Sundoga ang Ilang Pagtuo

“Ako Nagatuo”

MAHANDURAW pa ni Marta ang lubnganan sa iyang igsoon—usa ka langob nga gitakpan ug bato ang baba niini. Hilabihan gayod ang iyang kaguol. Halos dili siya makatuo nga ang iyang minahal nga si Lazaro patay na. Ang upat ka adlaw sukad si Lazaro nabugtoan ug gininhawa daw taas kaayo nga yugto sa pagbangotan, pagdawat ug mga bisita, ug mga pahasubo.

Karon, nagtindog atubangan kang Marta ang tawo nga suod kaayo ni Lazaro. Misayag ang iyang dagway sa pagkakita kang Jesus, kay siya ra unta ang makaluwas sa iyang igsoon. Nahupay si Marta samtang kauban si Jesus didto sa gawas sa Betania, nga usa ka gamayng lungsod nga nahimutang sa kabakiliran. Sa daklit nga siya uban kaniya, siya natandog na usab sa iyang pagkamaluloton, sa tiunay nga empatiya nga kanunayng makapadasig kaayo. Si Jesus misukna kaniyag mga pangutana nga nakapalig-on sa iyang pagtuo ug sa iyang paglaom sa pagkabanhaw. Tungod sa maong panaghisgot, gipahayag ni Marta ang labing hinungdanong mga pulong nga iyang nabungat sukad: “Ako nagatuo nga ikaw mao ang Kristo nga Anak sa Diyos, ang Usa nga moanhi sa kalibotan.”—Juan 11:27.

Si Marta dunay talagsaong pagtuo. Diyutay ra tuod ang giasoy sa Bibliya bahin kaniya apan kini dunay hinungdanong mga leksiyon nga makapalig-on sa atong pagtuo. Aron masayran kini, atong tagdon ang unang paghisgot kang Marta diha sa Bibliya.

“Nabalaka ug Napuliki”

Mga bulan una pa niana, buhi pa si Lazaro ug maayog lawas. Ang iyang balay sa Betania hapit nang duawon sa labing importante sa tanang bisita, si Jesu-Kristo. Talagsaon ang pamilya ni Lazaro, Marta, ug Maria—tulo ka dagko nang magsoon nga nag-ipon pagpuyo sa usa ka balay. Gituohan sa ubang mga tigdukiduki nga si Marta mao ang kinamagulangan kay siya ang mipatim-awng nanguna sa pag-atiman ug usahay siya ang unang gihisgotan. (Juan 11:5) Wala ta mahibalo kon may usa ba kanila nga naminyo. Bisan pa niana, sila nahimong suod nga mga  higala ni Jesus. Didto mag-ulian si Jesus sa ilaha panahon sa iyang ministeryo sa Judea, diin siya hilabihang gisupak ug gikayugtan. Tinong gipabilhan gayod niya ang maong dapit diin siya nakabatog kalinaw ug kahupayan.

Mangandam pag-ayo si Marta alang sa ilang bisita. Kay kugihan, siya kanunayng magkapuliki. Dili eksepsiyon niini ang pagduaw ni Jesus. Siya nagplanong maghikayg espesyal nga pagkaon nga daghag potahe alang sa iyang dungganong bisita, ug tingali lakip sa mga kauban ni Jesus sa panaw. Nianang panahona, hinungdanon gayod ang pagkamaabiabihon. Kon moabot ang usa ka bisita, siya abiabihon pinaagig halok, huboon ang iyang mga sandalyas, hugasan ang iyang mga tiil, ug hisoan ang iyang ulo ug pinahumotan nga lana. (Lucas 7:44-47) Walay problema sa iyang sak-anan ug pagkaon kay inatiman ang tanan.

Si Marta ug Maria daghag atimanonon. Si Maria, nga usahay gituohang mas mapamalandongon, mitabang gayod kang Marta sa sinugdan. Apan sa pag-abot na ni Jesus, nabag-o ang kahimtang. Gipahimuslan gayod ni Jesus ang kahigayonan sa pagtudlo! Dili sama sa relihiyosong mga lider nianang panahona, si Jesus nagtahod sa mga babaye ug andam sa pagtudlo kanila bahin sa Gingharian sa Diyos. Kay naghinamhinam niini nga kahigayonan, si Maria milingkod sa tiilan ni Jesus ug nagpatalinghog.

Mahanduraw gayod nato nga wala na mahimutang si Marta. Kay daghan pa kaayo siyag andamon nga pagkaon ug atimanonon alang sa iyang mga bisita, misamot pag-ayo ang iyang kabalaka ug katarantar. Samtang siya nagkadipodipo ug nakakita kang Maria nga naglingkod lang, wala ba kaha siya mamula, mangagho, o magkusmod? Dili ikatingala kon mao kadtoy nahitabo. Dili niya mahimo ang tanan nga siya ra!

Sa kataposan, wala na kapugngi ni Marta ang iyang gibati. Siya misalga kang Jesus: “Ginoo, walay bale ba kanimo nga gipasagdan ako sa akong igsoong babaye nga nag-inusara sa pag-atiman sa mga butang? Busa, sultihi siya nga motabang kanako.” (Lucas 10:40) Bug-at kining mga pulonga. Ang ubang mga bersiyon naghubad sa iyang pangutana niining paagiha: “Ginoo,  wala ka bay pagpakabana . . . ?” Unya siya mihangyo kang Jesus nga badlongon si Maria, aron mobalik sa iyang trabaho.

Ang tubag ni Jesus lagmit nakapatingala kang Marta, sama sa gibati sa daghang magbabasa sa Bibliya. Siya malumong miingon: “Marta, Marta, ikaw nabalaka ug napuliki bahin sa daghang butang. Apan, pipila ra ka butang ang gikinahanglan, o usa lang. Sa iyang bahin, gipili ni Maria ang maayong bahin, ug dili kini pagakuhaon gikan kaniya.” (Lucas 10:41, 42) Unsay gipasabot ni Jesus? Gitawag ba niya si Marta nga materyalistiko? Gibalewala ba niya ang kahago ni Marta sa pag-andam ug pagkaon?

Wala. Nakita gayod ni Jesus nga maayo ang motibo ni Marta. Dugang pa, wala niya lantawa nga sayop ang sobrang pagkamaabiabihon. Siya mitambong man gani sa “dakong kombira sa pag-abiabi” nga gihimo ni Mateo alang kaniya una pa niana. (Lucas 5:29) Ang pagpakaon ni Marta dili maoy pangunang isyu dinhi, kondili ang iyang mga prayoridad. Siya sobrang nagtagad sa espesyal nga pagkaon nga nahiklin na lang hinuon ang mas hinungdanong butang. Unsa kana?

Si Jesus, ang bugtong nga Anak ni Jehova nga Diyos, didto sa balay ni Marta aron itudlo ang kamatuoran. Kini mas hinungdanon pa kay sa iyang lamiang pagkaon ug mga pagpangandam. Tinong naguol si Jesus nga wala mahatagig pagtagad ni Marta ang talagsaong kahigayonan nga mapalig-on ang iyang pagtuo, apan si Jesus naghatag kaniyag kagawasan sa pagpili. Pero dili makataronganong diktahan ni Marta si Jesus aron dili pod makabenepisyo si Maria.

Si Jesus malumong nagbadlong kang Marta, nga nag-alam-alam kaniya pinaagi sa pagsubli ug sangpit sa iyang ngalan aron siya mahupay, ug iya siyang giingnan nga dili kinahanglang ‘mabalaka ug mapuliki sa daghang butang.’ Ang usa o duha ka yanong potahe igo na, ilabina kon dunay espirituwal nga kombira. Busa, dili gayod niya kuhaon gikan kang Maria ang “maayong bahin” nga iyang gipili, nga mao ang pagkat-on gikan kang Jesus!

Kini nga asoy may mapuslanong mga leksiyon alang sa mga sumusunod ni Kristo karon. Dili gayod nato tugotang may makabalda sa pagtagbaw sa atong “espirituwal nga panginahanglan.” (Mateo 5:3) Bisag buot natong sundogon ang pagkakugihan ni Marta, dili gayod kita ‘mabalaka ug mapuliki’ sa dili kaayo hinungdanong butang nga dili na hinuon mahatagag pagtagad ang mas hinungdanong butang. Kita makigsandurot sa atong mga isigkamagtutuo, dili lamang tungod sa idalit nga lamiang pagkaon, kondili aron sa pagdinasigay sa usag usa ug sa pagpaambit ug espirituwal nga mga gasa. (Roma 1:11, 12) Posible gihapon ang maong makapalig-ong okasyon bisag simple ra kaayo ang pagkaon.

Usa ka Hinigugmang Igsoon Namatay —ug Nabanhaw

Gidawat ba ni Marta ang malumong pagbadlong ni Jesus, ug siya ba may nakat-onan niini? Dayag gayod. Si apostol Juan, sa iyang paghisgot sa makaiikag nga asoy bahin kang Lazaro, nagpahinumdom kanato: “Karon gihigugma ni Jesus si Marta ug ang iyang igsoong babaye ug si Lazaro.” (Juan 11:5) Milabay na ang mga bulan sukad sa pagduaw ni Jesus sa Betania. Dayag nga si Marta wala mangluod. Siya wala mahiubos sa mahigugmaong tambag ni Jesus. Hinuon, iya kining gipabilhan. Busa, siya naghatag kanatog maayong panig-ingnan sa pagtuo, kay kitang tanan usahay kinahanglan man usab ug tambag.

Sa dihang nasakit si Lazaro, giatiman siya pag-ayo ni Marta. Gihimo niya ang tanan aron siya maalibyohan ug moarang-arang. Bisan pa niini, misamot kagrabe ang iyang sakit. Kanunayng nag-apong ang iyang mga igsoon aron sa pag-atiman kaniya. Dayag gayod nga si Marta pirmeng magsud-ong sa mihugo nga nawong ni Lazaro, ug iyang mahinumdoman ang daghang katuigan sa ilang pag-ubanay ug ang kalipay ug kasakit nga ilang naagian.

Sa dihang ilang nakita nga si Lazaro hapit nang mamatay, gipaadtoan ni Marta ug Maria si Jesus. Mopanaw pag mga duha ka adlaw gikan  sa dapit diin nagsangyaw si Jesus. Yano lang ang ilang pahibalo: “Ginoo, tan-awa! ang tawo nga imong gimahal nagmasakiton.” (Juan 11:1, 3) Nasayod silang gihigugma ni Jesus si Lazaro, ug sila nagtuo nga buhaton ni Jesus ang iyang mahimo aron matabangan ang iyang higala. Naglaom kaha sila nga maabtan ni Jesus si Lazaro sa di pa ulahi ang tanan? Kon mao, nahugno ang ilang paglaom. Si Lazaro namatay.

Si Marta ug Maria nagbangotan kang Lazaro, ug sa samang higayon nangandam sa iyang lubong ug nag-abiabi sa daghang bisita gikan sa Betania ug sa palibot nga mga dapit. Apan wala pa gihapoy balita kang Jesus. Tinong misamot ang kabalaka ni Marta. Mga upat ka adlaw human mamatay si Lazaro, nabalitaan ni Marta nga si Jesus nagsingabot na sa lungsod. Bisan pag nagbangotan, si Marta, nga wala magpahibalo kang Maria, midali sa pagsugat kang Jesus.—Juan 11:20.

Pagkakita niya sa iyang Agalon, gipahungaw niya kon unsay nakapasamok kaayo niya ug kang Maria sa pipila na ka adlaw: “Ginoo, kon dinhi ka pa ang akong igsoon dili unta mamatay.” Sa gihapon, wala mawad-ig paglaom si Marta. Siya midugang: “Apan sa pagkakaron nahibalo ako nga ang tanan nga imong pangayoon sa Diyos, kini igahatag sa Diyos kanimo.” Dihadiha gipalig-on siya ni Jesus: “Mobangon ang imong igsoon.”—Juan 11:21-23.

Nagtuo si Marta nga nagsulti si Jesus bahin sa umaabot nga pagkabanhaw, busa siya mitubag: “Ako nahibalo nga mobangon siya diha sa pagkabanhaw sa kataposan nga adlaw.” (Juan 11:24) Siya mituo gayod niana. Ang ubang Hudiyong relihiyosong mga lider, nga gitawag ug mga Saduseo, wala motuog pagkabanhaw, bisag tin-aw kining gitudlo sa Bibliya. (Daniel 12:13; Marcos 12:18) Apan, si Marta nahibalong si Jesus nagtudlog pagkabanhaw ug gani siya namanhaw man—bisag walay usa kanilang namatay nga sama kadugay kang Lazaro. Wala siya masayod kon unsay sunod mahitabo.

Unya gibungat ni Jesus ang dili malimtang pahayag: “Ako ang pagkabanhaw ug ang kinabuhi.” Oo, gihatag ni Jehova nga Diyos sa iyang Anak ang awtoridad sa pagpamanhaw sa mga patay sa tibuok kalibotan sa umaabot. Si Jesus misukna kang Marta: “Motuo ka ba niini?” Dayon iyang gihatag ang tubag nga gihisgotan sa sinugdan niining artikuloha. Siya mituo nga si Jesus mao ang Kristo, o Mesiyas, nga siya Anak ni Jehova nga Diyos, ug nga gitagna sa mga manalagna nga siya moanhi sa kalibotan.—Juan 5:28, 29; 11:25-27.

Gipabilhan ba ni Jehova nga Diyos ug sa iyang Anak, si Jesu-Kristo, ang maong pagtuo? Ang mosunod nga mga panghitabo nga nasaksihan ni Marta naghatag sa kinatin-awang tubag. Si Marta nagdali sa pag-adto kang Maria. Human niana, iyang nakita nga si Jesus naguol kaayo samtang nakigsulti kang Maria ug sa uban pang mga nagbangotan. Iyang nakita nga midaligdig ang mga luha sa iyang mata tungod sa iyang dakong kasubo sa pagkamatay ni Lazaro. Iyang nadungog nga gisugo ni Jesus nga ipaligid ang bato gikan sa lubnganan.—Juan 11:28-39.

Si Marta miingon nga ang lawas nanimaho na, kay upat na ka adlaw siyang patay. Si Jesus nagpahinumdom kaniya: “Wala ba ako magsulti kanimo nga kon motuo ka makita mo ang himaya sa Diyos?” Siya mituo, ug iya gayong nakita ang himaya ni Jehova nga Diyos. Diha mismo, iyang gihatagag gahom ang iyang Anak sa pagbanhaw kang Lazaro! Hunahunaa ang mga panghitabo nga nakulit sa panumdoman ni Marta samtang siya buhi pa: Ang pagtawag ni Jesus, “Lazaro, gula ngari!”; ang kasikas gikan sa langob nga gilubngan ni Lazaro sa dihang siya mibangon nga may mga bendahe pa ug inanayng migula sa langob; ang sugo ni Jesus nga ‘badbaran siya ug palakton siya’; ug ang paggaksanay nila ni Marta ug Maria kang Lazaro tungod sa ilang tumang kalipay. (Juan 11:40-44) Nahanaw gayod ang kaguol ni Marta!

Kini nga asoy nagpakitang ang pagkabanhaw sa mga patay dili damgo lamang. Kini maoy makapadasig nga pagtulon-an sa Bibliya ug tinuod gayod nga nahitabo. Gigantihan gayod ni Jehova ug ni Jesus ang pagtuo ni Marta, Maria, ug Lazaro.  Sila may gitagana usab nga ganti alang kanimo kon imong palig-onon ang imong pagtuo sama kang Marta. *

“Si Marta Nagsilbi”

Ang rekord sa Bibliya naghisgot kang Marta sa makausa pa. Kadto maoy sa sinugdanan sa kataposang semana sa kinabuhi ni Jesus dinhi sa yuta. Kay nasayod gayod sa kalisdanan nga iyang maagoman, gipalabi ni Jesus ang pag-estar sa balay nila Lazaro sa Betania. Gikan didto molakaw siyag tulo ka kilometros paingon sa Jerusalem. Si Jesus ug Lazaro nangaon didto sa balay ni Simon nga sanlahon, ug dinhi atong makita ang kataposang giingon bahin kang Marta: “Si Marta nagsilbi.”—Juan 12:2.

Pagkakugihan gayod ni Marta! Ang una natong mabasa sa Bibliya bahin kaniya, siya nagtrabaho; ang kataposan, siya nagtrabaho lang gihapon, nga nag-atiman pag-ayo sa panginahanglan sa uban. Ang mga kongregasyon sa mga sumusunod ni Kristo karon gipanalanginan ug mga babaye nga sama kang Marta—isog ug mahinatagon, nga kanunayng nagpasundayag sa ilang pagtuo pinaagi sa pagsakripisyo sa kaugalingon. Lagmit padayon kanang gibuhat ni Marta. Kon mao, siya milihok nga maalamon, kay nag-andam kini kaniya sa mga hagit nga iyang masinatian.

Pipila ka adlaw human niadto, gisagubang ni Marta ang tumang kaguol tungod sa mangilngig nga kamatayon sa iyang minahal nga Agalon, si Jesus. Dugang pa, ang salingkapawng mga mamumuno nga nagpatay kang Jesus buot usab mopatay kang Lazaro, kay ang iyang pagkabanhaw nagpalig-on sa pagtuo sa daghan. (Juan 12:9-11) Siyempre, sa kadugayan nabugto ra ang relasyon ni Marta ug sa iyang mga igsoon tungod sa kamatayon. Wala kita masayod kon sa unsang paagi o kanus-a kana nahitabo, apan kita makaseguro gayod niini: Ang bililhong pagtuo ni Marta nakatabang kaniya sa paglahutay hangtod sa kataposan. Busa maayong sundogon sa mga Kristohanon karon ang pagtuo ni Marta.

[Footnote]

[Hulagway sa panid 11]

Bisag nagbangotan, si Marta nagpagiya kang Jesus aron tagdon ang mga butang nga makapalig-on sa pagtuo

[Hulagway sa panid 12]

Bisan tuod siya “nabalaka ug napuliki,” si Marta mapainubsanong midawat ug pagtul-id

[Hulagway sa panid 15]

Gigantihan ang pagtuo ni Marta sa dihang gibanhaw ni Jesus si Lazaro