Yesuusa—I Hayqqido Gaasuwaa

‘Asa Naˈay darota wozanau ba shemppuwaa [woykko deˈuwaa] immanau yiis.’—MAR. 10:45.

YESUUSI ba bolli gakkanabaa erees. I sarotetta deˈuwaa deˈennaagaa erees. Hegaappe dumma hanotan, i 30 layttaa heeran azzanttiya hanotan hayqqanaagaa erees; qassi hayqqiyo wodiyau kumetta hanotan giigettiis.

Yesuusa hayqoy keehippe koshshiyaaba gidiyoogaa Geeshsha Maxaafay yootees. Yesuusa hayqoy Giriiketto Geeshsha Maxaafaa Xuufetun woykko Ooratta Maachan 175 gidiya sohuwan qoncciyan odettidoogaa issi xuufee yootees. SHin, Yesuusi waayettidoynne daro wodiyaa deˈennan hayqqidoy aybissee? Yesuusa hayqoy nu deˈuwaa keehippe goˈˈana danddayiyo gishshau, nuuni hegaa erana koshshees.

▪ Yesuusi ba bolli gakkanaagaa naagidobaa Yesuusi saˈan deˈido wurssetta layttan bana gakkana waayiyaabaanne hayquwaabaa ba erissiyo ashkkarata darotoo akeekissiis. Yesuusi bonchidoogeetuppe wurssetta gidida Paasikaa Baalau Yerusalaame biyo wode, ba kiittido 12tuyyo hagaadan giis: “Tana, Asa Na7aa, qeese halaqatussinne higgiyaa tamaarissiyaageetussi aattidi immana. Eti ta bolli haiqo pirddaa pirddana; qassi Aihuda gidenna asaassikka tana aattidi immana. He Aihuda gidenna asai ta bolli qilliiccananne cuchchana; tana lissuwan garafananne worana.” * (Mar. 10:33, 34) I ba bolli gakkanabaa mule siribeennay aybissee?

Yesuusi i waanidi hayqqanaakko kasetidi odettida, Ibraysxxe Geeshsha Maxaafaa Xuufetun deˈiya daro hiraagata erees. (Luq. 18:31-33) Issi issi hiraagati waanidi polettidaakko bessiya Geeshsha Maxaafaa qonccissuwaa qoppite.

Masiyaa . . .

▪ Hasttamu biran aatti immana.—ZAK. 11:12; MAA. 26:14-16.

▪ SHocananne a bolli cuchana.—ISI. 50:6; MAA. 26:67; 27:26, 30.

▪ Kaqqana.—MAZ. 22:16; MAQ. 15:24, 25.

▪ I kaqettidaashin asay cayana.—MAZ. 22:7, 8; MAA. 27:39-43.

▪ Meqettaappe issoynne meqqennan asay worana.—MAZ. 34:20; YOH. 19:33, 36.

Hageetinne hara daro hiraagati Yesuusa bolli polettidosona. I hegee ba bolli polettanaadan oottana danddayiyo hanoti baawa. Ha ubba hiraagati Yesuusa bolli polettidoogee, i tumuppe Xoossay kiittin yiidoogaa qonccissees. *

Yaatin, Yesuusi waayettananne hayqqana koshshidoy aybissee?

▪ Yesuusi denddida gita oyshata zaaranau hayqqiis Ubbabaa haariyo maataanne qoppi danddayiya mereta ubbaa xeelliyaagan Edene gannatiyan denddida oyshaa Yesuusi erees. Makkalancha ayyaana meretaa sugettan Addaameenne Hewaana Xoossaayyo azazettennan agganau dooridosona. Addaameenne Hewaani makkalay Xoossay ubbabaa haariyo maataa woykko haariyo ogiyaa xeelliyaagan oyshay denddanaadan oottiis. Eta nagaray asaa naati paacee gakkishin Xoossaayyo ammanettanee giya oyshaykka denddanaadan oottiis.—Doo. 3:1-6; Iyy. 2:1-5.

 Yesuusi naaˈˈu oyshaukka, giishin Yihooway haariyo maataanne asaa naatu suuretettaa xeelliyaagan denddida oyshau suure zaaruwaa immiis. Mittaa ‘bolli hayqqana’ gakkanaashin polo hanotan azazettiyoogan Xoossay ubbabaa haariyo maatau exatiis. (Pili. 2:8) Polo asi wolqqaama paacee gakkishinkka polo hanotan Yihoowayyo ammanettidaagaa gidana danddayiyoogaakka Yesuusi qonccissiis.

▪ Yesuusi asaa naata wozanau hayqqiis Yaana giidi qaalaa gelido Masee waayettiyoogeenne hayqqiyoogee asaa naatu nagaraa atto giissiyoogaa hananabaa yootiya Isiyaasi kasetidi yootiis. (Isi. 53:5, 10) Yesuusi hegaa loyttidi erees; qassi ‘daro asaa wozanau ba shemppuwaa immanau’ eeno giis. (Maa. 20:28) I yarshsho gididi hayqqidoogee, polo gidenna asaa naati Yihoowaara loˈˈo dabbotaa medhanaadan, qassi nagaraappenne hayquwaappe attanaadan ogiyaa dooyiis. Yesuusa hayqoy Addaameppenne Hewaanippe halidabaa, giishin polo hanotan saˈaa bollan merinau deˈiyo hidootaa nuuni demmanaadan ogiyaa dooyiis. *—Ajj. 21:3, 4.

▪ Intte oottana danddayiyoobaa Geeshsha Maxaafay Yesuusa xeelliyaagan yootiyoobaa, giishin i awuppe yiidaakko, ayba hanotan deˈidaakko, qassi aybissi hayqqidaakko ha huuphe yohotun pilggida. Yesuusabaa ha tumaa eriyoogee a xeelliyaagan eriyo bala qofaa agganaadan oottiyoogaappekka aaruwan maaddana danddayees. He tumaara moggiyaabaa oottiyoogee anjjuwaa, giishin ha wodiyan loˈˈo deˈuwaa, qassi sinttappe merinaa deˈuwaa demissana danddayees. Nuuni he anjjuwaa demmanau ay oottana koshshiyaakko Geeshsha Maxaafay yootees.

▪ Yesuus Kiristtoosabaanne Yihoowa halchuwan au deˈiya sohuwaa gujjidi erite.—YOH. 17:3.

▪ Ashshiyaagaa oottidi Yesuusa ekkidoogaa bessiya ogiyan deˈiyoogan, an ammaniyoogaa oosuwan bessite.—YOH. 3:36; OOS. 5:31.

Nuuni “merinaa de7uwaa” a baggaara demmiyo, Xoossaayyo “mexi issi Na7aa,” Yesuus Kiristtoosabaa gujjidi eranaadan Yihoowa Markkati inttena ufayssan maaddana.—Yoh. 3:16.

[Tohossa qofata]