YESU Wai Gako Raka Adu

“Gi riahe nga manga kina gu pai gu ko akpi nyemu he nakedi re, mi nyasi gako sunge.”​—YOANE 4:34.

GU REGBO Yesu ape gupai du kuari re nayugo pa gupai ko anaaberãpaha gbe rogo gako raka. Yesu na gako bawiriki aata rogo ringara Somorona tona wiso ki da ku bebere uru. (Yoane 4:6) Wa gako abawiriki abi gupai nga ka gomoro ima tona mangako, i afu riahe fuko. (Yoane 4:31-33) Yesu akaragapai fuyó na gu fugo nayugu gupai paha anyaki fuko gbe rogo gako raka. Tipa ko, manga ga Mbori sunge paha anyaki gbe kisusi ririahe. Ga Yesu afugo na gako mangaapai ayugu gupai nga manga gupai Mbori akpinyemuhe paha anyaki fuko gbe. Gini apai du ko amangihe?

▪ Tungusapai na yugopai tipa ga Mbori Kindo Ziazia Kekeapai nagumbapa gu sunge Yesu aamangaha kini yaa: “Yesu ki ta ata rogo Gariraya yo kirikiri dunduko niyugu pai, . . . nitungusi pa gu wene pangbanga nga ga ngbi.” (Matayo 4:23) Yesu aatungusanga kina tungusapa ga Mbori Kindo gbua fu aboro te. Ko aayugopai ayugo a fu aboro, kini sakirogoyo fuyó i rugutiyo nani. Ga Mbori Kindo nangia guhe Yesu anaatungusapai tipaha.

Rogo ga Yesu sunge naabaha, ko ayugu guhe fu aboro nga ga Mbori Kindo na agu apai si nika mangaha. Oni bingo agi apai ko ayuguhe tipa ga Mbori Kindo re.

▪ Ga Mbori Kindo nga ndikidi zogarago nga ga ngbangbaturũ, na Yesu nga gu boro Yekova nasia ni nibakindo.​—MATAYO 4:17; YOANE 18:36.

▪ Ga Mbori Kindo nika sa rimo Mbori si du niʹirisiʹirisihe na ki sa gupai ko akpinyemuhe si mangi auru kpotosende a wa duhe ngbangbaturũ yo.​—MATAYO 6:9, 10.

▪ Gu regbo Yesu nika tona zogarago ku auru kpotosende, kpotosende naabaha i nika saha niparadizo.​—RUKA 23:42, 43.

▪ Ga Mbori Kindo ima mbeda ka ye ka manga gupai Mbori akpinyemuhe auru kpotosende. *​—MATAYO 24:3, 7-12.

▪ Manga iiriwoapai Aboro aini Yesu gbe ni “Bayugupai.” (Yoane 13:13) Ono tie, ti regbo gu gako sunge ko amangihe tipa agarã biata na beberehe, ko aima manga dungu iiriwoapai a. Yesu amangi iiriwoapai ti ni. Bambataha nga, gu iiriwoapai re asa aboro i ini gupai nzunzu nga Mbori nakedi ko. (Matayo 11:2-6) Uepai nga, si ayugu kpia gu bakereapai Yesu nika mangaha kumbatayo nibakindo ga Mbori Kindo. Oni bingo bete gu iiriwoapai ko amangihe.

▪ Ko arugusi sungburosungburo baime na ki rugusi bayuge.​—MARAKO 4:39-41.

▪ Ko ahusi aborokaza, aguyo angia airavurari, airangbiängä, na gbarigbari aboro.​—RUKA 7:21, 22.

▪ Ko akiisi tooni riahe tipa ka riga ndurumo aboro nani.​—MATAYO 14:17-21; 15:34-38.

 ▪ Ko azingisi kangba aboro biata bekpio nga gu du paha nikekehe rogo Ziazia Kekeapai.​—RUKA 7:11-15; 8:41-55; YOANE 11:38-44.

Oni berẽnga pa wai raka nikadu ho ga Yesu zogarago nika tona ni ku auru kpotosende!

▪ Yugo Yekova Mbori fu aboro Boro ho rengbe ka yugopai tipa Yekova Mbori wenengai susi Wiriko nga Yesu Kristo te. Wangia Kristo “bambata vungu fu agu ahe dũ i afu,” ko araki na Bako ngbangbaturũ yo tipa bagbanga regbo susi kura amaraika dunduko. (AKorosaio 1:15) Ko adu na momu beko ka wirika asino Bako na gupai ko akpinyemuhe gbiati gako agene.

Si du Yesu aya ti ni wee: “A nga boro sa ini da nga Wiri te, kina Mbori nga Ba; na da nga Ba, kina Wiriko ini he, na gu ni Wiriko nakpi nyemu ka yugo ho fu ni.” (Ruka 10:22) Ho Yesu aduni auru kpotosende, ko ayugupa Bako fu aboro wenengai. Yesu ayugu agu apai fu aboro tipa Mbori ko awirikihe ngbangbaturũ yo barabangiri Guko Nga Bahe Kisusi.​—Yoane 8:28.

Ho Yesu aduni auru kpotosende, ko adi agu apai ko awirikihe ngbangbaturũ yo kini yuguhe ngba gu gene aboro arengbe arengba ka giarogoyo na ki mangipai sani niipo.

Ani bingo gu nyanyakipa agene ue Yesu ayugu Bako ngbaha.

▪ Rogo ga Yesu yugopai yo, ko ayugu gu rengo du tipa Yekova​—tipa rimoko, gako ringbisapai, na gako agene.​—YOANE 3:16; 17:6, 26.

▪ Yesu ayugu dungu asino Yekova rogo gako mangaapai yo. Yesu aduna kina agu asino tiko nadu ti Bako si du ko aya ti ni wee: “Guni bi re ni bi Buba.”​—YOANE 5:19; 14:9.

Kina ngbarani nazera ka inopa gu raka Yesu arakihe. Na ka ani wisigi ndu gupai ko akpi ti ni, ani ki mangipai ringbisihe kuti agu apai ani nawirikihe, ani gbia bakere undo agbia.

[Gu rukutu kekeapai du bandu kpewaraga yo]