Waswe, Iu Savve Finis?

Wanem criminal samting nao Barabbas duim?

▪ Fofala Gospel storyim Barabbas, wea Pontius Pilate, ruler bilong Rome, disaed for releasem and no Jesus. Barabbas “stap long prison” bikos hem “duim barava nogud samting and evriwan savve long hem” and “hem man for steal.” (Matthew 27:16; John 18:40) Olketa long Rome putim hem long prison long Jerusalem bikos “hem and samfala narawan . . . againstim gavman and killim dae wanfala man.”—Mark 15:7.

No eni record stap wea talem criminal samting wea Barabbas duim, bat from Bible storyim hem witim samfala narawan wea againstim gavman, samfala savveman sei masbi hem joinim olketa wea againstim gavman long first century long Israel. Flavius Josephus, wea raetem history, sei olketa criminal grup duim staka nogud samting wea againstim gavman long datfala taem. Olketa criminal hia sei olketa duim olsem for stretem nogud samting wea kasem olketa Jew wea poor. Datfala wei for againstim olketa long Rome and olketa bigman bilong Jew kamap big tumas long midol long first century C.E. Olketa criminal grup nao kamap big part long army bilong olketa Jew wea raosem olketa long Rome from Judea long 66 C.E.

The Anchor Bible Dictionary sei: “Maet Barabbas joinim wanfala criminal grup long bakwei. Olketa poor pipol laekem olketa criminal hia bikos olketa steal from olketa wea rich long Israel and duim staka nogud samting long gavman bilong Rome.”

Olketa Roman killim dae man long sem wei olsem Jesus taem hem duim wanem criminal samting?

▪ Samting wea gavman bilong Rome duim for panisim pipol wea againstim gavman, hem for hangem man long samting wea mekem hem safa and dae. Pipol ting long datwan olsem barava nogud wei for man dae.

Datfala buk Palestine in the Time of Jesus sei: “Kaen panis olsem evriwan savve lukim, mekem man savve shame and hem safa nogud, and olketa duim datwan for mekem pipol fraet for no againstim gavman.” Wanfala man from Rome bifor wea raet abaotem wei for killim dae olketa criminal hem sei: “Olketa savve hangem criminal saed long road wea staka pipol followim for mekem pipol fraet for againstim gavman.”

Josephus storyim wanfala prisoner wea army bilong Titus holem long taem army bilong Rome raonem Jerusalem long 70 C.E. Olketa killim hem dae long wei olsem aotsaed long Jerusalem for mekem olketa wea faet for Jerusalem fraet and givap. Bihaen army tekovarem Jerusalem, olketa killim dae staka narawan long sem wei tu.

Olketa history buk hem storyim 6,000 slave and man wea faet dae long sem wei long road from Capua go long Rombihaen Spartacus faet againstim gavman long year 73-71 B.C.E.

[Piksa long page 21]

“Letem Barabbas Free” Charles Muller, 1878