A Zezi: Bõe yĩng t’a ki?

“Ninsaal Biigã . . . waame n na n sõng nebã, la a kõ [a] vɩɩm n yao neb wʋsg yĩnga.”—MARK 10:45.

A ZEZI ra mii bũmb ning sẽn da gũud-a wã. A ra miime t’a pa na n vɩɩmd n kaoos tẽngã zug ye. A ra miime tɩ b na n kʋ-a a yʋʋm 30 la zak sasa, la a ra segla a meng n gũud rẽ.

Biiblã wilgdame t’a Zezi kũumã tara yõod wʋsgo. Sebr a yembr wilgame tɩ Biiblã babg ning b sẽn gʋls ne gɛrkã bɩ Kãab-paalgã pʋgẽ, b gomda a Zezi kũumã yell sẽn na ta naoor 175. Bõe yĩng tɩ b ra segd n nams a Zezi la b kʋ-a woto? D segd n bao n bãnga rẽ, bala a Zezi kũumã tõe n nafa tõnd wʋsgo.

▪ Bũmb ning sẽn da gũud a Zezi: A Zezi yaoolem yʋʋmd tẽngã zugã, a togsa a karen-biisã naoor wʋsg tɩ b na n namsa yẽ n wa baas n kʋ-a. Yẽ ne a karen-biis 12 wã sẽn wa n debd Zerizalɛm n na n tɩ maan a yaoolem Pakã, a yeel-b-la woto: “B na n ninga Ninsaal Biigã maan-kʋʋdbã kãsem dãmbã ne gʋlsdbã nusẽ. La b na n kaoo bãmb bʋʋd tɩ yɩ kũum n ning bãmb bu-zẽms nusẽ tɩ b yaal bãmba, la b tʋbs bãmb kolkoodo, la b pãb bãmb ne kalwaase, la b na n kʋʋ bãmba.” * (Mark 10:33, 34) Bõe yĩng t’a ra zoe n mi bũmb ning sẽn na n paam-a wã vẽeneg woto?

A Zezi mii Biiblã babg ning b sẽn gʋls ne hebre wã bãngr-goam wʋsg sẽn gomd a kũumã sẽn na n yɩ to-to wã yellã sõma. (Luk 18:31-33) D ges bãngr-goam kẽere, la vɛrse rãmb sẽn wilgd b sẽn pids to-to.

B sẽn na n maan Mesi wã bũmb ningã:

▪ B na n zãmb-a lame n koos-a wanzuri ligd pis-tã.—ZAKARI 11:12; MATƖE 26:14-16.

▪ B na n pãb-a lame la b tʋbs-a kolkoodo.—EZAI 50:6; MATƖE 26:67; 27:26, 30.

▪ B na n ka-a-la raoog zugu.—YƖƖL SÕAMYÃ 22:17; MARK 15:24, 25.

▪ B na n yaal-a lame.—YƖƖL SÕAMYÃ 22:8, 9; MATƖE 27:39-43.

▪ B na n kʋ-a lame n pa kaoog a kõbr baa a yembr ye.—YƖƖL SÕAMYÃ 34:21; ZÃ 19:33, 36.

Bãngr-goam kãensã la bãmb wʋsg a taab pidsa a Zezi zugu. A Zezi ra pa tõe n pids rẽ fãa a toor ye. Bãngr-goam kãensã fãa sẽn pids a Zezi zugã wilgdame tɩ sɩd yaa Wẽnnaam n tʋm-a. *

La bõe yĩng tɩ ra yaa tɩlae t’a Zezi nams la a ki?

▪ A Zezi kiime sẽn na yɩl n welg yel-kãsenga: A Zezi ra mii no-koeemd ning sẽn zĩnd Edɛn zẽedã zĩigẽ tɩ pak yĩngr la tẽng zug rãmbã fãa wã. A Ãdem ne a Hawa kelga malɛg-tõat goama, n kɩɩs Wẽnnaam. B kɩɩsgã waa ne sãmb-sãmb ne Wẽnnaam sẽn dɩt a naamã to-to wã sã n zemsame bɩ pa zemse. Leb n waa ne sãmb-sãmb ne ninsaal sã n na n kell n saka Wẽnnaam namsg pʋgẽ bɩ a pa na n sake.—Sɩngre 3:1-6; Zoob 2:1-5.

 A Zezi tõog n welga yel-kãensã b yiibã. A sẽn sak a Zeova hal n ki kũum da-lukã zugã, a wilgame t’a Zeova sẽn dɩt a naamã to-to wã sɩd zemsame. (Filip rãmba 2:8) A Zezi leb n wilgame tɩ ninsaal sẽn zems zãng tõe n kell n saka a Zeova, baa namsgã sẽn yaa to-to fãa.

▪ A Zezi kiime sẽn na yɩl n fãag ãdem-biisã: No-rɛɛs a Ezai ra pĩnd n togsame tɩ Mesi wã namsgã la a kũumã na n kɩtame tɩ ãdem-biisã paam b yel-wẽnã sugri. (Ezai 53:5, 10) A Zezi ra mii rẽ vẽenega, la rẽ kɩtame t’a sak ne yamleoog n kõ a “vɩɩm tɩ yao neb wʋsg yĩnga.” (Matɩe 20:28) A kũumã sẽn yɩ maoongã paka sor tɩ ninsaalbã tõe n paam a Zeova zoodo, la b paam b mens ne yel-wẽndã la kũumã. A Zezi sẽn ki wã leb n kɩtame tɩ tõnd tõe n wa paam bũmb ning a Ãdem ne a Hawa sẽn kongã, rat n yeel tɩ vɩɩm sẽn kõn sa tẽng zug arzãnã pʋgẽ. *—Wilgri 21:3, 4.

▪ Y sẽn segd n maan bũmb ninga: Sõs-kãensã sẽn pʋg taabã pʋsẽ, y yãa Biiblã sẽn yet bũmb ning a Zezi zugu, a sẽn yi zĩig ningã, a sẽn maan bũmb ningã, la a kũumã võore. Woto fãa kɩtame tɩ y bãng a Zezi sõma, la rẽ bal pa sek ye. Y sã n wilg tɩ y tẽeda rẽ, y na n paama barka, rat n yeel tɩ vɩɩm sẽn be bark masã menga, la vɩɩm sẽn kõn sa beoog daare. Biiblã wilgda bũmb ning d sẽn segd n maane, d sã n sɩd rat bark kãensã.

▪ Bao-y n bãng-y yɛl a taab a Zezi Kirist zugu, la tʋʋmd ning a sẽn tar a Zeova raabã pidsg pʋgẽ wã me.—ZÃ 17:3.

▪ Wilg-y tɩ y tẽeda a Zezi, la y wilg y manesmã fãa pʋgẽ tɩ y sakame tɩ yẽ la y fãagda.—ZÃ 3:36; TƲƲMA 5:31.

A Zeova Kaset rãmbã ratame n sõng yãmb tɩ y bãng yɛl a taab Wẽnnaam “Biig sẽn ka to” a Zezi Kirist zugu, a soab ning maasem yĩng d sẽn tõe n paam “vɩɩm sẽn ka sɛtã.”—Zã 3:16.

[Tẽngr not rãmbã]