Fan ni Yim’ Jesus

“Mus ngak e en ni Fak e Girdi’ ma de yib nga fayleng ni ngan pigpig ngak; yi yib ni nge pigpig me pi’ e pogofan rok nge biyuliy e girdi’ ni pire’ ngay.”​—MARK 10:45.

MANANG Jesus e n’en nra buch rok. Manang ni dabi par u fithik’ e gapas. Manang nra par nib ngoch nap’an, ere ke fal’eg rogon ni fan ko yam’ nra tay.

Be yog e Bible nib ga’ fan e yam’ ni tay Jesus. Be yog reb e babyor ni sogonap’an 175 yay ni kan weliy murung’agen e yam’ ni tay Jesus u lan e Pi Babyor ko Bible nni Yoloy Som’on ni Thin ni Greek, ara Bin Beech e M’ag Rok Got ko Bible. Ere mang fan ni gafgow Jesus nge yim’? Ba t’uf ni ngad nanged, ya yam’ ni tay Jesus e rayog ni nge yib angin ngodad.

▪ N’en ni manang Jesus Nap’an e bin tomur e duw ko yafas rok ma immoy in yay ni i weliy ngak pi gachalpen murung’agen e gafgow nge yam’ nra tay. Nap’an ni yad be yan fa 12 i apostal rok i yan nga Jerusalem ni ngar uned ko bin tomur e madnom ko Paluk’af nra un ngay, me yog ngorad ni gaar: “Gadad be yan nga Jerusalem ni ir e bay ni pi’ e En ni Fak e Girdi’ riy ngak e pi tolang ko prist, nge pi tamachib ko Motochiyel, ni yad e bay ra pufthinniged ngar turguyed ni ngan li’ ngem’, nge mu’ mi yad pi’ nga pa’ e piin ni gathi yad piyu Israel. Ma bay ur moningniged, ma yad be thuw nga daken, ma yad be toy ko dimow, nge mu’ mi yad li’ ngem’.” a (Mark 10:33, 34) Mang fan nrib mudugil u wan’ e n’en nra buch rok?

Manang Jesus fapi yiiy ni bay ko Pi Babyor ko Bible nni Yoloy Som’on ni Thin ni Hebrew ni be weliy murung’agen e yam’ nra tay. (Luke 18:31-33) Am lemnag boch e yiiy nge boch e thin nu Bible ni be weliy rogon ni ke lebug.

Fare Messiah e yira . . .

▪ Yognag nga 30 yang i silber.​—ZEKARIAH 11:12; MATTHEW 26:14-16.

▪ Toy min thuw nga daken.​—ISAIAH 50:6; MATTHEW 26:67; 27:26, 30.

▪ Richibiy nga baley i gek’iy.​—PSALM 22:16; MARK 15:24, 25.

▪ Moningnag u nap’an ni bay u daken fare ley i gek’iy.​—PSALM 22:7, 8; MATTHEW 27:39-43.

▪ Li’ nge yim’ ni dariy taareb e yil u dow ni yira t’ar.​—PSALM 34:20; JOHN 19:33, 36.

Pi yiiy ney nge ku boch e yiiy e gubin ni lebug u daken Jesus. Machane, gad manang ni gathi ir rok e k’aring ni nge buch e pi n’ey. Ere rogon ni ke lebug e pi yiiy ney e be micheg nriyul’ ni Got e l’og Jesus nge yib. b

Ere mang fan nthingari gafgow Jesus nge yim’?

▪ I yim’ Jesus ya nge puf reb e magawon ni ke sum Manang Jesus fare deer ni sum u lan e milay’ nu Eden u murung’agen e en ni bay mat’awun ni nge gagiyeg. Adam nge Efa e ra mel’egew ni ngar folgow rok reb e engel ni ke togopluw, ma gathi Got. Bochan e togopluw nra tew ma aram fan ni sum fare deer u murung’agen mat’awun Got ko gagiyeg. Miki sum reb e deer u murung’agen e yul’yul’ ni ma tay e girdi’ ngak Got u fithik’ e skeng.​—Genesis 3:1-6; Job 2:1-5.

 Rib fel’ rogon ni pi’ Jesus e fulweg ko gal deer ney u murung’agen mat’awun Jehovah ko gagiyeg nge yul’yul’ ni ma tay e girdi’. Bochan e yul’yul’ ni tay “nge yan i mada’ ko ngiyal’ ni yim’” u daken fare ley i gek’iy, me gagiyelnag ni gagiyeg rok Got e th’abi tolang. (Filippi 2:8) Ki micheg Jesus nrayog rok be’ nib flont ni nge par nib yul’yul’ ngak Jehovah u fithik’ e tin th’abi mo’maw’ e skeng.

▪ I yim’ Jesus ni nge pithig e girdi’ ko denen nge yam’ I yiiynag Isaiah ni profet ni gafgow nge yam’ nra tay fare Messiah e ra mang ba maligach ni fan ko denen ko girdi’. (Isaiah 53:5, 10) Manang Jesus e re n’ey, mab m’agan’ ngay ni nge “pi’ e pogofan rok nge biyuliy boor e girdi’ ngay.” (Matthew 20:28) Yam’ ni tay e ke bing e kanawo’ ko girdi’ ndawor ra flontgad ni nge fel’ e tha’ u thilrad Jehovah mi yad chuw u pa’ e denen nge yam’. Yam’ ni tay e ke bing e kanawo’ ni ngki yog ngodad bayay e n’en ni mul u pa’ Adam nge Efa ni aram e athap ko yafas ni manemus u fayleng. c​—Revelation 21:3, 4. 

▪ N’en nrayog ni ngam rin’ Pi article ney e kad weliyed riy e n’en ni be yog e Bible u murung’agen Jesus, ni aram e gin ni yib riy, rogon e par rok, nge fan ni yim’. Gad ra nang e tin riyul’ u murung’agen Jesus ma rayog ni nge tamilangnag boch ban’en ni ma weliy e girdi’ u murung’agen nde puluw. Gad ra ngongol nib puluw ko pi n’ey ma boor e tow’ath nra yib ngodad ni aram e ra fel’ boch par rodad e chiney me yog e yafas ni manemus ngodad boch nga m’on. Be yog e Bible e n’en nib t’uf ni ngad rin’ed me yog e pi tow’ath ney ngodad.

▪ Kum fil boch ban’en u murung’agen Jesus Kristus nge n’en nib milfan ngak ko tin nib m’agan’ Got ngay.​—JOHN 17:3.

▪ Nge m’ug ko ngongol rom nib mich Jesus u wan’um, ni aram e ngam dag ni ke m’agan’um ngay ni nge Pi’ e Yafas ngom.​—JOHN 3:36; ACTS 5:31.

Rib felfelan’ e Pi Mich Rok Jehovah ni ngar ayuweged gur ngkum nang boch ban’en u murung’agen Jesus Kristus, ni ir Fak Got “ni kari maagirag rok,” ni ir e ra yog e “yafas ndariy n’umngin nap’an” ngodad u daken.​—John 3:16.

[Footnotes]