Jesus—Rason na Impatey To
Jesus—Rason na Impatey To
‘Say Anak na too et linma dia, pian iter toy kamarerwa [odino bilay] to a panondon ed amayamay.’—MARCOS 10:45.
AMTA nen Jesus no antoy nagawa’d sikato. Inilaloan to lan agmagmaliw ya mainaway bilay to. Imbes, amta ton sikatoy pateyen diad edad a masulok labat ya 30, tan sikatoy akaparaan la parad satan.
Diad Biblia, importantin maong so impatey nen Jesus. Inkuan na sakey a libro a say impatey to et 175 beses a nabasa ed Kristianon Griegon Kasulatan odino Balon Sipan. Akin et kaukolan a manirap tan ompatey si Jesus? Nepeg tayon amtaen ta baleg so nayarin epekto na satan ed bilay tayo.
▪ No antoy inilaloan nen Jesus Diad unor lan taon na bilay nen Jesus, aminpiga ton impasakbay ed saray disipulo to so panirap tan ipatey to. Sanen paarap ira ed Jerusalem parad unor lan panselebra toy Paskua, inkuan to ed saray 12 apostol to: “Say Anak na too so iyawat ed saray manunan saserdote tan saray eskriba, tan sikatoy sentensiaan da na patey tan iyawat da ed saray totoo na nasyones, tan sikatoy elek-elekan da tan lutlutdaan da tan sipsiplatan da tan pateyen da.” * (Marcos 10:33, 34) Akin et segseguradoy Jesus ya nagawa iratan ed sikato?
Kabisado nen Jesus so dakel a propesiya ed Hebreon Kasulatan (odino Daan a Sipan) ya angipasakbay ed no panoy ipatey to. (Lucas 18:31-33) Nia ray pigaran propesiya ed Biblia tan saray pakabasaan no panon ya asumpal iratan.
Say Mesias so . . .
▪ Iyawat parad 30 pilak.—ZACARIAS 11:12; MATEO 26:14-16.
▪ Pekpeken tan lutdaan.—ISAIAS 50:6; MATEO 26:67; 27:26, 30.
▪ Ipasak.—SALMO 22:16; MARCOS 15:24, 25.
▪ Balbalawen legan ya akapasak.—SALMO 22:7, 8; MATEO 27:39-43.
▪ Pateyen ingen ta anggapoy naputer a pukel to.—SALMO 34:20; JUAN 19:33, 36.
Asumpal nen Jesus iraya tan saray arum nin propesiya. Balet no sikato labat, seguradon agto nakontrol iray situasyon. Lapud asumpal ed sikato irayan amin a propesiya, talagan sikato sirin so imbaki na Dios. *
Balet, akin et kaukolan nin manirap tan ompatey si Jesus?
▪ Inatey si Jesus pian nalinewan iray importantin isyu Amta nen Jesus iray importantin isyu ya ginmapo’d hardin na Eden nensaman. Diad impanukso na sakey a rebelden anghel, pinili nen Adan tan Eva ya ag-unoren so Dios. Lapud impanrebelde ra, akuestion so paraan na pananguley na Dios. Tan lapud kasalanan da, say sakey nin isyu et no kasin walay mansiansian matoor ed Dios sano nasusubok.—Genesis 3:1-6; Job 2:1-5.
Malinlinew ya naebatan nen Jesus irayan isyu: no kasin kanepegan nen Jehova so manuley tan no kasin makapanmatoor so too. Lapud matulok “anggad ipapatey . . . ed panamairapan a kiew,” sinuportaan nen Jesus so pananguley na Dios. (Filipos 2:8) Impanengneng met nen Jesus a sarag na perpekton too so mansiansian matoor ed si Jehova anggano nasubok na pinasya.
▪ Inatey si Jesus pian dondonen so totoo Impropesiya nen propeta Isaias a say panirap tan ipatey na insipan a Mesias et onkanan pinagkasakbong ed kasalanan na totoo. (Isaias 53:5, 10) Atalosan a maong iya nen Jesus tan inter “toy kamarerwa to a panondon ed amayamay.” (Mateo 20:28) Lapud insakripisyo toy bilay to, walay pankanawnawa na agperpekton totoo a nawalaay maong a relasyon ed si Jehova tan nibulos ed kasalanan tan ipapatey. Tan walay pankanawnawa tayon naawat so ilalon bilay ya agmanampot diad paraison dalin ya abalang di Adan tan Eva. *—Apocalipsis 21:3, 4.
▪ No antoy nagawaan mo Diad sarayan apantongtongan tayo, naaralan tayo no antoy ibabaga na Biblia nipaakar ed nanlapuan, impanbilay, tan rason na impatey nen Jesus. Lapud sarayan katuaan, aglabat basta nipetek iray lingon ideya nipaakar ed sikato. Magmaliw met a maliket so bilay tayo natan tan nawalaan tayoy agmanampot a bilay diad arapen no onkiwas tayo base ed saraya. Ibabangat na Biblia no antoy gawaen tayo pian naawat iratan a bendisyon.
▪ Kabaten ni a nagkalalo si Jesu-Kristo tan say responsabilidad ya inter nen Jehova ed sikato.—JUAN 17:3.
▪ Manisia ed si Jesus tan ipanengneng ed kabibilay mo a sikatoy aawaten mo bilang Manangilaban.—JUAN 3:36; GAWA 5:31.
Maliket iray Tasi nen Jehova ya ontulong ed sika pian lalom a nakabat si Jesu-Kristo, say “bogbogtong ya Anak” na Dios, a diad panamegley to et makaawat tayo na regalon “bilay ya andi-anggaan.”—Juan 3:16.
[Saray paimano ed leksab]
^ par. 5 Mabetbet a tatawagen nen Jesus so sarili to ya “Anak na too.” (Mateo 8:20) Ipapanengneng na saya a si Jesus et talagan nagmaliw a too tan sikato imay tinukoy ed propesiya na Biblia ya “anak na too.”—Daniel 7:13, 14.
^ par. 13 Parad kaaruman ya impormasyon ed saray propesiyan asumpal ed si Jesus, nengnengen so “Jesu-Kristo—Say Insipan a Mesias” ed pahina 199-201, diad libron Anto so Peteg ya Ibabangat na Biblia? ya in-publish na saray Tasi nen Jehova.
^ par. 17 Parad kaaruman ya impormasyon ed kaimportantian na impatey nen Jesus, nengnengen so kapitulo 5, “Say Dondon—Sankaabigan a Regalo na Dios,” diad libron Anto so Peteg ya Ibabangat na Biblia?
