Imbujolenu Chikuhwelelu Chawu

‘Nakuhweleli’

MATA namoni namesu kapu ijamu damana kwindi Lazaru, iyeñu dakujika nelola kuchisu. Waneñeli chakubula kumonañahu dehi. Hetejeli nindi mana kwindi wakeñayi Lazaru nafuku. Awa mafuku awana afwiliyi Lazaru amuneñesheli chikupu hakumona antu enjileña nakumuhempula.

Ichi dinu muntu wudi naMata diyi wadikundili chikupu naLazaru. Waneñeli hama hakumumona Yesu, muloña diyi watelela kumupulwisha mana kwindi hadi antu ejima. Hela chochu, Yesu wamukundejeli Mata hanzi yamusumba waBetani wahampidi. Hayina mpinji yantesha yadiñayi naYesu, amukolesheli cheñi muloña Yesu wamutiyilili luwi. Wamwihwili malwihu amukwashili kushindamena hachikuhwelelu chindi niyuma yakuhweleleliyi hansañu yakusañuka. Mpanji yahanjekeluwu yamukojejeli Mata kuhosha mazu asweja kulema nindi: ‘Nakuhweleli nami yeyi Kristu, Mwana kaNzambi, yowu elañawu nawu wakenza mumpata yamunu mwishina.’—Yowanu 11:27.

Mata himumbanda wadiña nachikuhwelelu chikupu. Bayibolu yatuleja nsañu yantesha hadi Mata yabadika kulema yatela kukolesha chikuhwelelu chetu. Hakwila nawu twiluki iyi nsañu, tushinshikenu nsañu yatachi yekala muBayibolu yahosha hadi Mata.

‘Kwakama niKudikabisha’

Hatukweji twakunyima, Lazaru wadiña wamumi nawa wakola. Mumukala wawu waBetani adiña kwakwihi nakutambwila mwenyi walema nankashi, Yesu Kristu. Lazaru, Mata niMariya avwalikili ivumu dimu ashakamineña itala dimu. Akwakusandujola amakwawu ahosha nawu Mata watela wadiña mukulumpi hakachi kanawa antu asatu, chineli diyi wamwekana neyi diyi watambwilili enyi nawa mpinji yikwawu diyi asambilañawu kutena. (Yowanu 11:5) Tweluka wanyi neyi chakwila hakachi kanawa antu asatu hadi wasumbukili hela wasumbwili. Ilaña, adiña amabwambu jaYesu akundiliyi chikupu. Yesu washakamineña kwitala dawu hampinji yadiña nakushimwinayi muYudeya, mwamweniyi ikañesha dasweja. Chakadi kujina watiyili kuwaha chikupu hakwikala nawantu awunda nawa amukwashileña.

 Mata wadiña nayuma yayivulu yakwila hakuwahisha itala nikumwekeshela antu chisambu. Chineli wadiña muntu wadikita chikupu, kakavulu wazatileña nyidimu yayivulu nankashi. Nihampinji yenjili Yesu nakuhempula wadikitili nyidimu yayivulu. Chakadi nikumanisha mpinji wafuukwiluhu kuloñesha yakudya yayiwahi yayivulu yakudiisha mwenyi windi walema, hadaha niakwawu muyendeleleñawu. Kunyima antu alemesheli chikupu kumwekesha chisambu. Neyi kunenzi mweni, amushikijileña kuhitila mukumupwepujola, kumusumbula nkwabilu, kumuwelesha kunyendu nawa adiña nakumuwayisha manji kumutu. (Luka 7:44-47) Adiña nachaaku chakutambwila mwenyi chiwahi, kumuloñeshela hakukama nikumwinka yakudya yayiwahi.

Mata niMariya adiña nanyidimu yayivulu hakwila akameni mwenyi wawu walema. Mariya atenañawu nawu washa muchima kuyuma nawa watoñojokaña chikupu hakachi kanawa ambanda ayedi, chakadi kujina wamukwashiluku Mata nyidimu hakusambila. Ilaña chelili Yesu yashiki, yuma yahimpikili. Wazatishili chiwahi iyi mpinji kulonda yatañishi antu adiña mwitala. Kwambukaku nawantañishi ansakililu amunana mafuku, Yesu walemesheli ambanda nawa wayitañishileña haWanta waNzambi, mutu wansañu yatañishileñayi mumudimu windi. Mariya wazañaleli hama haniyi mpinji nawa washakamini kunyendu yindi nakutiyilila mazu ejima.

Fwikijenu ndulu yadiña mumuchima waMata. Waloñesheleleña enyi yakudya yayivulu nawa wabimbileña nanyidimu yikwawu, dichi wakameneni nankashi nikudikabisha. Chadiña nakuhitañanayi henohu Mariya washakama kwinza nakumukwashaku nyidimu nehi, komana wadihoshesheleña hela kuhila? Tukuhayama wanyi neyi wahilili. Hadi kuzata nyidimu yejimiyi nkawinduku.

Nkumininaku, Mata hatwesheli kuwundisha ndulu yinduku. Wamuketwishili Yesu nakuhosha nindi: “Mwanta, chananlekeliyi mwanyikami nyidimu kanka wami, hiwunashuku muchima weyuku? Mwili enzi ankwashuku.” (Luka 10:40) Awa adiña mazu akunama chikupu. Akwakubalumuna amavulu asoneka ilu lwihu ñane: “Mwanta wunakameni wanyi . . . ?” Wamwilili Yesu kulonda yamuleji Mariya yayi nakuzata nyidimu.

Mata watela wahayamini chamwakwiluwu kudi Yesu, neyi chahayamañawu antañi aBayibolu amavulu. Wamulejeli mumesu awunda nindi: “Mata, Mata, yuma yayivulu wudi nakwakama, wudi nakudikabisha tuhu kweyi; chuma chimu hohu chikuwanina. Chuma chanatondiyi Mariya, dichi chuma chasweja kuwaha, hiyakamutambulachuku.” (Luka 10:41, 42) Indi Yesu watalishili mudihi? Komana watalishili mukwila nindi Mata washili maana chikupu kuyuma yakumujimba? Tahindi wadiwili nyidimu yazatileña Mata hakuloñesha yakudya yayiwahi?

Inehi. Chakadi nikujina Yesu welukili nindi Mata wadiña namuchima wawuwahi nawa wakukeña. Kubombelahu, hatwalili mukwila nindi kumwekesha chisambu kuhitila mukuloñesha yakudya yayivulu kwatamaku. Hakusambila wayili ‘kuchawija cheneni’ chamutelekeleliyi Matewu. (Luka 5:29) Nsañu yayeni hiyafumini hayakudya yaloñesheleñayi Mataku ilaña hayuma yatwamijiluku. Washili muchima chikupu hakuloñesha yakudya yayivulu chakwila wavulameneni yuma yasweja kulema. Hiyumanyi yeniyi?

Yesu Mwana wumu hohu waYehova Nzambi, wadiña mwitala daMata nakutañisha nsañu yalala. Walemesheli chikupu kutañisha nsañu yalala, kubadika yakudya yayiwahi yaloñesheleñayi Mata. Chakadi nikujina Yesu waneñeli hakumona Mata nakushalahu yuma yayiwahi yatela kukolesha chikuhwelelu chindi, hela chochu wamulekeli kulonda yafuukuluhu yomweni. Mata wadiña nawuswa wakutondahu yuma yalemeshayi, ilaña hadiña nawuswa wakumutondela Mariya yuma yatela kulemeshayuku.

Dichi wamufumbili Mata, nakumutena hejina chachiwahi kulonda yawundishi muchima, nawa wamulejeli nindi hateleleli ‘kwakama nikudikabisha nayuma yayivuluku.’ Yakudya yantesha hohu yateleleli chineli hadiña chawija  chakuspiritu. Yesu hadi kumutambula Mariya chuma “chasweja kuwaha” chatondeliyuku, dikwila nawu kudizila kudi Yena.

Iyi nsañu yashimunaña yuma yamwekeni mwitala daMata yayidizishaña atumbanji twaKristu yuma yayivulu makonu. Hitwatela kwiteja chuma chidi chejima kutukañesha kwila ‘yuma yakuspirituku.’ (Matewu 5:3) Hela chakwila twakeñaña kwimbujola chisambu chaMata nichililu chindi chakudikita, hitwakeñaña ‘kwakama nikudikabisha’ nayuma yabula kulema hakumwekesha chisambu chakwila tushalahu niyuma yasweja kulemaku. Bayi neyi twadikundaña nawakwetu akwakwitiya kulonda tutambwili hela tuyinki yakudya yayiwahuku, ilaña twakeñaña kudikolesha wumu namukwawu nikuyinka yawaana yakuspiritu. (Aroma 1:11, 12) Hela tuhu yakudya yantesha hohu yinateli kushikila haniyi mpinji yakudikolesha.

Mana Kwawu Akeñeluwu Wafwili Nawa Amusañwili

Komana Mata watiyilili kufumba kwamufumbiluwu kudi Yesu nikudizilaku? Eña. Hakushimuna nsañu yayiwahi yahosha hadi mana kwaMata, kapostolu Yowanu watwanukishaña nindi: “Yesu wakeñeli Mata nimana kwindi wamumbanda niLazaru.” (Yowanu 11:5) Mwahitili tukweji twatuvulu kufuma hampinji yatenawu hewulu yahempwiliyi Yesu musumba waBetani. Chakadi nikujina Mata wahilili wanyi, nawa hamushilili Yesu nduluku nanochu chamufumbiliyi munjila yayiwahi. Watiyilili chamufumbiluwu. Watwimikila chakutalilahu chachiwahi chakukuhwelela, hinyi hakachi ketu wabulaña kukeña kumufumba mpinji jikwawu?

Hampinji yakatiliyi mana kwindi, Mata wadiña nakumwakamena. Wadikitili hakumina ñovu jindi hakwila nawu yamukwashi mana kwindi kulonda yakoli. Hela chochu, Lazaru wakatili nankashi. Ahelindi amwakameneneña mpinji yejima. Mata wamutalileña mana kwindi chazeyeliyi hamesu nawa wanukili kukala kwamweneñawu niyuma yadiluñishiluwu hayaaka yayivulu yashakaminuwu hamu.

Chamwenuwu nawu hiyakutwesha kumukwata Lazaru makasaku, Mata naMariya atemesheli mazu kudi Yesu. Washimwinineña kwiluña kwakulehi kwakwenda lwendu lwamafuku  ayedi. Atemesheli mazu antesha hohu nawu: “Eyi Mwanta, tiya, mukwenu wakeña wakata.” (Yowanu 11:1, 3) Elukili nawu Yesu wamukeñeli mana kwawu, nawa akuhweleleli nawu watela kuzata nañovu kulonda yamukwashi ibwambu dindi. Komana akuhweleleli nawu Yesu wukushika henohu Lazaru kanda yofwi? Neyi dimu, chuma chakuhweleleluwu chazatikili wanyi. Lazaru wafwili.

Mata naMariya amudilili mana kwawu, kuloñesha yuma yakeñekeleña hakusweka mujimba nikutambwila enyi amuBetani ninyikala yakwakwihi apompeli. Hakwila Yesu nikutiyakanahu nehi. Mata watela wahayamini nankashi chimwahitili mpinji. Chimwahitili mafuku awana kufuma hafwili Lazaru, Mata watiyili nawu Yesu nashiki dehi kwakwihi namusumba. Hakwikala mumbanda wadikita, hela chakwila wadiña nachineñi, Mata wayili nakumukinkilila Yesu chakadi kumuleja Mariya.—Yowanu 11:20.

Chamumweniyi Mwanta windi, wahosheli mazu amukatishileña kumuchima niMariya hanana mafuku nindi: “Eyi Mwanta, neyi eyi wadiñi kunu, mutenowu mana kwami hanafuku.” Hela chochu, Mata wadiña nachikuhwelelu. Wabombeleluhu nindi: “Hela katataka neluki nami Nzambi wukukwinka chejima chiwukulomba.” Chakadi nikumanisha mpinji Yesu wamulejeli nsañu yakukolesha chikuhwelelu chindi nindi: “Mana kweyi wukusañuka.”—Yowanu 11:21-23.

Mata watoñojokeli nindi Yesu wahosheleña hakusañuka kwakumbidi, dichi wakwili nindi: “Neluki nami wamba kasañuka, hamba kasañukawu afu hefuku dakukuminina.” (Yowanu 11:24) Wakuhweleleli chikupu ntañishilu yeniyi. Akulumpi amakwawu ansakililu yawaYudeya ateneneñawu nawu aSadusi akaanini nawu kusañuka kwosi hela chakwila iyi ntañishilu yamuNyikanda yonenawu yadiña yatiyakana. (Danyeli 12:13; Maku 12:18) Hela chochu, Mata welukili nindi Yesu watañishileña hakuchiñeja kwakusañuka nawa wasañwili niantu, hela chakwila antu asañwiliyi kwosi muntu wafwili muhita mafuku awana neyi chafwiliyi Lazaruku. Welukili wanyi chuma chadi kumwekana.

Dichi Yesu wahosheli mazu amawahi hama nindi: ‘Ami yami chisañukilu niwumi.’ Eñañi, Yehova Nzambi wamwinka Mwanindi ñovu yakusañula antu mukaayi kejima kumbidi. Yesu wamwihwili Mata nindi: ‘Eyi wunakuhweleli mwenimu?’ Wakwili mazu itwahanjeka hakutachika kwachinu chibaaba. Wakuhweleleli nindi Yesu diyi Kristu hela Mesiya Mwana kaYehova Nzambi nawa nindi atuprofwetu ashimwineñahu dehi nawu wakenza mumpata yamunu mwishina.—Yowanu 5:28, 29; 11:25-27.

Komana Yehova Nzambi niMwanindi, Yesu Kristu alemesha chikuhwelelu chamuchidiwu? Chuma chalondeleluhu chamweniyi Mata namesu kapu chahanaña ñakwilu yatiyakana. Wanyakeli kuya nakumutambika muhelindi. Nkumininaku, welukili nindi Yesu waneñeli nankashi hampinji yahosheleñayi naMariya niantu enjili hachipenji. Wamweni chashitileñayi madilu mumesu hampinji yadililiyi hatooka muloña wachineñi chenzaña hakufwisha muntu. Watiyili Yesu chahosheliyi nindi afumishi ilola dadiñi kwijamu damana kwindi.—Yowanu 11:28-39.

Mata wakaanini chikupu nindi mujimba wukununka muloña mwahitili mafuku awana kufuma hafwiliyi. Yesu wamulejeli nindi: “Hinakuleji nami, neyi wukukuhwelela wukumona kulema kwaNzambuku, tahindi?” Wakuhweleleli nawa wamweni kulema kwaYehova Nzambi. Chakadi kumba mpinji Nzambi wamwinkeli Mwanindi ñovu yakusañula Lazaru. Toñojokenu ntahi Mata chatiyili hadina ifuku kushika tuhu nimuchihandilu chindi, chelili Yesu yamutambiki, nindi “Eyi Lazaru, idikakumu!” Mwiyeñu mwamujiikiluwu Lazaru mwatachikili kulukuta hampinji yahindukiliyi, iku chochamujiñajiñawu mumahina akujiika nachu, chelili yediki kuchisu cheyeñu, Yesu wayilili antu nindi, “Musubulenu ayi.” Chakadi nikujina Mata niMariya azañaleli nankashi nakumukumbata mana kwawu mumakasa. (Yowanu 11:40-44) Chikela chadiña kumuchima waMata chamanini to-o.

Iyi nsañu yamwekesha nawu kusañuka kwawafu hikaheka wanyi, hintañishilu  yamuBayibolu yatuzañaleshaña nawa hinsañu yayikulu yamwekeni. Yehova niMwanindi akeñaña kukiswila antu akweti chikuhwelelu, neyi chakiswililiyi Mata, Mariya niLazaru. Anenu nawa akayikiswila neyi mwikala nachikuhwelelu chakola neyi chaMata. *

‘Mata Hakukalakala’

Nsañu yamuBayibolu yahosha cheñi hadi Mata kakukumishaku. Kwadiña kumatachikilu amulungu wakukumishaku waYesu hamaseki. Chelukiliyi nindi wudi kwakwihi nakukabakana, Yesu wayili cheñi nakushakama kuBetani. Kufuma kuBetani nakuya kuYerusalema wendeli makilomita asatu. Yesu niLazaru adiña nakudyila mwitala daShimona mukwambumba, nawa diyi nsañu yakukumishaku yahosha hadi Mata nawu: ‘Mata hakukalakala.’—Yowanu 12:2.

Mata wadiña mumbanda wadikita nankashi. Chitwataña nsañu yakusambila yamuBayibolu yahosha hadi Mata, wadiña nakukalakala; chochimu ninsañu yakukumishaku yahosha nawu wazatileña, wadikitileña hakumina ñovu jindi hakwakamena antu adiñiyi nawu. Muyipompelu yawatumbanji twaKristu makonu mwekala ambanda adi neyi Mata, adikita nawa akweti chisambu, mpinji yejima amwekeshaña chikuhwelelu chawu kuhitila mukudihana. Chakadi kujina Mata watwalekeluhu kwila mwenimu. Neyi welileña mwenimu wazatileña mwamaana, muloña wadiña kwakwihi nakumona kukala.

Kwasheli mafuku antesha hohu hakwila nawu Mata yomiki kufwa kwakala kwaMwanta windi wakeñeliyi, Yesu. Kubombelahu, anfukeji amujahili Yesu, afwilileña cheñi kumujaha Lazaru, chelili kusañuka kwindi kwakolesheleña yikuhwelelu yawantu amavulu. (Yowanu 12:9-11) Kafwampi chimwahitili yaaka, kufwa kwambwili wubwambu wadiñi hakachi kaMata nawanyikijindi. Tweluka wanyi mpinji yamwekeni chumichi, ilaña tweluka chikupu netu: chikuhwelelu chaMata chamukwashili kuumika nikunsa. Dimuloña watela kwimbujolelawu akwaKristu chikuhwelelu chaMata makonu.

[Tumazu twaheshina]

[Mwevulu wudi hefu 28]

Nihampinji yaneñeliyi, Mata wamulekeli Yesu yamuleji nsañu yatela kukolesha chikuhwelelu

[Mwevulu wudi hefu 30]

Hela chakwila wadiña ‘nakwakama nikudikabisha’ Mata wadizozeli nakwiteja mwamufumbiluwu

[Mwevulu wudi hefu 32]

Mata amukiswilili hakumukuhwelela Yesu hampinji yamusañwiluwu mana kwindi