Gyisɛse—Deɛ Mɔɔ Ɔti Ɔwule
“Medame Sonla Ra . . . membale kɛ mebazonle na meava me ngoane meado aze meakpɔne menli dɔɔnwo.”—MAAKE 10:45.
ƐNEE Gyisɛse ze mɔɔ ɔla ɔ nyunlu la. Ɛnee ɔte ɔ bo kɛ ɔ nzo nu ɛnrɛdwo ye wɔ azɛlɛ ye azo ɛlɛ yɛɛ ɔnrɛyɛ ɛrelera na yeawu. Ɛnee ɔze kɛ bɛbahu ye wɔ mekɛ mɔɔ ɔtɛde kpavolɛ la, noko ɛnee yeziezie ɔ nwo yezie.
Baebolo ne da ye ali kɛ Gyisɛse ewule ne anwo hyia kpalɛ. Buluku bie ka kɛ bɛha Gyisɛse ewule ne anwo edwɛkɛ kɛyɛ 175 wɔ Keleseɛnema Giliki Ngɛlɛlera anzɛɛ Ngyekyeleɛ Fofolɛ ne anu. Duzu ati a ɛnee ɔwɔ kɛ Gyisɛse nwu amaneɛ na ɔwu ɛ? Ɔwɔ kɛ yɛnwu ye ɔluakɛ Gyisɛse ewule ne kola ka yɛ ɛbɛlabɔlɛ.
Mɔɔ ɛnee Gyisɛse ze kɛ ɔbado ye la
Ɔka ekyii Gyisɛse wu la, ɔhanle ɔhilele ye ɛdoavolɛ ne mɔ fane dɔɔnwo kɛ ɔbanwu amaneɛ na bɛahu ye. Bɛlua adenle nu bɛlɛkɔ Gyɛlusalɛm bɛahɔli ye Akpabɛnwo ɛvoyia mɔɔ li awieleɛ la, ɔzele ye ɛzoanvolɛ 12 ne kɛ: “Bɛbaye medame Sonla Ra bɛawula sɛlɛvolɛ mgbanyinli nee mɛla kilehilevolɛma ne mɔ asa anu. Bɛbabua me fɔlɛ kɛ bɛhu me na bɛaye me bɛawula bɛdabɛ mɔɔ bɛnle Dwuuma la asa anu. Menli ɛhye mɔ noko bagolo me nwo, atoto me nwo nyɛlɛ, abila me mbaka na bɛahu me.” * (Maake 10:33, 34) Duzu a manle ɔnwunle mɔɔ ɔbado ye la ɛ?
Ɛnee Gyisɛse ze ngapezo ngakyile mɔɔ fane ye ewule nwo mɔɔ wɔ Hibulu Ngɛlɛlera ne anu la. (Luku 18:31-33) Maa yɛnlea ngapezo zɛhae bie mɔ nee Ngɛlɛlera mɔɔ kile kɛzi bɛrale nu la.
Bɛhanle Mɛzaya ne anwo edwɛkɛ kɛ . . .
-
Bɛbaye ye bɛamaa bɛalie dwɛtɛ fufule 30.—ZƐKALAYA 11:12; MATEYU 26:14-16.
-
Bɛbabo ye bɛatoto nyɛlɛ ɔ nwo.—AYEZAYA 50:6; MATEYU 26:67; 27:26, 30.
-
Bɛbabɔ ye baka nu.—EDWƐNDOLƐ 22:16; MAAKE 15:24, 25, NW.
-
Bɛbazi ye amgbu wɔ baka ne azo.—EDWƐNDOLƐ 22:7, 8; MATEYU 27:39-43.
-
Bɛnrɛbu ye bowule ko bɔbɔ.—EDWƐNDOLƐ 34:20; DWƆN 19:33, 36.
Gyisɛse manle ngapezo ɛhye mɔ nee gyɛne mɔɔ wɔ ɛkɛ la amuala rale nu. Ɔhale ɔ ngome a anrɛɛ ɔnrɛhola ɛhye mɔ yɛ. Ngapezo ɛhye mɔ amuala mɔɔ Gyisɛse manle ɔrale nu la di daselɛ kɛ Nyamenle a amgba zoanle ye a. *
Duzu ati a ɛnee ɔhyia kɛ Gyisɛse nwu amaneɛ na ɔwu ɛ?
Gyisɛse wule vale zieziele edwɛkɛ mɔɔ anwo hyia la
Ɛnee Gyisɛse ze tumililɛ nwo edwɛkɛ mɔɔ rale wɔ Yidɛn tola ne anu la. Sunsum nu abɔdeɛ bie mɔɔ ɛnee ɛde atua la manle Adam nee Yive yɛle Nyamenle anwo anzosesebɛ. Bɛ anzosesebɛ ne manle ɔyɛle kɛ asɛɛ Nyamenle tumililɛ anzɛɛ adenle mɔɔ ɔdua zo ɔdi tumi la ɛnle kpalɛ. Eza ɔmanle nɔhalɛ mɔɔ alesama di wɔ ngyegyelɛ nu amaa Nyamenle la anwo rale edwɛkɛ.—Mɔlebɛbo 3:1-6; Dwobu 2:1-5.
Gyisɛse buale Gyihova tumililɛ nee alesama nɔhalɛlilɛ nwo edwɛkɛ ne wɔ adenle mɔɔ di munli la azo. Tieyɛ mɔɔ di munli mɔɔ ɔyɛle ‘ɔhɔle ewule nu na ɔwule wɔ baka ne azo’ la manle ɔlale ali kɛ adenle mɔɔ Nyamenle dua zo di tumi la le kpalɛ. (Felepaema 2:8, NW) Gyisɛse eza manle ɔlale ali kɛ dasanli mɔɔ di munli la bahola ali nɔhalɛ amaa Gyihova saa bɔbɔ ɔyia ngyegyelɛ kpole a.
Gyisɛse wule liele Alesama
Ngapezonli Ayezaya hanle dole ɛkɛ ne kɛ Mɛzaya ne bɛanwu amaneɛ, yeawu yeava yeakpɔda alesama ɛtane. (Ayezaya 53:5, 10) Ɛnee Gyisɛse te ɛhye abo na ɛnee ɔlɛ ɛhulolɛ kɛ ɔbava ‘ye ngoane yeayɛ ɛkpɔnedeɛ yeamaa menli dɔɔnwo.’ (Mateyu 20:28) Ye ewule ne bukele adenle manle alesama mɔɔ ɛnli munli la kɛ bɛ nee Gyihova banyia agɔnwolɛvalɛ kpalɛ na yealie bɛ yeavi ɛtane nee ewule nu. Gyisɛse ewule ne eza ɛmaa yɛnyia adenle kɛ yɛ sa baha dahuu ngoane nee asetɛnla kpalɛ ne mɔɔ Adam nee Yive manle ɔminlinle la. *—Yekile 21:3, 4.
Duzu a ɔwɔ kɛ ɛyɛ a?
Badwu ɛke, yɛzuzu mɔɔ Baebolo ne ka fane Gyisɛse anwo—ɛleka mɔɔ ɔvi ɔrale, kɛzi ɔbɔle ye ɛbɛla, yɛɛ deɛ mɔɔ ɔti ɔwule la anwo. Nɔhalɛ edwɛkɛ ɛhye mɔ bahola yeamaa wɔanyia Gyisɛse anwo adwenle mɔɔ tenrɛ. Saa ɛfa ɛyɛ gyima a ɔbamaa wɔanyia nyilalɛ dɔɔnwo—asetɛnla kpalɛ ɛnɛ yɛɛ dahuu ngoane kenlebie. Baebolo ne maa yɛnwu mɔɔ ɔwɔ kɛ yɛyɛ na yɛanyia nyilalɛ ɛhye mɔ la.
-
Sukoa Gyisɛse Kelaese nee gyima mɔɔ ɔlɛyɛ yeamaa Gyihova bodane ara nu la anwo ninyɛne dɔɔnwo.—DWƆN 17:3.
-
Die Gyisɛse di na bɔ ɛbɛla mɔɔ kile kɛ ɛdie ye ɛto nu kɛ wɔ Ngoanedievolɛ.—DWƆN 3:36; GYIMA NE 5:31.
Gyihova Alasevolɛ anye balie kɛ bɛbaboa wɔ bɛamaa wɔazukoa Gyisɛse Kelaese, Nyamenle ‘Ara kokye’ ne mɔɔ yɛdua ɔ nwo zo a yɛnyia “dahuu ngoane” ahyɛlɛdeɛ ne la anwo edwɛkɛ dɔɔnwo.—Dwɔn 3:16.
^ ɛden. 5 Ɛnee Gyisɛse ta fɛlɛ ɔ nwo “Sonla Ra.” (Mateyu 8:20) Edwɛkɛ ɛhye kile kɛ ɛnee ɔze ye kɛ ɔle dasanli bɔkɔɔ na ɛnee ɔdaye a ɔle “sonla ra” ne mɔɔ bɛha ɔ nwo edwɛkɛ bɛdo ɛkɛ wɔ Baebolo ne anu la.—Daneɛle 7:13, 14.
^ ɛden. 13 Saa ɛkpondɛ ngapezo mɔɔ rale nu wɔ Gyisɛse anwo edwɛkɛ dɔɔnwo a, nea mokanwo edwɛkɛ “Gyisɛse Kelaese—Mɛzaya ne Mɔɔ Bɛbɔle Ɔ Nwo Ɛwɔkɛ La” mɔɔ wɔ Duzu A Baebolo ne Kilehile Amgba A? Buluku ne mɔɔ Gyihova Alasevolɛ ɛyɛ la anu.
^ ɛden. 17 Saa ɛkpondɛ nvasoɛ mɔɔ wɔ Gyisɛse ewule ne azo la anwo edwɛkɛ dɔɔnwo a, nea Duzu A Baebolo ne Kilehile Amgba A? buluku ne tile 5, “Ɛkpɔnedeɛ ne—Nyamenle Ahyɛlɛdeɛ Mɔɔ Tɛla Biala.”