JESUS het geweet wat om te verwag. Hy het verstaan dat hy nie ’n vreedsame lewe sou hê nie. Inteendeel, hy was bewus dat sy lewe tragies kortgeknip sou word terwyl hy nog in sy 30’s was, en hy was heeltemal voorbereid op sy dood.

Die Bybel heg groot betekenis aan Jesus se dood. Een naslaanwerk sê dat die Christelike Griekse Geskrifte, of Nuwe Testament, sowat 175 keer direk verwys na die dood van Jesus. Maar waarom moes Jesus ly en sterf? Ons moet dit weet, want Jesus se dood kan ’n groot uitwerking op ons lewe hê.

Gedurende die laaste jaar van sy lewe het Jesus sy dissipels etlike kere gewaarsku oor die lyding en dood wat op hom gewag het. Op pad na Jerusalem om sy laaste Pasga te vier, het hy vir sy 12 apostels gesê: “Die Seun van die mens sal aan die hoofpriesters en die skrifgeleerdes oorgelewer word, en hulle sal hom ter dood veroordeel en hom aan mense van die nasies oorlewer, en hulle sal met hom die spot dryf en sal op hom spoeg en hom gesel en hom doodmaak” (Markus 10:33, 34). * Waarom was hy so seker oor wat met hom sou gebeur?

Jesus was vertroud met al die profesieë in die Hebreeuse Geskrifte wat voorspel het hoe sy lewe sou eindig (Lukas 18:31-33). Kyk na party van die profesieë saam met die teksverwysings wat verduidelik hoe dit vervul is.

Die Messias sou . . .

• Vir 30 silwerstukke verraai word.—SAGARIA 11:12; MATTEUS 26:14-16.

• Geslaan word en op gespoeg word.—JESAJA 50:6; MATTEUS 26:67; 27:26, 30.

• Aan ’n paal gehang word.—PSALM 22:16, voetnoot in NW; MARKUS 15:24, 25.

• Bespot word terwyl hy aan die paal hang.—PSALM 22:7, 8; MATTEUS 27:39-43.

• Tereggestel word sonder dat enige van sy bene gebreek word.—PSALM 34:20; JOHANNES 19:33, 36.

Hierdie en baie ander profesieë is in Jesus vervul. Hy sou dit geensins op sy eie kon gedoen het nie. Die feit dat al hierdie profesieë in Jesus vervul is, toon dat hy inderdaad deur God gestuur is. *

Maar waarom moes Jesus ly en sterf?

Jesus was bewus van die geskille van universele belang wat in die tuin van Eden geopper is. Adam en Eva is deur ’n opstandige geesskepsel beïnvloed en het gekies om ongehoorsaam aan God te wees. Die egpaar se opstand het die regmatigheid van God se soewereiniteit, of manier van regeer, in twyfel getrek. Hulle sonde het ook die vraag laat ontstaan of enige mens onder beproewing aan God getrou sou bly.—Genesis 3:1-6; Job 2:1-5.

Jesus het die oortuigendste antwoord  moontlik op albei geskille—Jehovah se soewereiniteit en die mens se onkreukbaarheid—voorsien. Deur “tot in die dood . . . aan ’n folterpaal” volmaak gehoorsaam te bly, het Jesus God se soewereiniteit ondersteun (Filippense 2:8). Jesus het ook bewys dat ’n volmaakte mens volmaakte onkreukbaarheid teenoor Jehovah kan handhaaf ten spyte van die ergste beproewinge.

Die profeet Jesaja het voorspel dat die beloofde Messias se lyding en dood versoening vir mense se sondes sal voorsien (Jesaja 53:5, 10). Jesus het dit duidelik verstaan, en hy het gewilliglik “sy siel [gegee] as ’n losprys in ruil vir baie” (Matteus 20:28). Sy offerdood het dit vir onvolmaakte mense moontlik gemaak om ’n goeie verhouding met Jehovah te hê en om van sonde en die dood bevry te word. Jesus se dood bied ons die geleentheid om terug te kry wat Adam en Eva verloor het—die vooruitsig om vir ewig onder volmaakte toestande op die aarde te lewe. *—Openbaring 21:3, 4.

In hierdie reeks artikels het ons gesien wat die Bybel oor Jesus sê—waar hy vandaan gekom het, hoe hy gelewe het en waarom hy gesterf het. Kennis van hierdie waarhede oor Jesus kan meer doen as om wanopvattings omtrent hom uit die weg te ruim. As ons in ooreenstemming daarmee optree, kan dit seëninge meebring—’n beter lewe nou en ewige lewe in die toekoms. Die Bybel sê vir ons wat ons moet doen om hierdie seëninge te geniet.

• Leer meer oor Jesus Christus en sy rol in Jehovah se voorneme.—JOHANNES 17:3.

• Beoefen geloof in Jesus en toon deur jou lewenswyse dat jy hom as jou Redder aanneem.—JOHANNES 3:36; HANDELINGE 5:31.

Jehovah se Getuies sal jou graag help om meer te leer oor Jesus Christus, die “enigverwekte Seun” van God, deur wie ons die gawe van “die ewige lewe” kan kry.—Johannes 3:16.