Zezi​—Akoz i ti mor?

“Fis-de-Lonm [in vin] . . . pour donn son lavi konman en pri pour liberasyon bokou dimoun.”​—MARK 10:45.

ZEZI ti konnen ki pou ekspekte. I ti konnen ki i pa ti pou viv en lavi anpe. O kontrer, i ti realize ki i ti pou fer fas avek en lanmor trazik kan i ti pou ankor dan son trant an e i ti pare pour fer fas avek lanmor.

Labib i met bokou lenportans lo lanmor Zezi. En liv referans i dir ki Lekritir Grek Kretyen oubyen Nouvo Testaman i mansyonn lanmor Zezi direkteman apepre 175 fwa. Me akoz Zezi ti bezwen soufer e mor? Nou bezwen konnen parski lanmor Zezi i kapab annan en gran lefe lo nou lavi.

▪ Sa ki Zezi ti ekspekte Pandan dernyen lannen son lavi lo later, Zezi ti plizyer fwa dir avek son bann disip ki i ti pou bezwen soufer e mor. Kan i ti pe al Zerizalenm pour selebre Lapak pour en dernyen fwa, i ti dir avek son 12 zapot: “Fis-de-Lonm pou ganny livre avek bann sef-pret ek bann profeser lalwa, e zot pou kondann li a-mor e livre li avek bann payen. Zot pou monk li, kras lo li, fwet li, e touy li.” * (Mark 10:33, 34) Akoz i ti sitan asire ki sa ti pou arive avek li?

Zezi ti familye avek tou sa bann profesi dan Lekritir Ebre ki ti predir lafason ki son lavi ti pou fini. (Lik 18:31-33) Annou vwar serten sa bann profesi ek bann referans dan Labib ki eksplik lafason ki zot ti ganny akonplir.

Mesi ti pou ganny . . .

▪ Trai pour 30 pyes larzan.​—ZEKARYA 11:12; MATYE 26:14-16.

▪ Tape e zot ti pou kras lo li.​—IZAI 50:6; MATYE 26:67; 27:26, 30.

▪ Kloute lo poto.​—PSONM 22:16, not anba paz; MARK 15:24, 25.

▪ Ensilte kan i ti lo poto.​—PSONM 22:7, 8; MATYE 27:39-43.

▪ Touye san ki son lezo i ganny kase.​—PSONM 34:20; ZAN 19:33, 36.

Zezi ti akonpli sa bann profesi ek bokou lezot ankor. Napa okenn fason ki i ti pou’n kapab fer sa lo li menm. Vi ki tou sa bann profesi in akonpli lo li, sa i montre ki i’n vreman ganny anvoye par Bondye. *

Me akoz i ti neseser pour Zezi soufer e mor?

▪ Zezi ti mor pour donn larepons de kestyon enportan Zezi ti konn byen sa de kestyon enportan ki ti ganny souleve dan Zarden Edenn, kestyon ki konsern tou liniver. Adan ek Ev ti ganny enfliyanse par en move lanz e zot ti swazir pour dezobeir Bondye. Zot rebelyon ti montre ki zot ti pe kestyonn drwa Zeova pour dirize oubyen fason ki i dirize. Sa ti osi soulev sa kestyon: Eski i posib pour en imen reste fidel avek Bondye kan i dan leprev?​—Zenez 3:1-6; Zob 2:1-5.

 Zezi ti donn pli bon larepons posib pour tou le de kestyon: Drwa Zeova pour dirize ek lentegrite imen. Atraver son lobeisans parfe “ziska lanmor,” Zezi ti siport drwa Bondye pour dirize. (Filipyen 2:8) Zezi ti osi donn laprev ki en zonm parfe i kapab gard son lentegrite parfetman avek Zeova menm dan bann leprev pli difisil.

▪ Zezi ti mor pour liber limanite Profet Izai ti predir ki Mesi ti pou soufer e mor pour ki pese bann dimoun i ganny pardonnen. (Izai 53:5, 10) Zezi ti byen konpran sa e i ti pare pour “donn son lavi konman pri pour liberasyon bokou dimoun.” (Matye 20:28) Zezi ti sakrifye son lavi afen ki bann imen enparfe i kapab annan en bon relasyon avek Zeova e ki zot ganny libere dan pese ek lanmor. Lanmor Zezi in ofer nou sa loportinite pour reganny sa ki Adan ek Ev ti’n perdi, sa lespwar pour viv pour touzour lo later dan en kondisyon parfe. *​—Revelasyon 21:3, 4.

▪ Ki ou kapab fer Dan sa seri lartik, nou’n egzamin sa ki Labib i dir lo Zezi konsernan kote i ti sorti, ki mannyer i ti viv son lavi e akoz i ti mor. Konn laverite lo Zezi pa vedir zis koriz bann fo konsep lo li. Si nou azir an armoni avek sa laverite, nou pou ganny beni avek en pli meyer lavi la konmela menm e lavi eternel dan lavenir. Labib i dir nou sa ki nou bezwen fer si nou anvi ganny sa bann benediksyon.

▪ Aprann plis lo Zezi Kri ek son rol dan plan Zeova.​—ZAN 17:2, 3.

▪ Met lafwa dan Zezi par montre dan ou fason viv ki ou aksepte li konman ou Sover.​—ZAN 3:36; AKT 5:31.

Temwen Zeova pou byen kontan pour ed ou aprann plis lo Zezi Kri, sa “sel Garson” Bondye atraver ki nou kapab ganny “lavi eternel.”​—Zan 3:16.

[Not anba lo paz]