YESU Gupai Ko Akpi ti Ni

‘Wiri boro aye . . . ka tumo dunguyo ni ungako.’​—MARAKO 10:45.

YESU aima ino gupai nika mangako kumbatayo. Ko aima ino gupai nga ko arakanga rogo zereda te. Ko aima ino nga i nika imoko aimo garãko kidu kindi nga 33, na ko aima mbakadatiko wenengai tipa gu kpio re.

Ziazia Kekeapai nanyakasa pakpio Yesu anyakasa gbe. Buku sa nayawee i fura tipa pakpio Yesu ziazia wa bara 175 rogo Vovo Ndika yo. Tipagine tie Yesu arungo ti ni na i ki imiko? Si naida aida ani ini gipai re, bambiko kpio Yesu naundo rani aundo bakere gbe.

▪ Gupai Yesu aini nga si nika manga tipa ko Vuru gu yangara agarã nangia ga gako raka, ko agumba gupai bara dunguhe fu gako abawiriki nga ko nika rungo na ki kpi. Ho ko aandu ni ku Yerusarema yo tipa ka manga yangara Pumbo Susiri, ko aya fu gako amokedi nadu 12 wee: “I afú Wiri boro fu abairamotumo na abakeapai; i asára ngbanga ko ko kpi, ki fu ko ku vurube aGendiria; i asawia ko, ki nisukudi ko, ki nitaki ko, ki imi ko.” * (Marako 10:33, 34) Ko awiripa ino agu apai wai nika mangako dunduko?

Yesu aima rugatiko na agu asangbaanebi du rogo Kuru Ndika nga gu nagumbapa wai gako raka nikadu. (Ruka 18:31-33) Oni bingo bete agu asangbaanebi re na agu averesi nayugo wai si adigi.

Si adu nga i nika . . .

▪ Baga Masiya tipa marã feda 30.​—ZEKARAYA 11:12; MATAYO 26:14-16.

▪ Ta Masiya ki sukudiko na sure.​—YESAYA 50:6; MATAYO 26:67; 27:26, 30.

▪ Kenga Masiya kuti ngua.​—ATAMBUAHE 22:16; MARAKO 15:24, 25.

▪ Sawia Masiya ko kidu ti ngua.​—ATAMBUAHE 22:7, 8; MATAYO 27:39-43.

▪ Imo Masiya zanga kuo memeko kandara sa.​—ATAMBUAHE 34:20; YOANE 19:33, 36.

Agi asangbaanebi re gbiati badungu agu akuraha adigi dunduko kuti Yesu. Ko nitiko aarengbanga ka saha si digi kutiko te. Pa digo agi asangbaanebi re ayugu gupai nga Mbori du nakedi Yesu. *

Ono tipagine si aidi gupai aida ti ni nga Yesu rungo ki kpi?

▪ Yesu akpi tipa ka sara nyanyaki angbanga Yesu aima rugatiko naapa agu angbanga nakuru ati Edene yo. Maraika sa nasamungu kuti Mbori asa aAdamu na Eva i basasangba Mbori. Gayó samungu akusi gu ngbanga nabi pa ru gu zogarago nga ga Mbori. Gayó ingapai akusi gu sanahe a nga, ‘Ya mo boro ho rengbe ka nye niruru ni fu Mbori ní kidu rogo asada?’​—Bambata Pai 3:1-6; Eyobo 2:1-5.

 Yesu nasari agu angbanga re nzunzu. Wa ko aduna giasangbaa “dati kpio, . . . gu kpio nga ga wagiwagi ngua,” gure nga ko asongodi gu pagbia nga ga Mbori. (AFiripoio 2:8) Yesu ayugu gupai a nga, rengberengbe boro rengbe arengba ka nye niruruni rogo apai yo ka ní vura du rogo kere asada wai vurũ.

▪ Yesu akpi tipa ka tumo rii aboro Gu nebi nangia Yesaya aima gumbaha ki yawee kpio Yesu nika tumorii aboro be gayó aingapai. (Yesaya 53:5, 10) Yesu aima rugatiko na gipai re wenengai, na ko afu ungako ‘ka tumo dungu aboro.’ (Matayo 20:28) Gako kpio nga ga motumo azakigene fu kpakpa aboro i duna wene pagume dagbayó na Yekova na ki bati be ingapai na kpio. Kpio Yesu nafu momu furani ani gbia guhe aAdamu na Eva agberesipaha, nga nyenye unga auru kpotosende rogo weneapai kpaima. *​—Yugoti 21:3, 4.

▪ Gupai si aida mo mangihe Ani ima wisigo agu apai Ziazia Kekeapai apehe tipa Yesu​—gu ba ko aye rogoho, wai ko araki, na gupai ko akpi ti ni. Ka ani mangipai ringbisihe kuti agu apai ani nainihe tipa Yesu re, ani gbia wene raka agbia awere na ki gbia nyenye unga kumbatayo. Ziazia Kekeapai nagumba agu apai agumba furani si aida ani mangihe ka ani aida ka gbia gu raka re. Agu apai re du re.

▪ Wirikapai tipa Yesu Kristo na gako bangiriba rogo gu mbakadapai nga ga Mbori.​—YOANE 17:3.

▪ Duna idapase kuti Yesu, na kini yugu gupai rogo gamo raka yo nga mo ima idako nigamo Batasi.​—YOANE 3:36; AMOKEDI 5:31.

ADezire Yekova rengbe arengba ka undo ro mo wiriki kura apai tipa Yesu Kristo, nga “bangisa Wiri” Mbori, nga guko ani ka gbia “nyenye unga” mbiko ko.​—Yoane 3:16.

[Gu rukutu kekepai du bandu waraga yos]