Yesuusa—I Ayba Ogiyan Deˈidee?

“Ta qumai tana kiittidaagee koyiyoobaa oottanaagaanne a oosuwaa polanaagaa.”—YOH. 4:34.

QOMMOORA deˈiya qaalaa Yesuusi haasayido wode deˈiya hanotay, i ba deˈuwan xeelaa wottidoy aybiinakko loyttidi qonccissees. Yesuusinne i erissiyo ashkkarati guuraappe doommidi gallassi gakkanau deretiya, Samaariyaa biittan hemettiiddi takkidosona. (Yoh. 4:6) Erissiyo ashkkarati Yesuusi he wode namisettiis gi qoppidi, ayyo qumaa immidosona. (Yoh. 4:31-33) Yesuusi etau zaarido zaaruwan, ba deˈuwan xoqqu ootti xeelliyoobaa yootiis. Xoossaa oosuwaa oottiyoogee au qumaa miyoogaappekka aadhidi keehi koshshiyaaba. Yesuusi yootidonne oottido ubbaban, Xoossaa sheniyaadan deˈiis. Hegee ay gujjii?

▪ Xoossaa Kawotettaabaa sabbakiyoogaanne tamaarissiyoogaa Yesuusi ba deˈuwan keehi xoqqu oottidi xeelliyo oosuwaara gayttidaagan Geeshsha Maxaafay, ‘Yesuusi tamaarissiiddinne kawotettaa wonggeliyaa mishiraachuwaa yootiiddi Galiila biitta ubban yuuyiis’ yaagees. (Maa. 4:23) Yesuusi Xoossaa Kawotettaabaa haratuyyo sabbakidi aggiigibeenna. Asaa tamaarissiis; giishin yootidobaa qonccissiisinne ammanttiya ogiyan yootiis. Yesuusa timirttiyau ayfe yohoy Xoossaa Kawotettaa.

Yesuusi haggaazido wode ubban, bana ezggiyaageetuyyo Xoossaa Kawotettay aybakko, qassi he Kawotettay ay polanaakko tamaarissiis. Kawotettaa xeelliyaagan kaallidi deˈiya tumaanne hegaara gayttidaagan Yesuusi yootido qofaa oyqqida xiqiseta akeekite.

▪ Xoossaa Kawotettay saluwan deˈiya ayso; qassi Yesuusi he Kawotettau Kawo gidanaadan Yihooway sunttiis.—MAA. 4:17; YOH. 18:36.

▪ He Kawotettay Xoossaa sunttay anjjettanaadan, qassi Xoossaa shenee saluwan hanidoogaadan saˈankka hananaadan oottees.—MAA. 6:9, 10.

▪ Xoossaa Kawotettaa haaruwan kumetta saˈay gannate gidana.—LUQ. 23:42, 43.

▪ Xoossaa Kawotettay mata wode yiidi, Xoossay saˈau halchidobaa polana. *—MAA. 24:3, 7-12.

▪ Maalaalissiyaabaa oottiyoogaa Yesuusi waannatidi erettiyoy ‘Tamaarissiyaagaa’ gidiyoogaana. (Yoh. 13:13) Gidikkokka, ba haggaazido heezzu layttanne baggan maalaalissiya darobaakka oottiis. He maalaalissiya oosoti guuxxiis giishin naaˈˈubau maaddidosona. Koyruwan, i tumuppe Xoossay kiittin yiidoogaa akeekanaadan maaddidosona. (Maa. 11:2-6) Naaˈˈanttuwan, i Xoossaa Kawotettaa Kawo gidiyoogaadan, sinttappe ubba aahuwan ay polanaakko qonccissidosona. I oottido maalaalissiyaabatuppe amaridaageeta akeekite.

▪ Beetay coˈˈu gaanaadan, qassi carkkoy woppu gaanaadan oottiis.—MAR. 4:39-41.

▪ Qooqeta, tulletanne wobbeta gujjin, hargganchata pattiis.—LUQ. 7:21, 22.

▪ Qumay daranaadan oottidi, namisettida daro asaa miziis.—MAA. 14:17-21; 15:34-38.

▪ Guuxxiis giishin heezzu wodetun, hayqqidaageeta denttiis.—LUQ. 7:11-15; 8:41-55; YOH. 11:38-44.

 Hegaa mala wolqqaama Kawuwaa haaruwan saˈan deˈoy ay mala gidanaakko qoppite!

▪ Xoossaa Yihoowa Eeshshaa Qonccissiyoogaa Yihoowabaa harata tamaarissiyoogaara gayttidaagan, Yesuus Kiristtoosa geetettida Xoossaa Naˈaagaadan gidaa kunttiyay baawa. Yesuusi “merettidabaa ubbaappe aadhdhiya baira Na7a” gidiyoogaadan, hara ayyaana mereta ubbaappe keehi daro wodiyaa Yihoowaara issippe saluwan deˈiis. (Qol. 1:15) I ba Aawaa qofaa akeekanau, qassi a sheniyaa, a maaraanne a ogiyaa tamaaranau demmido injjiyaa qoppite.

Yesuusi, “Aawaappe harai ooninne Na7ai oonakko erenna; Na7aappenne Na7ai Aawaa bessanau koyiyo asatuppe attin, harai ooninne Aawai oonakko erenna” yaagidoogee bessiyaaba. (Luq. 10:22) Yesuusi saˈan deˈido wode, ba Aawaa oonatettaa ufayssan, ubba yeemottidi qonccissiis. Yesuusi bayyo deˈiya dumma eraa goˈettidi yootiisinne tamaarissiis; ayyaana alamiyan, Ubbaappe Xoqqiya Xoossay deˈiyo boncho sohuwan i deˈiyo wode eridobaa hassayidi tamaarissiis.—Yoh. 8:28.

Yesuusi ba Aawaa qonccissanau oottidobaa, transformer geetettiyaabay oottiyooban leemisana danddayettees. Transformeree wolqqaama gidida korinttiyaa wolqqaa, asay goˈettana danddayiyo sima wolqqau laammees. Yesuusi saluwan deˈiiddi ba Aawaabaa eridobaa, asay metootennan akeekanaunne oosuwan peeshshanau danddayiyo ogiyan saˈan deˈiyo wode qonccissiis.

Yesuusi ba Aawaa qonccissido naaˈˈu waanna ogeta qoppite.

▪ Yesuusi ba tamaarissidoban Yihoowa xeelliyaagan tumay, giishin a sunttay, a halchoynne a ogee erettanaadan oottiis.—YOH. 3:16; 17:6, 26.

▪ Yesuusi ba oottidoban maalaaliya Yihoowa eeshshata darota qonccissiis. Yesuusi ba Aawaa eeshshaa polo ogiyan qonccissido gishshau, ‘Ta Aaway ay malakko eranau koyikko tana beˈite’ giyoogaa malabaa yootiis.—YOH. 5:19; 14:9.

Yesuusi deˈido ogee nuuni maalaalettanaadan oottees. I aybissi hayqqidaakko pilggikko, qassi nuuni tamaaridobaara moggiyaabaa oottikko keehippe goˈettana danddayoos.

[Tohossa qofaa]