MAARAM hi Jesus han mahitatabo ha iya. Maaram hiya nga diri hiya magkikinabuhi nga murayaw. Lugod, maaram hiya nga mamamatay hiya samtang sobra 30 pa la an iya pangidaron, ngan andam gud hiya hito.

Ha Biblia, importante gud an kamatayon ni Jesus. Usa nga reperensya an nagsiring nga an iya kamatayon gin-unabi hin mga 175 ka beses ha Kristiano Griego nga Kasuratan, o Bag-o nga Tugon. Kondi, kay ano nga kinahanglan niya mag-antos ngan mamatay? Sadang naton hibaroan an baton hito kay an iya kamatayon may daku nga epekto ha aton kinabuhi.

Ha ultimo nga tuig ni Jesus, damu ka beses nga ginpahamangnoan niya an iya mga disipulo mahitungod han pag-antos ngan kamatayon nga iya maieksperyensyahan. Han tikadto hira ha Jerusalem basi isaurog an iya ultimo nga Paskua, hiya nagsiring ha 12 nga apostol: “An Anak han tawo igtutubyan ha mga puno han mga saserdote, ngan mga eskriba, ngan ira hiya paghuhukman ha kamatayon, ngan igtutubyan hiya . . . ha mga Hentil; ngan pagyuyubitan hiya nira, ngan paglulud-an hiya; ngan paghahampakon hiya nira, ngan papatayon hiya.” * (Markos 10:33, 34) Kay ano nga sigurado hi Jesus nga mahitatabo ito ha iya?

Maaram hi Jesus han damu nga tagna ha Hebreo nga Kasuratan nga nagsusumat kon paonan-o hiya mamamatay. (Lukas 18:31-33) Tagda an pipira hini ngan an mga teksto nga nagpapakita han katumanan hito.

An Mesias . . .

• Igtutubyan o tatrayduron kabalyo hin 30 ka bug-os nga salapi.—SAKARIAS 11:12; MATEO 26:14-16.

• Hahampakon ngan luluraan.—ISAIAS 50:6; MATEO 26:67; 27:26, 30.

• Iraraysang.—SALMO 22:16; MARKOS 15:24, 25.

• Tatamayon samtang aada ha pasakitan nga kahoy.—SALMO 22:7, 8; MATEO 27:39-43.

• Papatayon kondi waray tul-an nga mababari.—SALMO 34:20; JUAN 19:33, 36.

Ito ngan an iba pa nga tagna natuman kan Jesus. Diri niya ito malalamposan ha iya kalugaringon la. Tungod kay natuman ito ha iya, nagpapamatuod ito nga hiya an sinugo han Dios. *

Kondi, kay ano nga kinahanglan mag-antos ngan mamatay hi Jesus?

Maaram hi Jesus han pinakaimportante nga isyu nga iginbangon ha hardin han Eden. Tungod han impluwensya han rebelyoso nga espiritu, ginpili nira Adan ngan Eva nga magtalapas. Hini nga paagi, ginkwestyon nira an pagkasoberano han Dios, o an paagi han Iya pagmando. Ginkwestyon liwat nira kon may tawo nga magpapabilin nga matinumanon kon umatubang hin pagsari.—Genesis 3:1-6; Job 2:1-5.

Ginhatag ni Jesus an diri maruhaduhaan nga baton ha isyu han pagkasoberano ni Jehova ngan han pagkamatinumanon han tawo. Pinaagi han iya pagkamasinugtanon “tubtob ha kamatayon”  ha pasakitan nga kahoy, ginsuportahan niya an pagkasoberano han Dios. (Filipos 2:8) Ginpamatud-an liwat niya nga mahimo magpabilin nga matinumanon kan Jehova an hingpit nga tawo bisan pa kon umatubang hin makuri hinduro nga pagsari.

Igintagna ni propeta Isaias nga an pag-antos ngan kamatayon han iginsaad nga Mesias magtatagana hin bayad ha sala han katawohan. (Isaias 53:5, 10) Matin-aw nga hinsabtan ito ni Jesus, ngan kinaburut-on nga iginhatag an “iya kinabuhi nga lukat han kadam-an.” (Mateo 20:28) Tungod han iya kamatayon, an diri-hingpit nga mga tawo mahimo magkaada maopay nga relasyon kan Jehova ngan matalwas ha sala ngan kamatayon. Dugang pa, nagkaada kita higayon nga maibalik an nawara nira Adan ngan Eva—an paglaom nga mabuhi ha waray kataposan dinhi ha tuna ha hingpit nga kahimtang. *—Pahayag 21:3, 4.

Ha serye hini nga mga artikulo, gin-usisa naton an ginsisiring han Biblia mahitungod kan Jesus—kon diin hiya nagtikang, kon paonan-o hiya nagkinabuhi, ngan kon kay ano nga hiya namatay. Diri la basta gintatadong hini an sayop nga mga opinyon mahitungod ha iya. An pagbuhat uyon hito mahimo magresulta hin mga bendisyon—mas maopay nga kinabuhi yana ngan kinabuhi nga waray kataposan ha tidaraon. Nagsusumat an Biblia kon ano an sadang buhaton basi makarawat ito.

• Kumuha hin dugang nga kahibaro mahitungod kan Jesu-Kristo ngan han iya papel ha katuyoan ni Jehova.—JUAN 17:3.

• Magkaada pagtoo kan Jesus, ngan ipakita ha imo pagkinabuhi nga kinakarawat mo hiya sugad nga Manluluwas.—JUAN 3:36; BUHAT 5:31.

Nalilipay an mga Saksi ni Jehova ha pagbulig ha imo nga mahibaro hin dugang mahitungod kan Jesu-Kristo, an “bugtong nga Anak” han Dios, nga pinaagi ha iya mahimo naton makarawat an regalo nga “kinabuhi nga waray kataposan.”—Juan 3:16.