lebitso la Molimo ’me o etse hore thato ea hae e etsoe lefatšeng joaloka leholimong.—MATHEU 6:9, 10.

• Ha ’Muso oa Molimo o se o busa, lefatše lohle le tla fetoha paradeise.—LUKA 23:42, 43.

• ’Muso oa Molimo o se o le haufi le ho fihla ’me o tla phetha thato ea Molimo lefatšeng. *—MATHEU 24:3, 7-12.

Ka ho khetheha, Jesu o ne a tsejoa e le “Mosuoe.” (Johanne 13:13) Leha ho le joalo, lilemong tse tharo le halofo tseo a li phetseng lefatšeng, o ile a etsa le mesebetsi e mengata e tsotehang. Mesebetsi eo e ile ea phetha bonyane merero e ’meli. Oa pele, e ne e paka hore ka sebele o ne a romiloe ke Molimo. (Matheu 11:2-6) Oa bobeli, e ne e fana ka leseli la hore na ha e se e le Morena oa ’Muso oa Molimo o tla etsetsa moloko oohle oa batho eng. Hlokomela e meng ea mehlolo eo a ileng a e etsa.

• O ile a khutsisa leoatle le neng le loebehlana hammoho le lifefo tse matla.—MAREKA 4:39-41.

• O ile a folisa ba kulang, ho akarelletsa le ba sa boneng, ba sa utloeng le ba holofetseng.—LUKA 7:21, 22.

• O ile a atisa lijo, eaba o fepa matšoele a neng a lapile.—MATHEU 14:17-21; 15:34-38.

• O ile a tsosa bafu bonyane ka makhetlo a mararo.—LUKA 7:11-15; 8:41-55; JOHANNE 11:38-44.

U se u ka inahanela hore na bophelo bo tla ba joang lefatšeng ha Morena ea matla joalo e se e le eena ea busang!

Ha ho tluoa tabeng ea ho ruta ba bang ka Jehova, ha ho motho ea tšoanelehang ho feta Mora oa Molimo, ea ileng a tsejoa e le Jesu Kreste. Kaha ke “letsibolo la pōpo eohle,” Jesu o ile a phela le Jehova leholimong nako e telele ho feta sebōpuoa leha e le sefe se seng sa moea. (Bakolose 1:15) Nahana feela hore na o ile a ba le monyetla o mokaakang oa ho ithuta tsela eo Ntate oa hae a neng a nahana ka eona le ho ithuta thato ea Hae, melao ea hae le litsela tsa hae!

Ke ka nepo Jesu a ileng a re: “Ha ho ea tsebang hore na Mora ke mang haese Ntate; ’me ha ho ea tsebang hore na Ntate ke mang, haese Mora, le eo Mora a ratang ho mo senolela eena.” (Luka 10:22) Ha Jesu a le lefatšeng mona, ka ho ithatela le ka cheseho o ile a senola hore na Ntate oa hae o joang. Jesu o ne a bua a bile a ruta ka tsela e ikhethang; o ne a hopola seo a ithutileng sona ha a ne a le leholimong, sebakeng se phahameng seo Molimo ea Phahahameng ka ho Fetisisa a leng ho sona.—Johanne 8:28.

Seo Jesu a se entseng ha a senola Ntate oa hae se ka tšoantšoa le seo transformer e se etsang ka motlakase. Transformer e nka motlakase o nang le matla a maholo ebe e theola matla ao hore o tle o khone ho sebelisoa ke motho e mong le e mong. Ha Jesu a ne a le lefatšeng, o ile a nka seo a ithutileng sona ho Ntate oa hae ha a ne a le leholimong eaba o se fetisetsa ho batho lefatšeng ka tsela eo ba neng ba ka e utloisisa le ho e sebelisa habonolo.

Nahana ka litsela tse peli tsa bohlokoa tseo Jesu a ileng a senola Ntate oa hae ka tsona.

• Ha Jesu a ruta, o ile a tsebahatsa ’nete ka Jehova—lebitso la Hae, morero oa hae le litsela tsa hae.—JOHANNE 3:16; 17:6, 26.

• Liketso tsa Jesu li ile tsa bontša litšobotsi tse ngata tse babatsehang tseo Jehova a nang le tsona. Jesu o ne a bonahatsa botho ba Ntate oa hae ka ho phethahetseng hoo ha e le hantle, a neng a ka re: ‘Haeba le batla ho tseba hore na Ntate oa ka o joang, shebang ’na.’—JOHANNE 5:19; 14:9.

Tsela eo Jesu a phetseng ka eona ea tsoteha! Re ka rua molemo o moholo haeba re hlahloba hore na ke hobane’ng ha a ile a shoa, le haeba re etsa lintho tumellanong le seo re ithutileng sona.