Abi bribi neleki den

„Mi e bribi”

A BEN de neleki Marta ben kan si a grebi fu en brada, wan olo na ini wan bergi di tapu nanga wan ston. A sari di a ben e sari ben hebi gi en, iya, a ben hebi leki a ston di ben tapu a grebi. A no ben man bribi taki en lobi Lasarus no ben de moro. Na ini den fo dei sensi Lasarus hari en lasti bro, so furu sani pasa. Sma ben e sari, èn fisitiman ben kon fu trowstu den.

Èn now, a man di ben de a moro bun mati fu Lasarus, ben tanapu na fesi Marta. Di Marta si Yesus, dan a bigin sari srefisrefi, fu di Yesus ben de a wan-enkri man na heri grontapu di ben kan yepi en brada. Ma toku Marta ben kisi pikinso trowstu di a ben de nanga Yesus na dorosei fu a pikin foto Betania, di de na wan bergi. Di a ben de nanga Yesus fu a syatu pisi ten dati, a ben kisi deki-ati baka fu di a ben si na Yesus en fesi taki a ben e firi gi en, soleki fa a ben sori ala ten taki a e firi gi sma. Yesus ben poti aksi gi en di yepi en fu poti prakseri na a bribi fu en èn na a opobaka howpu di a ben abi. Na ini a takimakandra disi, Marta taki wan fu den moro prenspari sani di a ben o taki na ini en libi. A ben taki: „Mi e bribi taki yu na a Krestes, a Manpikin fu Gado, a Wan di ben o kon na grontapu.”​—Yohanes 11:27.

Marta ben de wan uma di ben abi wan tranga bribi. Bijbel e fruteri wi wan tu sani nomo fu en, ma toku wi kan leri prenspari sani fu en di kan yepi wi fu tranga wi eigi bribi. Fa so? Meki wi poti prakseri na a fosi leisi te Bijbel e taki fu Marta.

’Yu e broko yu ede èn yu e meki sani bruya yu’

A ben de wan tu mun na fesi. Lasarus ben de na libi èn a ben de gosontu. Na ini na oso fu en na Betania, a ben de fu kisi a moro prenspari fisitiman, èn dati ben de Yesus Krestes. Lasarus, Marta nanga Maria ben de brada nanga sisa èn soleki fa a sori den ben libi na ini a srefi oso. Son sabiman e taki dati Marta ben kan de a moro owruwan fu den dri, fu di na en ben e sorgu gi den fisitiman èn son leisi en nen e kari fosi (Yohanes 11:5). Wi no sabi efu den dri ben trow oiti. Awansi fa a no fa, den ben tron bun mati fu Yesus. Na a ten di Yesus ben du en  diniwroko na ini Yudea, pe a ben kisi furu gens èn pe sma ben sori bita-ati gi en, dan a ben gwenti fu tan na den oso. A no de fu taki dati Yesus trutru ben warderi en fu tan drape pe dyugudyugu no ben de èn pe sma ben e horibaka gi en.

Marta ben du furu fu meki a firi bun te a ben tan drape èn a ben sori switifasi gi en. Soleki fa a sori, dan Marta ben e wroko tranga èn ala ten a ben abi wan sani fu du. Na so a ben de tu di Yesus fisiti den. Fosi yu denki, a ben sreka wan spesrutu nyanyan gi a prenspari fisitiman fu en èn kande wan tu fu den sma ben de nanga a fisitiman dati. Na ini a ten dati, a ben de tumusi prenspari fu sori switifasi gi fisitiman. Te wan fisitiman ben doro, dan a sma fu na oso ben gi en wan switikon nanga bosi. A ben puru den susu fu a fisitiman, a ben wasi en futu, èn lobi oli di e smeri switi, gi en ede (Lukas 7:44-47). A ben de a gwenti taki a sma fu na oso ben sorgu bun gi a fisitiman, a ben gi en wan bun presi fu rostu, èn a ben gi en bun nyanyan.

Marta nanga Maria ben abi furu wroko fu du gi a prenspari fisitiman fu den. Soleki fa a sori, dan a ben kan de so taki Maria ben de moro tiri leki Marta èn a ben lobi fu denki dipi fu sani. A no de fu taki dati na a bigin Maria ben yepi en sisa. Ma baka di Yesus doro, sani kon kenki. Yesus ben gebroiki na okasi disi fu gi sma leri! Tra fasi leki den kerki fesiman fu a ten dati, Yesus ben abi lespeki gi umasma èn a ben de klariklari fu leri den fu Gado Kownukondre, a moro prenspari sani di a ben taki fu en na ini en diniwroko. Maria di ben breiti fu kisi na okasi disi, ben sidon na Yesus futusei èn a ben arki bun san Yesus ben taki.

Wi kan frustan taki Marta no ben lobi a sani disi kwetikweti. Nanga ala a nyanyan di a ben musu bori èn ala a wroko di a ben musu du gi den fisitiman fu en, a ben broko en ede moro nanga moro èn a ben kon bruya. Aladi a ben e waka go-kon fu du ala den sani disi, a ben e si en sisa e sidon e du noti fu yepi en. Kande en fesi kenki di a si dati, kande a ben swa en fesi, èn a ben soktu so taki Maria yere en. A no de fu fruwondru efu a ben du dati trutru. A no ben kan du ala den wroko disi en wawan!

Te fu kaba, Marta no ben man moro. A koti Yesus mofo, èn a taki: „Masra, a no e trobi yu  taki mi sisa e meki mi wawan du ala sani? Taigi en dan, meki a kon yepi mi” (Lukas 10:40). A ben sori krin fa a ben e denki. Son Bijbelvertaling e taki dati a ben aksi: „Masra, Yu no abi bisi . . . ?” Baka dati, a e aksi Yesus fu piri-ai gi Maria, èn fu seni en meki a kon yepi en nanga a wroko.

A sani di Yesus taki ben meki Marta fruwondru kande, èn sosrefi furu sma di leisi Bijbel bakaten. Na wan switi fasi Yesus taki: „Marta, Marta, yu e broko yu ede nanga furu sani èn yu e meki furu sani bruya yu. Ma wan tu sani nomo de fanowdu, iya, wán sani nomo. Maria fu en sei, teki a bun pisi, èn mi no o puru disi na en anu” (Lukas 10:41, 42). San Yesus ben wani taki nanga den wortu dati? A ben taki dati Marta ben e prakseri soso grontapu sani? A de so taki a no ben abi warderi gi a tranga wroko di Marta ben du fu sreka wan switi nyanyan?

Nôno. Yesus ben si krin taki Marta ben du den sani dati nanga wan krin ati èn fu di a ben abi lobi. Boiti dati, Yesus no ben feni taki a fowtu te sma e du furu muiti fu sori switifasi. A ben de klariklari fu go na „wan bigi fesa” di Mateyus ben hori gi en wan pisi ten na fesi (Lukas 5:29). A no a nyanyan di Marta ben sreka ben de a problema, ma na den sani di a ben e si leki prenspari sani. A ben poti so furu prakseri na a bigi nyanyan di a ben e sreka, taki a ben frigiti san ben de a moro prenspari sani. San ben de dati?

Yesus, a wan-enkri Manpikin fu Yehovah Gado, ben de na Marta oso fu leri sma den tru tori di abi fu du nanga Gado. Nowan tra sani, iya, srefi a switi nyanyan di a ben bori èn den sani di a ben e sreka, no ben de so prenspari leki dati. A no de fu taki dati Yesus ben sari taki Marta ben misi a moi okasi fu kon kisi wan moro tranga bribi. Toku Yesus meki a teki en eigi bosroiti. Ma a ben de wan heri tra sani, di Marta aksi Yesus fu meki Maria misi na okasi disi tu.

Sobun, na wan switi fasi a piri-ai gi Marta, fu di a kari en nen fu meki a firi korostu èn a taigi en taki a no ben de fanowdu fu ’broko en ede nanga furu sani èn fu no bruya’. Efu a ben o meki wán noso tu sani fu nyan, dan dati ben o sari, spesrutu fu di a ben kan leri so furu fu Gado. Awansi fa a no fa, Yesus no ben o teki „a bun pisi” di Maria ben teki, iya, a no ben o meki a misi na okasi fu teki leri fu en!

Den bakaman fu Krestes na ini a ten disi kan leri furu fu den sani disi di pasa na ini na oso fu Marta. Noiti wi musu gi pasi taki tra sani kon de moro prenspari gi wi leki den sani di wi abi fanowdu fu kon leri sabi Gado (Mateyus 5:3). Wi wani de leki Marta di ben abi switifasi èn di ben wroko tranga. Ma toku wi no wani tron sma di e ’broko wi ede èn e bruya’ so te nanga den sani di wi e du fu sori switifasi, taki wi e misi den moro prenspari sani. A moro prenspari reide fu san ede wi abi demakandra nanga wi Kresten brada nanga sisa, a no fu a bigi nyanyan nomo, ma wi wani gi makandra deki-ati èn wi wani fruteri makandra sani di abi fu du nanga Gado (Romesma 1:11, 12). Srefi efu a nyanyan no kefalek so, toku wi kan gi makandra deki-ati na so wan okasi.

En lobi brada dede èn a kisi wan opobaka

A de so taki Marta ben teki a piri-ai di Yesus gi en na wan switi fasi èn a ben leri wan sani fu en? Wi no abi fu aksi wisrefi dati. Te na apostel Yohanes e bigin nanga a moi tori fu a brada fu Marta, dan a e memre wi na a sani disi: „Yesus ben lobi Marta, nanga en sisa, nanga Lasarus” (Yohanes 11:5). Yesus ben go baka na Betania wan tu mun baka di den sani di skrifi na tapusei, pasa. A de krin taki Marta no ben hori Yesus na ati fu di a ben gi en rai na wan lobi-ati fasi. A ben teki a rai dati. Na a fasi disi a de wan moi eksempre gi wi tu, fu di ten na ten wi alamala abi rai fanowdu, a no so?

Di Marta en brada kon siki, dan a ben du furu fu sorgu gi en. A ben du ala san a man fu meki en brada firi moro bun èn fu yepi en fu kon betre. Ma toku, Lasarus ben kon moro siki. Ibri yuru, ibri dei, den sisa fu en ben de na en sei fu sorgu gi en. Omeni leisi Marta ben luku a siki fesi fu en brada, èn memre den yari di den ben de makandra èn di den ben ondrofeni prisiri sani nanga sari sani.

 Di a ben gersi leki den no ben man yepi Lasarus moro, dan Marta nanga Maria seni wan boskopu gi Yesus. A ben e preiki na wan foto di ben de sowan tu dei waka. Den ben seni a krin boskopu disi: „Masra, yu mati, a wan di yu lobi, siki” (Yohanes 11:1, 3). Den ben sabi taki Yesus ben lobi den brada, èn den ben bribi taki Yesus ben o du ala san a man fu yepi en mati. Den ben howpu taki Yesus ben o doro bifo a ben lati kaba? Efu dati ben de so, dan sani waka heri tra fasi leki fa den ben howpu. Lasarus kon dede.

Marta nanga Maria ben de na row gi a brada fu den. Na so den ben sreka sani gi a beri fu en èn den ben kisi furu fisitiman fu Betania nanga a birti drape. Ma den no ben yere noti fu Yesus. Aladi a ten ben e pasa, Marta ben aksi ensrefi moro nanga moro fu san ede Yesus no ben doro ete. Te fu kaba, fo dei baka di Lasarus dede, Marta yere taki Yesus ben de krosibei fu a foto. Srefi di na uma disi di no ben draidrai, ben e sari, a opo èn a go esi-esi fu miti Yesus, sondro fu taigi Maria.​—Yohanes 11:20.

Di a si en Masra, a taki den wortu di ben de omeni dei na ini en prakseri nanga a di fu Maria. A ben taki: „Masra, efu yu ben de dya, dan mi brada no ben o dede.” Ma toku, Marta no ben lasi howpu èn a no lasi bribi. A taki moro fara: „Toku mi sabi nownow srefi taki ala san yu e aksi Gado, Gado o gi yu.” Wantewante Yesus taki wan sani fu tranga a howpu fu en. Yesus taigi en: „Yu brada o opo baka.”​—Yohanes 11:21-23.

Marta ben e prakseri taki Yesus ben taki fu na opobaka di ben o pasa na ini a ten di e kon, èn fu dati ede a taki: „Mi sabi taki a o kon na libi baka te na opobaka o de na tapu a lasti dei” (Yohanes 11:24). A ben de wan heri moi sani taki a ben poti bribi na ini a leri dati. Son kerki fesiman, di ben nen den Saduseiman, no ben bribi taki wan opobaka de, aladi a skrifi krin na ini den Santa Buku di Gado meki sma skrifi (Danièl 12:13; Markus 12:18). Ma Marta ben sabi taki Yesus ben leri sma fu na opobaka howpu èn taki a ben gi sma wan opobaka srefi, aladi a no ben du dati nanga wan sma ete di ben dede so langa leki Lasarus. Marta no ben sabi san ben o pasa.

Ne Yesus taki wan sani di sma no frigiti: „Mi na a opobaka nanga a libi.” Iya, Yehovah Gado gi en Manpikin a makti fu gi sma na heri grontapu wan opobaka na ini a ten di e kon. Yesus aksi Marta: „Yu e bribi disi?” Dan Marta taigi en a sani di skrifi na a bigin fu na artikel disi. Marta ben bribi taki Yesus ben de a Krestes, noso a Mesias. A ben bribi taki en ben de a Manpikin fu Yehovah Gado, èn taki den profeiti ben taki na fesi dati a ben o kon na grontapu.​—Yohanes 5:28, 29; 11:25-27.

A de so taki Yehovah Gado nanga en Manpikin, Yesus Krestes, abi warderi gi sma di abi so wan bribi? Wi e kisi krin piki tapu na aksi dati te wi e luku den sani di pasa leti na fesi Marta. Marta ben go kari en sisa esi-esi. Baka dati, a ben si taki Yesus ben sari srefisrefi di a ben e taki nanga Maria èn nanga den furu sma di ben e sari nanga en. Marta si fa Yesus en ai furu nanga watra, èn fa a no ben e syen fu sori taki a e sari fu di en mati dede. Marta yere fa Yesus taigi sma fu lolo a ston puru di ben de na fesi a grebi fu en brada.​—Yohanes 11:28-39.

Marta taki dati a dedeskin ben musu smeri now, fu di fo dei ben pasa kaba. Yesus memre en: „Mi no ben taigi yu taki yu o si a glori fu Gado te yu e bribi?” Marta ben bribi, èn a ben si a glori fu Yehovah Gado. Leti na a momenti dati èn na a presi drape, Gado gi en Manpikin a makti fu meki Lasarus kon na libi baka! Prakseri den momenti di tan na ini Marta en prakseri en heri libi langa, di Yesus ben taki nanga wan tranga sten: „Lasarus, kon na doro!” Noso a momenti di a yere wan sani na ini a grebi pe Lasarus ben de, di Lasarus ben opo èn a waka kon na doro aladi a ben domru na ini krosi soleki fa sma ben gwenti du nanga wan dedeskin. Safrisafri Lasarus waka kon èn Yesus gi sma a komando fu „lusu en, meki a gowe”. A no de fu taki dati Marta nanga Maria ben breiti srefisrefi èn den lon brasa den brada (Yohanes 11:40-44). A sari di ben de leki wan hebi tapu Marta, no ben de moro!

 A tori disi e sori taki na opobaka fu den dedewan a no wan winsi nomo, ma na wan Bijbel leri di e trowstu wi èn di pasa trutru. Yehovah nanga en Manpikin lobi fu blesi den sma di e sori bribi, soleki fa den ben blesi Marta, Maria, nanga Lasarus. Yehovah nanga en Manpikin o blesi yu tu na a srefi fasi te yu e kon kisi so wan tranga bribi leki di fu Marta. *

„Marta ben yepi nanga a wroko”

Baka dati, Bijbel e taki wan leisi ete fu Marta. A ben de a bigin fu a lasti wiki fu Yesus en libi na grontapu. Yesus ben sabi heri bun sortu pina a ben o nyan, èn na so a go tan baka na a tiri presi pe a ben gwenti tan na ini Betania. Fu drape, a ben o waka dri kilometer go na Yerusalem. Yesus nanga Lasarus ben e nyan na a oso fu Simon, a man di ben abi gwasi, èn drape wi e leisi fu a lasti tron fu Marta. A tori e taki: „Marta ben yepi nanga a wroko.”​—Yohanes 12:2.

Iya, na so Marta ben de! A fosi tron te wi e leisi fu en na ini Bijbel a e wroko, èn a lasti tron te Bijbel e taki fu en, a e wroko baka. A ben e du ala san a man fu sorgu gi den sani di den sma na en lontu ben abi fanowdu. Den gemeente fu den bakaman fu Krestes na ini a ten disi, abi a grani fu abi umasma na den mindri di de leki Marta. Iya, den abi deki-ati, den lobi fu du sani gi trawan, èn ala ten den e sori taki den abi bribi fu di den e gi densrefi gi a bun fu trawan. Soleki fa a sori, na dati Marta tan du. Efu dati de so, dan a handri na wan koni fasi fu di a ben o miti problema ete.

Baka wan tu dei nomo, Marta ben sari srefisrefi fu di en lobi-ati Masra, Yesus, dede na wan ogri-ati fasi. Boiti dati, den srefi ogri-ati hoigriman di ben kiri Yesus, ben wani kiri Lasarus tu fu di na opobaka fu en ben meki taki furu sma poti bribi na ini Yesus (Yohanes 12:9-11). Èn a no de fu taki dati te fu kaba Marta di ben lobi en sisa nanga brada, ben kon prati fu den fu di den dede. Wi no sabi fa noso o ten dati pasa, ma wi kan de seiker fu disi: A tranga bribi di Marta ben abi, yepi en fu horidoro te na a kaba. Fu dati ede a bun taki Kresten na ini a ten disi abi bribi neleki Marta.

[Futuwortu]

[Prenki na tapu bladzijde 11]

Srefi di Marta ben e sari, toku a meki Yesus yepi en fu poti prakseri na sani di ben o tranga en bribi

[Prenki na tapu bladzijde 12]

Aladi Marta ben ’broko en ede èn a ben bruya’ toku a teki piri-ai na wan sakafasi

[Prenki na tapu bladzijde 15]

A bribi di Marta ben abi na ini Yesus ben meki a kisi blesi fu di a si fa en brada kisi wan opobaka