Jesus​—Sel Uchul Me Ngmlad

“Ele Ngelekel a chad el mlei . . . e mengkengkii a klengar er ngii el ngebetir ar betok.”​—MARKUS 10:45.

A JESUS a mle medengei a tekoi el kirel a klengar er ngii. Ngmle medengei el kmo ngdiak bo lekiei el klengar er ngii a ngar er a budech. E ngbai mle ulterekokl a rengul el kmo, a klengar er ngii a mo kedeb er a taem el dirk el 30 a rekil, me ngkmal mle ungil el kltmokl el kirel a kodellel.

A Biblia a ochotii a klungel a ultutelel a kodellel a Jesus. A ta el babier a melekoi el kmo a kodellel a Jesus a losaod er ngii el 175 el taem er a chelsel a Beches el Testament. Ngera uchul me a Jesus a mle kirel el mo chuarm e mad? Ngkired el mo medengei aika el tekoi e le kodellel a Jesus a ngar er ngii a klou el lerellii er a klengar er kid.

▪ A tekoi el ble lodengei a Jesus Ngar sel ulebongel el rak er a klengar er a Jesus, e ngmle betok el taem el lomeklatk er a redisaiplo er ngii el kirel a ringel me a kodall el bo lechelebangel er ngii. Ngar er a omerollel el mo er a Jerusalem el mo mengetmokl er a ulebongel el Baskua er ngii, e ngdilu er a 12 el apostol er ngii el kmo: “Ma Ngelekel a chad a mo moterekokl rar bderrir ar priist mar chellimosk ra llach, me te mo dobeklii el mo kirel a kodall, e oterekeklii rar Chisentail; me te dongulii, e tubar, e cholebedii, e mo mekodir.” * (Markus 10:33, 34) Ngera uchul me ngkmal mle ungil el medengei aike el tekoi el mo duubech el kirel?

A Jesus a mla er ngii a klemedengei er ngii er a betok el ulaoch el ngar er a chelsel a Chuodel el Testament el mesaod el kirel a ulebengelel a klengar er ngii. (Lukas 18:31-​33) Momtab a bebil er a ulaoch el obengkel a Bades el mesaod er a rolel e ngmlo tmaut aika el ulaoch.

A Messias a mo . . .

▪ Moterekokl el kirel a okedei el silber.​—SEKARIA 11:12; MATTEUS 26:14-​16.

▪ Mechelebed e metub a medal.​—ISAIA 50:6; MATTEUS 26:67; 27:26, 30.

▪ Medeel er a teluo el kerrekar.​—PSALM 22:16; MARKUS 15:24, 25.

▪ Motuub er a lengar er a kerrekar.​—PSALM 22:7, 8; MATTEUS 27:39-​43.

▪ Mad el diak a ta er a chiuesel el chelemuul.​—PSALM 34:20; JOHANES 19:33, 36.

A Jesus a uleltaut aika el ulaoch me a lmuut el bebil. Ngdimlak el sebechel el di ngii el meruul aika el tekoi. Me a otutel aika el rokui el ulaoch el okiu a Jesus a olecholt el kmo, ngii a mera el mlodurech er a Dios. *

Ngera uchul me ngmle kirel a Jesus el mo chuarm e mad?

▪ A Jesus a mlad me lemeketmokl a meklou a ultutelel el tekoi A Jesus a mle medengei aike el meklou a ultutelel el tekoi el kirel a eanged me a chutem el mlo er ngii er a sers er a Eden. A Adam me a Eba a mlekesuseu er a mekngit el anghel me te ngileltii el mo diak lolengesenges er a Dios. Me a ultekengir tirka el obekel a mlo uchul a ker el kirel a llemeltel a Dios el mengedereder me a lechub a rolel a longedereder. A kngterir a dirrek el mlo uchul a ker el kirel a blakerreng er a rechad el mo er a Dios sel bo er a cheungel a omelsemai.​—Genesis 3:1-6; Job 2:1-5.

A Jesus a mle sebechel lochotii sel kot el ungil el nger el kirel aike el eru el tekoi el kirel a omengederederel a Jehovah er a eanged me a chutem me a blakerreng er a rechad. Me ngokiu sel cherrungel el blekongesenges er ngii “el mo lmuut ra kodall, el sel kodall ra [teluo el kerrekar],” e a Jesus a millisiich  er a omengederederel a Dios. (Filipi 2:8) Me a Jesus a dirrek el ulechotii el kmo a cherrungel el chad a sebechel el melemolem er a cherrungel el blakerreng el mo er a Jehovah er a chelsel a kmal meringel el ongarm.

▪ A Jesus a mlad el olubet el tenget el kirel a klechad A profet el Isaia a ulemlaoch el kirel a telbiil el Messias el kirel el mo chuarm e mad el mo uchul a tngakireng el tenget el kirel a kngterir a rechad. (Isaia 53:5, 10) A Jesus a mle ungil el medengelii tia el tekoi, me ngkilengei el “mengkengkii a klengar er ngii el ngbetir ar betok.” (Matteus 20:28) A kodall el tengetengel a Jesus a milsterir a techellir a rediak el mecherrungel el chad el mo er ngii a ungil el deleongel er tir el obengkel a Jehovah e mo osobelterir er a klengit me a kodall. A kodellel a Jesus a meskid a techall el mo nguu sel tekoi el lurridii a Adam me a Eba el ngii a omelatk el kirel a diak a ulebengelel el klengar er a chelsel a cherrungel el blekeradel er tia el beluulechad. *​—Chocholt 21:3, 4.

▪ Ngera sebeched el meruul Ngoeak aika el suobel, e kede mla mo medengei a tekoi el lolekoi a Biblia el kirel a Jesus el kmo, ngmla er ker el mei, e mle ua ngerang a blekerdelel a klengar er ngii, e ngera uchul e ngmlad. A bo dodengei aika el klemerang el tekoi el kirel a Jesus e ngsebechel meketakl aike el cheleuid el uldesued el kirel. A doltaut aika el tekoi er a klengar er kid e ngsebechel el mo uchul a klengeltengat e dirrek el mo uchul a ungil klengar er chelechang me a diak a ulebengelel el klengar er a ngar medad el klebesei. A Biblia a ouchais er kid aike el tekoi el kired el meruul me bo el sebeched el ngmai a betok el klungiaol.

▪ Molemolem el mesuub el kirel a Jesus Kristus me a ngerechelel el kirel a moktek er a Jehovah.​—JOHANES 17:3.

▪ A klaumerang er kid el mo er a Jesus el oeak a blekerdelel a klengar er kid a ochotii el kmo kede kongei el nguu el mo Osebeled.​—JOHANES 3:36; RELLIR 5:31.

A Resioning er a Jehovah a kmal sorir el ngosukau el mesuub a lmuut el betok el kirel a Jesus Kristus, el ngike el “dital Ngelekel” a Dios, el okiu ngii e ngsebeched el mo nguu a sengk er a “diak a ullebengelel klengar.”​—Johanes 3:16.

[Aike el Footnote]