Jesus wanunqan
Jesus wanunqan
“Diospita Shamushqa Nunapis que patsaman shamushqa nunacunata [...] yawarninwan rescatananpaq[mi].” (MARCOS 10:45.)
JESUSQA kawëninchö tukïta pasanampaq kaqtam musyarqan. Shumaq mana kawakunampaq kaqta, awkinyar-raq mana wanunampaq kaqta y kima chunka watayoqnöllaraq këkaptinlla wanutsiyänampaq kaqtapis musyarqanmi. Pero musyarpis, llapanta pasanampaqmi listo këkarqan.
Bibliachöqa willakun Jesuspa wanïnin alläpa precisaq kanqantam. Huk libro ninqannöpis Escrituras Griegas Cristianas o Mushoq Testamentochöqa 175 kutim Jesuspa wanïnimpaq willakun. Pero ¿imanirtaq Jesustaqa tsëläya hipatsir wanutsiyarqan? Tsëta musyanqantsikqa kawënintsikchö alläpam yanapamäshun.
▪ Jesus musyanqan. Wanunampaq ichikllana pishikaptinmi, atska kuti imanö wanunampaq kaqpita Jesus parlarqan. Këllaman yarpärishun, Pascua fiestata celebraq Jerusalenman ëwëkarmi chunka ishkë qateqninkunata kënö nirqan: “Tsechomi Diospita Shamushqa Nunata saserdoticunapa mandacoqnincunaman y ley yachatsicoqcunaman entregayanqa. Pecunanam wanutsiyänanpaq condenar mana israel nunacunaman entregayanqa. Tsechonam burlapar, toqapur feyupa astayanqa. Tsepitanam wanutsiyanqa” (Marcos 10:33, 34). * ¿Imanöpataq llapan pasanampaq kaqta musyarqan?
Jesusqa alleqmi musyaq Escrituras Hebreas o Antiguo Testamentochö wanïnimpaq willakunqankunata (Lucas 18:31-33). Wakin textokunallata rikärishun, tsëchömi willamäshun profëtakuna willakuyanqanta y imanö cumplikanqantapis.
Akrashqapaq profëtakuna willakuyanqan
▪ Kima chunka qellëpaqrëkurmi rantikuyänan karqan (ZACARÍAS 11:12; MATEO 26:14-16).
▪ Toqapuyänan y maqayänanmi karqan (ISAÍAS 50:6; MATEO 26:67; 27:26, 30).
▪ Qerumanmi warkuyänan karqan (SALMO 22:16; MARCOS 15:24, 25).
▪ Wanunqan höram pëpita burlakuyänan karqan (SALMO 22:7, 8; MATEO 27:39-43).
▪ Wanutsirnin manam ni huk tulluntapis pakiyänantsu karqan (SALMO 34:20; JUAN 19:33, 36).
Kë profecïakunata kikin Jesus mana patsëkätsirnimpis llapantam cumplirqan. Tsë llapan pasakunqankunam rikätsikurqan Diospa kachamushqan kanqanta. *
Pero ¿imanirtaq precisarqan Jesus tsënö wanunan?
▪ Ishkë problëmakunatam altsanan karqan. Adanwan Ëvaqa huk mana alli angelta wiyakurmi Diospa contran churakäyarqan, y tsënöpa ishkë problëmakuna qallamunqantam Jesus musyarqan. ¿Mëqankunataq tsë problëmakunaqa karqan? Huk kaqqa, Diosnintsikta mana alli gobernante nirnin Satanás tumpanqanmi, y ishkë kaqnam, imëka mana allikunata pasar manam Diostaqa shonqupita patsëtsu serviyanqa nirnin nunakunata tumpanqan (Génesis 3:1-6; Job 2:1-5).
Jesusqa wanunqanwanmi kë ishkë tumpakï mana rasumpa kanqanta rikätsikurqan. Pëqa “Diosta cäsucurmi asta waniyaqpis chärerqan, y manam penqacorqantsu cruscho [“qeruchö”, NM] wanitapis”, tsënöpam rikätsikurqan Dioslla ciëlochö y Patsachöpis Mandakoq kanqanta (Filipenses 2:8). Hinamampis rikätsikurqanmi hutsannaq nuna mana allikunata pasëkarpis, Diosnintsikta mana haqinqanta.
▪ Nunakunatam salvan. Profeta Isaïasmi willakurqan Diospa Akrashqan hipanqanwan y wanunqanwan hutsantsikkunata ushakätsinampaq kaqta (Isaías 53:5, 10). Tsëta musyarmi Jesusqa ‘yawarninwan nunacunata rescatananpaq’ listo këkarqan (Mateo 20:28). Tsënö wanunqanrëkurmi hutsasapa nunakuna këkarpis, Jehoväta servita, hutsapita y wanïpita salvakïta puëdentsik. Përëkurmi Adanwan Eva shumaq Patsachö alli kawakïta oqrayanqanta yapë tarïta puëdentsik (Apocalipsis 21:3, 4). *
▪ ¿Imatataq rurankiman? Kë kiman artïculokunachömi Bibliawan yachakurirquntsik, Jesus mëpita shamunqanta, imanö kawanqanta y wanunqampitapis. Pero manam Jesuspita musyananllatsu. Sinöqa yachatsikunqannömi kawëta tïranantsik. Tsënö rurarqa más kushishqam kawakushun y kë Patsachö mana wanushpa kawakïtapis tarishunmi. Y Diosnintsikqa këkunata ruranatam munan:
▪ Jesuspita y imanö Diospa munënin rurakänampaq yanapakunqanta más yachakunantsikta (JUAN 17:3).
▪ Jesusman markäkunantsikta o yärakunantsïta y Salvamaqnintsiktanö kawënintsikchö rikätsikunantsikta (JUAN 3:36; HECHOS 5:31).
Jehoväpa testïgonkunaqa kushishqam yanapayäshunki ‘Diospa jucllella tsurinpita’ yachakunëkipaq, pëpa shutinllachö ‘wiñepaq cawëta’ tarina kaptin (Juan 3:16).
[Päginapa ura kuchunchö willakïkuna]
^ par. 5 Jesusqa kikimpaqmi atska kuti ‘Nunapa Tsurin’ nirqan (Mateo 8:20, QKW). Këta ninqanwanqa, manam nuna kanqanllatatsu rikätsikurqan, sinöqa profëtakuna parlayanqan “nunapa tsurin” kanqantawanmi rikätsikurqan (Daniel 7:13, 14).
^ par. 13 Jesuschö más profecïakuna cumplikanqanta musyëta munarqa, Rasumpëpaqa, ¿imatataq Biblia yachatsikun? libropa apendicenchö rikäri, “Jesucristu, Dios änikonqan Mesias” ninqan tïtulota.
^ par. 17 Jesus wanunqampita masta musyëta munarqa, rikäri Rasumpëpaqa, ¿imatataq Biblia yachatsikun? nishqan libropa 5 kaq capïtulonta, tïtulonqa “Diosnintsikpa huk valoryoq qarëninmi rescäteqa”.