INI nga mga pulong ni Jesus nagpapakita han iya prayoridad. Han iginyakan niya ito, nagbibiyahe hiya ngan an iya mga disipulo ha kabungtoran han Samaria ha bug-os nga aga. (Juan 4:6) Tungod kay naghunahuna an mga disipulo nga gutom na hi Jesus, gintanyagan nira hiya hin pagkaon. (Juan 4:31-33) Sugad nga baton, iginsumat niya an katuyoan han iya kinabuhi. Para ha iya, mas importante an pagbuhat han buruhaton han Dios kay ha pagkaon. Ha pulong ngan ha buhat, nagkinabuhi hi Jesus basi buhaton an kaburut-on han Dios para ha iya. Ano an pipira han iya ginbuhat?

Iginsaysay han Biblia an nagin kinabuhi ni Jesus. Hiya “naglibot han bug-os nga Galilea, nga nanunutdo . . . ngan nagwawali han maopay nga sumat han ginhadian.” (Mateo 4:23) Diri hiya basta la nga nagsangyaw o nagpasamwak hito nga mensahe. Nagtutdo liwat hiya—karuyag sidngon, naghatag hin instruksyon, nagsaysay, ngan nagkombinse pinaagi hin maopay nga pangatadongan. An Ginhadian an tema han iya mensahe.

Ha bug-os nga ministeryo ni Jesus, igintutdo niya kon ano an Ginhadian han Dios ngan kon ano an hihimoon hito. Tagda an masunod nga kamatuoran mahitungod han Ginhadian pati an mga teksto diin mababasa an mga pulong ni Jesus may kalabotan hito.

• An Ginhadian han Dios usa nga langitnon nga gobyerno, ngan hi Jesus an igintoka ni Jehova sugad nga Hadi.—MATEO 4:17; JUAN 18:36.

• An Ginhadian magbabaraan han ngaran han Dios ngan magpapahinabo han Iya kaburut-on dinhi ha tuna sugad ha langit.—MATEO 6:9, 10.

• Ha pagmando han Ginhadian han Dios, an bug-os nga tuna magigin paraiso.—LUKAS 23:42, 43.

• Hirani na umabot an Ginhadian han Dios ha pagtuman han kaburut-on han Dios dinhi ha tuna. *—MATEO 24:3, 7-12.

Mas kilala gud hi Jesus sugad nga “Magturutdo.” (Juan 13:13) Kondi, durante han iya tulo ngan tunga ka tuig nga pagministeryo, nagbuhat liwat hiya hin mga milagro nga nakahimo hin diri maminos duha nga katuyoan. Siyahan, nagpamatuod ito nga sinugo hiya han Dios. (Mateo 11:2-6) Ikaduha, iginpakita hito kon ano an iya labaw nga hihimoon sugad nga Hadi ha Ginhadian han Dios ha tidaraon. Ini an pipira han iya milagro.

• Nagpakalma han mabalud nga dagat ngan nagpaundang han makusog nga hangin.—MARKOS 4:39-41.

• Nagtambal han magsakit, pati han mga buta, bungol, ngan piang.—LUKAS 7:21, 22.

• Nagpadamu hin pagkaon basi makakaon an damu nga nagugutom.—MATEO 14:17-21; 15:34-38.

• Nagbanhaw hin patay ha diri maminos tulo ka beses.—LUKAS 7:11-15; 8:41-55; JUAN 11:38-44.

Handurawa an magigin kinabuhi ha tuna kon magmando na iton gamhanan nga Hadi!

May kalabotan ha pagtutdo mahitungod kan Jehova, waray mas kwalipikado kay han kalugaringon nga Anak han Dios. Sugad nga “an siyahan nga natawo han ngatanan nga mga binuhat,” nag-eksister na hi Jesus ha langit kaupod ni Jehova hin mas maiha kay ha iba nga espiritu nga linarang. (Kolosas 1:15) Hunahunaa an damu nga higayon diin masusubad niya an panhunahuna han iya Amay ngan mahibaro han Iya kaburut-on, suruklan, ngan pamaagi.

Makatadunganon nga hi Jesus nakasiring: “Waray usa nga nakilala kon hin-o an Anak, kondi an Amay; ngan kon hin-o an Amay, kondi an Anak; ngan ha kan kanay an Anak naruyagan pagpahayag ha iya.” (Lukas 10:22) Han nakanhi hi Jesus ha tuna sugad nga tawo, disidido ngan kinaburut-on nga iginpakilala niya an personalidad han iya Amay. Naiiba an iya mga pulong ngan pagtutdo kay iginbasar niya ito ha iya nahihinumdoman han nakadto pa hiya ha langit ngan ha mahimayaon nga presensya han Gihitaasi nga Dios.—Juan 8:28.

An pagpakilala ni Jesus han iya Amay maipapariho ha nahihimo han transpormer. Ginkukombirte han transpormer an hitaas nga boltahe ngadto ha mas hamubo basi magamit han ordinaryo nga mga tawo. Han nakanhi hi Jesus ha tuna, igintutdo niya an iya nahibaroan mahitungod han iya Amay ha paagi nga masayon masabtan ngan maiaplikar han minos nga mga tawo.

Tagda an duha nga importante nga paagi kon paonan-o iginpakilala ni Jesus an iya Amay.

• Igintutdo ni Jesus an kamatuoran mahitungod kan Jehova—an Iya ngaran, katuyoan, ngan pamaagi.—JUAN 3:16; 17:6, 26.

• Pinaagi han mga buhat ni Jesus, iginpakita niya an mag-opay nga personalidad ni Jehova. Makikita gud mismo ha iya an personalidad han iya Amay, salit sugad hin hiya nasiring: ‘Kon karuyag niyo hibaroan an personalidad han akon Amay, kitaa niyo ako.’—JUAN 5:19; 14:9.

Bilib gud kita ha paagi han pagkinabuhi ni Jesus. Daku gud an aton mapapahimulosan kon uusisahon naton kon kay ano nga hiya namatay, ngan kon iaaplikar naton an aton hinbaroan.