Jisu Vuna e Mate Kina
Jisu Vuna e Mate Kina
“E lako mai na Luve ni tamata . . . me solia tale ga na nona bula me kedra ivoli na lewe levu.”—MARIKA 10:45.
A KILA o Jisu na veika ena yaco. E kila ni na sega ni vakacegu ena nona bula taucoko. Ia e kila ni na muduki koso vakasakasaka na nona bula ni yabaki tolusagavulu vakacaca, sa tu vakarau tale ga me sotava qori.
Na iVolatabu e tukuna ni bibi dina na mate i Jisu. E kaya e dua na ivola ni voleka ni vakamacalataki vaka175 na mate i Jisu ena iVolatabu vaKirisi vaKarisito se na Veiyalayalati Vou. Na cava me vakararawataki kina o Jisu qai mate? E bibi meda kila qori ni na yaga vakalevu ena noda bula na nona mate.
▪ Ka e kila o Jisu ena yaco Ena iotioti ni yabaki ni nona bula, a vakaroti iratou vakavica na nona tisaipeli o Jisu ni na vakararawataki qai vakamatei. Ena nodratou ilakolako i Jerusalemi me lai solevutaki na iotioti ni Lakosivia, a tukuna vei ratou na 12 na yapositolo: “Ena lai soli na Luve ni tamata vei ira na iliuliu ni bete kei ira na vunivola, era na tauca vua na itotogi mate, era na soli koya vei ira na kai veimatanitu, era na vakalialiai koya, kasiviti koya, kuitataki koya, vakamatei koya.” * (Marika 10:33, 34) A kila vakacava o Jisu na ka ena yaco vua?
A kila vinaka o Jisu e levu na parofisai ena iVolatabu vakaIperiu e tukuna na veika e vauca na nona mate. (Luke 18:31-33) Meda raica mada eso na parofisai kei na tikinivolatabu e vakamacalataka na kena vakayacori.
Na Mesaia ena . . .
▪ Soli ena 30 na tikinisiliva.—SAKARAIA 11:12; MACIU 26:14-16.
▪ Mokulaki qai kasiviti.—AISEA 50:6; MACIU 26:67; 27:26, 30.
▪ Vakoti.—SAME 22:16; MARIKA 15:24, 25.
▪ Vosavakacacataki ni rube ena kaunirarawa.—SAME 22:7, 8; MACIU 27:39-43.
▪ Ena sega ni ramusu e dua na suina ni vakamatei.—SAME 34:20; JONI 19:33, 36.
A vakayacora o Jisu na parofisai qori kei na vuqa tale. E sega ni cakava rawa ena nona kaukaua ga. Na vakayacori ni parofisai kece me baleti Jisu e vakadinadinataka ni talai koya mai na Kalou. *
Na cava me vakararawataki kina o Jisu qai mate?
▪ A mate o Jisu me wali kina eso na ile bibi E kila o Jisu na ile a basika ena were o Iteni, e vauci keda kei ira na agilosi. Erau digia o Atama kei Ivi me rau talaidredre vua na Kalou ni rau vakarorogo vua e dua na agilosi vukitani. Na nodrau talaidredre na veiwatini e vakalewai kina na dodonu se na ivakarau ni nona veiliutaki na Kalou. Na nodrau ivalavala ca e lomatarotarotaki tale ga kina ke dua mada ga na tamata e rawa ni yalodina vua na Kalou ke vakatovolei.—Vakatekivu 3:1-6; Jope 2:1-5.
A vakalasuya o Jisu na ile ruarua e vauca na veiliutaki cecere i Jiova kei na noda yalodina. Na vakasakiti ni nona talairawarawa “me yacova sara na mate . . . ena kaunirarawa” e vakaraitaka ni tutaka na veiliutaki cecere i Jiova. (Filipai 2:8) A vakadinadinataka tale ga o Jisu ni rawa ni yalodina tiko ga e dua e uasivi se mani dredre vakacava na veivakatovolei.
▪ A mate meda vakabulai kina A parofisaitaka na parofita o Aisea ni nona vakararawataki kei na nona mate na Mesaia yalataki e rawa ni vosoti kina na noda ivalavala ca. (Aisea 53:5, 10) Qori e matata vakasigalevu vei Jisu, qai yalorawarawa ni solia “na nona bula me kedra ivoli e lewe levu.” (Maciu 20:28) Ena rawa nida veiwekani vinaka na tamata ivalavala ca kei Jiova ena mate vakaisoro i Jisu da qai vakabulai mai na ivalavala ca kei na mate. E rawa tale ga ni vakalesui vei keda na ka erau vakayalia o Atama kei Ivi—na inuinui ni bula tawamudu ena ituvaki uasivi e vuravura. *—Vakatakila 21:3, 4.
▪ Na ka o rawa ni cakava Ena vica na ulutaga veitaravi qo, eda sa raica kina na ka e tukuna na iVolatabu me baleti Jisu—na vanua e lako mai kina, na ka e cakava, kei na vuna e mate kina. Na noda kila na ka dina me baleti Jisu ena sega wale ga ni kauta laivi na rai cala me baleti koya. Ni salavata na noda ivakarau ni bula kei na ka dina me baleti Jisu, eda na vakalougatataki—ena vinaka na noda bula ena gauna qo da qai bula tawamudu ena gauna se bera mai. Na iVolatabu e tukuna na ka meda cakava meda marautaka kina na veivakalougatataki qori.
▪ Vulica e levu tale na ka me baleti Jisu Karisito kei na nona itavi ena vakayacori ni inaki i Jiova.—JONI 17:3.
▪ Vakabauti Jisu qai vakaraitaka ena ivakarau ni nomu bula ni o ciqomi koya me nomu iVakabula.—JONI 3:36; CAKACAKA 5:31.
Era na marau na iVakadinadina i Jiova mera vukei iko mo vulica e levu tale na ka me baleti Jisu Karisito, na “Luvena e duabau ga” na Kalou eda na rawata ena vukuna na “bula tawamudu.”—Joni 3:16.
[iVakamacala e ra]
^ para. 5 E dau tukuna wasoma o Jisu ni “Luve ni tamata.” (Maciu 8:20) Na vosa qori e dusia ni a mai bula dina vakatamata, ni “luve ni tamata” tale ga e parofisaitaki tu ena iVolatabu.—Taniela 7:13, 14.
^ para. 13 Me ikuri ni ivakamacala me baleta na parofisai a vakayacori vei Jisu, raica na ulutaga “Jisu Karisito—na Mesaia Yalataki” e tiko ena ikuri ni ivola Na Cava Sara Mada e Kaya na iVolatabu? tabaka na iVakadinadina i Jiova.
^ para. 17 Me ikuri ni ivakamacala ena yaga ni nona mate vakaisoro o Jisu, raica na wase 5, “Na Keda iVoli—na iLoloma Uasivi ni Kalou,” ena ivola Na Cava Sara Mada e Kaya na iVolatabu?
