Jesús: tuku xlakata nilh
Jesús: tuku xlakata nilh
«Wa xKam nchixku, [...] limilh [...] namakgtayakgoy amakgapitsin, chu na namastay xlatamat nalilakgmaxtukgoy xlilhuwa ntachixkuwitat.» (MARCOS 10:45)
JESÚS xkatsi tuku xʼama akgspula. Liwana xkatsi pi lu tuwa xʼama wan xlatamat chu la xʼamaka makgnikan akxni xkgalhilh liwaka puxamakaw kata. Maski chuna, ni pekualh chu makgantaxtilh tuku xlimakaminkanit.
Biblia lu xlakaskinka akxilha akxni nilh Jesús. Maktum libro wan, pi kBiblia liwaka 175 talichuwinan kTatsokgni xaGriego, (Nuevo Testamento). Pero ¿tuku xlakata lu patinalh akxni nilh Jesús? Xlakaskinka nakatsiyaw xatakgalhtin, xlakata uma nalakgpali kilatamatkan.
▪ Wantuku xkatsiya Jesús Awatiya kata nema latamalh Jesús, lichuwinalh la xʼama patinan chu la xʼamaka makgnikan. Akgtum liʼakxilhtit, akxni xʼamakgolh kJerusalén xlakata natlawakgo Pascua, kawanilh kgalhkutiy xtamakgalhtawakgen: «Wa xKam nchixku, namakamastakan kxmakankan xanapuxkun [...], chu lakgtsokgkinanin, [natlawakgo] mpi namakgnikan, namakamaxkiy wa nti xakgmakgat chixkuwin. Na nalikgalhakgamanankgoy, nasnokgkgoy, nachujmanikgoy, namakgnikgoy» (Marcos 10:33, 34). * ¿Tuku xlakata lu liwana xkatsi Jesús tuku xʼama akgspula?
Jesús liwana xkatsi tuku xwankanit pi xʼama makgantaxti kTatsokgni xaHebreo (Antiguo Testamento) nema xlichuwinan la xʼamaka makgnikan (Lucas 18:31-33). Naʼakxilhaw makgapitsi tuku xlichuwinankanit chu textos niku tatsokgnit la kgantaxtukgolh.
Tuku xlichuwinankanit la xʼama niy Mesías
▪ Xʼamaka listakan puxamakaw tumin xaplata (ZACARÍAS 11:12; MATEO 26:14-16).
▪ Xʼamaka lakachujmanikan chu makgsnokgkan (ISAÍAS 50:6; MATEO 26:67; 27:26, 30).
▪ Xʼamaka xtokgowakakan kkiwi (SALMO 22:16; MARCOS 15:24, 25).
▪ Xʼamaka likgalhkgamanankan la xpatinama (SALMO 22:7, 8; MATEO 27:39-43).
▪ Akxni xmakgnika ni xʼamaka laktukxnikan xlukut (SALMO 34:20; JUAN 19:33, 36).
Jesús putum makgantaxtilh chu nachuna amakgapitsi tuku xlichuwinankanit pi xʼama tlawa chu niwa lakkaxwilh xlakata chuna xkgantaxtulh. Uma limasiya pi Dios xmakaminit. *
Pero ¿tuku xlakata xtalakaskin pi xpatinalh akxni xnilh?
▪ Xlakata tlan xlakkaxtlawalh pulaktiy lu xlakaskinka taʼakglhuwit Jesús liwana xkatsi taʼakglhuwit nema tsukulh kjardín xaʼEdén, akxni chatum ángel nema nitlan xlikatsi tlawalh pi Adán chu Eva nialh xkgalhakgaxmatkgolh Dios. ¿Tukuya taʼakglhuwit? Pulana, komo xaʼakgstitum la xmapakgsinan Dios chu xlipulaktiy, komo latamanin ni xmakgxtakgkgolh Dios akxni xkgalhikgolh taʼakglhuwit (Génesis 3:1-6; Job 2:1-5).
Xlakata Jesús nilh, mastalh xtakgalhtin uma pulaktiy lu xlakaskinka takgalhskinin. Jesús, «kgalhakgaxmatninalh asta akxni nilh» chu chuna limasiyalh pi Dios chatum Mapakgsina tiku xaʼakgstitum (Filipenses 2:8, NM). Nachuna limasiyalh pi chatum chixku nema ni kgalhi talakgalhin tlan ni makgxtakga Dios maski lu tuwa tuku natitaxtu.
▪ Xlakata nakalakgmaxtu latamanin Palakachuwina Isaías wa pi xʼama patinan chu xʼamaka makgnikan Mesías, chu chuna tlan xmasputulh kintalakgalhinkan (Isaías 53:5, 10). Jesús liwana xkatsi pi xʼama «[...]mastay xlatamat, nalilakgmaxtukgoy xlilhuwa ntachixkuwitat» (Mateo 20:28). Xlakata mastalh xlatamat, akinin tlan talalinaw Jehová chu kinkalakgmaxtun ktalakgalhin chu klinin. Xlakata Jesús mastalh xlatamat tlan nakgalhiparayaw tuku makgatsankgakgolh Adán chu Eva akxni lakgalhinankgolh: tlan nalatamayaw xliputum kilhtamaku kKatiyatni niku xakastlan nawan (Apocalipsis [Revelación] 21:3, 4). *
▪ Jesús chu wix Kʼuma artículos akxilhnitawa tuku wan Biblia xlakata niku lakatsukulh, xlatamat chu akxni nilh Jesús. Pero ni kaj talakaskin nakatsiyaw tuku xaxlikana xlakata Jesús. Na talakaskin nalilatamayaw tuku masiyalh. Komo chuna natlawayaw tlakg napaxuwayaw chu tlan nalatamayaw xliputum kilhtamaku. Biblia kinkawaniyan tuku Dios lakaskin natlawayaw:
▪ Tlakg nakatsiyaw xlakata Jesucristo chu tuku lakgayawakanit xlakata nakgantaxtu xtalakaskin Dios (JUAN 17:3).
▪ Nakanajlaniyaw Jesús chu nalimasiyayaw kkilatamatkan pi kiLakgmaxtunakan liʼakxilhaw (JUAN 3:36; HECHOS 5:31).
Xtatayananin Jehová xatapaxuwan namakgtayakgoyan xlakata tlakg nakatsiniya xlakata «nchastum xKam» nema tlan nalimakglhtinanaw «latamat wa ntu xaliankgalhin» (Juan 3:16).
[Notas nema wilakgo kpágina]
^ párr. 5 Jesús makglhuwa lichuwinalh pi wa xwanit, «xKam nchixku» (Mateo 8:20). Akxni chuna wa nikaj limasiyalh pi lataman xwanit, akxni wa pi «xkgawasa chixku» xwanit xkilhchanima pi wa xlichuwinankgonit palakachuwinanin (Daniel 7:13, 14).
^ párr. 13 Komo tlakg katsiputuna xlakata tuku makgantaxtilh Jesús, kaʼakxilhti ktatakgatsin «Jesucristo, Mesías tiku xwankanit pi namin» klibro ¿Tuku xlikana masiyay Biblia?
^ párr. 17 Tlakg natekgsa xlakata xtamakamastan Cristo kcapítulo 5, nema wanikan «Talakgmaxtut, tlakg xlakaskinka tamaskiwin nema Dios kinkamaxkin» xla libro ¿Tuku xlikana masiyay Biblia?
