Banati-tuir sira-nia fiar

“Haʼu fiar”

MARTA sei hanoin hela kona-ba nia alin-mane neʼebé mate ona, ninia mate-isin hatama tiha iha fatuk-kuak no taka ho fatuk boot ida. Nia laran-triste tebetebes no sente laran-todan hanesan fatuk boot iha ninia laran. Tanba neon-susar nia la bele simu realidade katak nia alin-mane, Lázaro, neʼebé nia hadomi mate. Husi loron haat liubá kuandu nia alin nia iis kotu, toʼo agora nia simu bainaka barak, sira tanis hamutuk, hanoin barak, no nia sente kole loos.

Agora, mane neʼebé hamriik iha nia oin mak Jesus, ida neʼebé Lázaro hadomi tebes. Kuandu haree tiha nia, Marta nia matabeen sai fali, tanba nia hatene katak Jesus deʼit mak iha kbiit atu salva ninia alin. Maibé agora nia sente kmaan uitoan tanba nia hamutuk fali ho Jesus iha fatin kiʼik iha foho besik sidade naran Betânia. Maski sira hamutuk fali ba tempu uitoan deʼit, Marta sente laran-kmaan tanba nia bele haree laran-diʼak iha Jesus nia oin, no hatene katak Jesus hanoin no komprende ninia sentimentu. Jesus husu pergunta balu neʼebé ajuda Marta atu hametin nia fiar ba Maromak no nia fiar kona-ba moris-hiʼas. Ida-neʼe book Marta atu fó sai liafuan tuirmai neʼe: “Haʼu fiar katak Ita mak Mesias, Maromak Oan-Mane neʼebé atu mai iha mundu.”—Joao 11:27.

Marta mak feto ida neʼebé iha fiar makaʼas. Maski Bíblia la fó-hatene buat barak kona-ba Marta, maibé hodi haree ninia ezemplu, ida-neʼe bele ajuda ita atu hametin ita-nia fiar. Atu hatene oinsá mak ita bele halo ida-neʼe, mai ita haree saida mak Bíblia hatete kona-ba Marta.

“Hanoin resin kona-ba buat barak”

Antes neʼe, fulan balu liubá, Lázaro sei moris hela no iha saúde diʼak. Lakleur tan Lázaro sei simu bainaka espesiál, Jesus Kristu, iha ninia uma iha Betânia. Nuʼudar família ida, Lázaro, Marta no Maria hela hamutuk iha uma ida. Matenek-naʼin balu hanoin katak Marta mak biin, tanba baibain Bíblia temi nia naran uluk, no mós nia mak ida neʼebé simu bainaka sira. (Joao 11:5) Bíblia la fó-hatene se sira naʼin-tolu neʼe, ida kaben ona ka lae. Maibé sira hotu sai belun diʼak ho Jesus. Kuandu ema barak iha  Judeia kontra Jesus nia serbisu haklaken, nia sente agradese atu bele simu apoiu no ransu ho ninia kolega sira-neʼe iha sira-nia uma.

Marta mak ida neʼebé sempre halo família sente kmaan, no mós simu bainaka sira. Nia ema badinas loos hodi halo serbisu iha uma laran. Hanoin toʼok kona-ba tempu neʼebé Jesus mai atu vizita sira. Lalais deʼit nia arranja atu prepara hahán oioin ba ninia bainaka espesiál neʼe, no mós inklui sira neʼebé laʼo hamutuk ho nia. Iha tempu neʼebá, hatudu laran-luak ba bainaka sira mak importante tebes. Kuandu bainaka ida mai, uma-naʼin sei simu hodi reʼi nia, hasai nia sandálias, fase nia ain, no kose nia ulun ho mina-morin. (Lucas 7:44-47) No mós, uma-naʼin sei tau matan ba buat hotu neʼebé bainaka neʼe presiza, inklui fatin atu hela no ninia han-hemu.

Marta no Maria halo serbisu barak atu tau matan ba sira-nia bainaka espesiál neʼe. Ema barak hanoin katak Maria mak ema neʼebé hanoin kleʼan liu no hanoin kona-ba ema seluk nia presiza, no klaru katak nia ajuda duni ninia biin. Maibé depois Jesus toʼo mai, buat hotu troka. Jesus hanoin katak tempu neʼe diʼak atu hanorin, no nia halo nuneʼe duni! La hanesan ho ulun-naʼin relijiaun sira-nian iha tempu neʼebá, Jesus hatudu respeitu ba feto sira no sempre prontu atu hanorin sira buat neʼebé nia hanorin ba ema seluk, neʼe mak kona-ba Maromak nia Reinu, ka Ukun. Maria haksolok tebes ho oportunidade neʼe, no tuur iha Jesus nia ain hodi rona ba liafuan ida-idak.

Hanoin toʼok kona-ba Marta, nia sente oinsá? Nia tenke serbisu mesak deʼit atu prepara hahán hotu no halo serbisu seluk tan atu tau matan ba bainaka sira. Karik nia komesa hanoin resin kona-ba buat barak. Nuʼudar nia laʼo bá-mai hodi halo serbisu barak, nia haree katak ninia alin-feto tuur deʼit no la halo buat ida atu ajuda, karik nia komesa oin-boot, dada iis, ka oin-buis ba nia alin. Ita la hakfodak se nia hatudu nuneʼe tanba nia la bele mesak halo serbisu sira-neʼe hotu!

Afinál, Marta la bele subar tan ninia sentimentu. Maski Jesus sei koʼalia hela, derrepente deʼit Marta hatete: “Naʼi, Ita la haree katak haʼu-nia  alin husik haʼu serbisu mesamesak? Dehan toʼok ba nia atu tulun haʼu.” (Lucas 10:40) Marta nia liafuan sira-neʼe makaʼas duni. Bíblia balu tradús ninia liafuan hanesan neʼe: “Naʼi, Ita la hanoin haʼu ka . . . ?” Depois neʼe, Marta husu Jesus atu haruka Maria bá serbisu fali.

Karik Jesus nia resposta halo Marta hakfodak, hanesan ho ema seluk neʼebé lee kona-ba istória neʼe. Ho lian mamar, Jesus hatete: “Marta, Marta, ó laʼo kole hodi hanoin resin kona-ba buat barak; maibé buat ida deʼit mak folin loos. Maria hili buat neʼebé diʼak liu hotu, neʼebé ema ida sei la hadau husi nia.” (Lucas 10:41, 42) Jesus nia liafuan neʼe katak sá? Marta hanoin demais kona-ba sasán mundu neʼe nian ka lae? Jesus la hafolin Marta nia hakaʼas-an atu prepara hahán neʼebé diʼak ba sira ka lae?

Lae. Jesus bele haree katak buat neʼebé book Marta mak ninia hakarak atu hatudu laran-diʼak no domin. Liután neʼe, Jesus la sente katak sala atu hatudu laran-luak ba bainaka sira. Uluk, nia mós tuir “festa boot” neʼebé Mateus halo ba nia. (Lucas 5:29) Problema laʼós kona-ba hahán, maibé kona-ba saida mak importante liu ba Marta. Nia hanoin barak liu kona-ba prepara hahán oioin toʼo nia haluha buat neʼebé importante liu. Saida mak neʼe?

Jesus, Maromak Jeová nia Oan-Mane mesak, tuur iha Marta nia uma atu hanorin lia-loos. La iha buat seluk neʼebé importante liu ida-neʼe, neʼe inklui mós hahán furak neʼebé Marta prepara hela. Klaru katak Jesus sente laran-triste tanba Marta la uza oportunidade diʼak neʼe atu hametin ninia fiar, maibé Jesus la obriga Marta atu rona ba nia. Maski nuneʼe, agora Marta hakaʼas fali Jesus atu haruka Maria bá ajuda nia no mós lakon oportunidade diʼak neʼe.

Entaun, Jesus ho laran-diʼak hadiʼa Marta nia hanoin neʼebé sala. Nia temi Marta nia naran dala rua ho lian neineik atu halo Marta sente kalma fali. Jesus fó-hatene ba nia katak nia lalika “hanoin resin kona-ba buat barak”. Natoon atu iha hahán neʼebé simples, liuliu tanba Jesus fahe daudauk hahán espirituál neʼebé diʼak liu, neʼe mak buat neʼebé Jesus hanorin. Tan neʼe, Jesus lakohi hadau buat “diʼak liu hotu” neʼebé Maria hili ona, neʼe mak atu aprende husi Jesus!

Ohin loron ema neʼebé halo tuir Kristu bele aprende buat barak husi buat neʼebé akontese ho Marta nia família. Ita labele husik buat naran deʼit hapara ita atu aprende kona-ba Maromak. (Joao 17:3) Sin, ita hotu hakarak duni atu halo tuir Marta nia ezemplu kona-ba hatudu laran-luak, no badinas. Maibé ita lakohi “hanoin resin kona-ba buat barak” hodi haluha fali buat neʼebé importante liu. Ita ransu hamutuk ho maluk kristaun sira laʼós atu hetan hahán neʼebé kapás, maibé atu fó laran-manas no korrajen ba malu. (Roma 1:11, 12) Iha tempu diʼak hanesan neʼe, natoon atu iha hahán neʼebé simples deʼit.

Hetan fali família neʼebé lakon

Husi tempu neʼebé Jesus han hamutuk ho sira iha Betânia liu tiha fulan balu ona. Marta simu no aprende husi konsellu neʼebé Jesus fó ba nia ka lae? Ita lalika sente dúvida kona-ba neʼe, tanba apóstolu João hatete: “Jesus hadomi Marta, nia alin-feto no Lázaro.” (Joao 11:5) Klaru katak Marta la sente an ka hirus kona-ba konsellu neʼebé Jesus fó ba nia. Maibé nia rona no halo tuir duni. Marta mós fó ezemplu diʼak ba ita kona-ba simu konsellu, tanba dala ruma ita hotu presiza simu konsellu, loos ka lae?

Kuandu nia alin Lázaro hetan moras, Marta la kole atu tau matan ba nia. Nia halo buat hotu neʼebé nia bele atu halo Lázaro sente kmaan no sai isin-diʼak fali. Maibé, Lázaro nia moras sai todan liu. Loron ba loron Marta no Maria sempre besik iha nia sorin atu hein nia. Karik dala barak Marta hateke ba Lázaro nia oin neʼebé kole no isin tun, hodi hanoin fali kona-ba tinan barak liubá, kuandu sira hotu kontente hamutuk no triste hamutuk.

Kuandu Marta no Maria haree katak Lázaro nia situasaun sai aat liu, sira haruka mensajen  ba Jesus. Nia haklaken iha fatin neʼebé dook maizumenus laʼo-ain loron rua. Sira-nia mensajen badak deʼit: “Naʼi, ida neʼebé Ita hadomi moras.” (Joao 11:1, 3) Sira hatene katak Jesus hadomi Lázaro, no sira fiar katak nia sei halo buat naran deʼit atu ajuda ninia belun. Karik sira tau fiar tomak ba Jesus katak nia bele halo Lázaro sai isin-diʼak fali. Se nuneʼe, sira-nia esperansa lakon mohu tanba ikusmai nia mate.

Marta no Maria triste tebes tan Lázaro mate ona, no sira prepara atu hakoi nia no simu bainaka sira husi Betânia no área besik neʼebá. Maibé sira la rona buat ida husi Jesus. Nuʼudar tempu laʼo ba daudauk, karik Marta sente bilán tanba Jesus seidauk toʼo mai. Ikusmai, loron haat depois Lázaro mate, Marta rona katak Jesus toʼo daudauk Betânia. Maski tempu neʼe triste loos, Marta la hakmatek hodi hein deʼit, nia bá lalais atu hasoru Jesus no la fó-hatene ba Maria.—Joao 11:20.

Kuandu haree tiha ninia Naʼi, nia fó sai kedas liafuan sira-neʼebé halo nia no Maria laran-susar ba loron barak ona. Nia hatete: ‘Naʼi, Ita iha neʼe karik, Lázaro la mate!’ Maski nuneʼe, Marta nafatin iha esperansa no fiar tanba nia hatutan: “Maibé oras neʼe mós haʼu hatene katak Maromak sei haraik ba Ita buat neʼebé Ita husu ba nia.” Jesus hatán kedas atu hametin Marta nia fiar ba esperansa neʼe: ‘Lázaro sei moris hiʼas.’—Joao 11:21-23.

Marta hanoin katak Jesus koʼalia kona-ba moris-hiʼas iha futuru, tan neʼe nia hatete: “Haʼu hatene katak nia sei moris hiʼas iha loron ikus.” (Joao 11:24) Marta nia fiar ba Jesus nia hanorin makaʼas tebetebes. Iha Jesus nia tempu, ulun-naʼin relijiaun sira-nian balu, naran saduseu, la fiar katak sei iha moris-hiʼas, maski Eskritura sira hatudu ho klaru. (Daniel 12:13; Marcos 12:18) Marta hatene katak Jesus hanorin esperansa kona-ba moris-hiʼas no mós halo ona ema moris hiʼas fali. Maibé Jesus seidauk fó moris-hiʼas ba ema neʼebé mate ba tempu kleur hanesan Lázaro. Se nuneʼe, Marta seidauk hatene saida mak sei akontese.

Tuirmai, Jesus hatete buat neʼebé Marta la bele haluha: “Haʼu neʼe moris-hiʼas no moris.” Tuir loloos, Maromak Jeová fó kbiit tiha ona ba ninia Oan-Mane atu halo ema hotu neʼebé mate moris hiʼas iha futuru. Tan neʼe, Jesus husu ba Marta: “Ó fiar neʼe?” No Marta hatán, hodi hatete liafuan neʼebé temi iha leten: “Haʼu fiar.” Nia fiar duni katak Jesus mak Kristu, ka Mesias, nia mak Maromak Jeová nia Oan, no nia mak ida neʼebé profeta sira fó-hatene nanis katak sei mai toʼo mundu.—Joao 5:28, 29; 11:25-27.

Maromak Jeová no ninia Oan, Jesus Kristu hafolin fiar hanesan neʼe ka lae? Buat neʼebé akontese tuirmai iha Marta nia oin hatudu ida-neʼe ho klaru. Nia bá lalais atu bolu Maria. Kuandu fila tiha, nia bele haree katak Jesus laran-susar kuandu nia koʼalia ba Maria no ema seluk neʼebé mai. Nia mós haree Jesus nia matabeen tun. Jesus triste tebes kuandu haree ema barak nia laran-susar tanba ema neʼebé sira hadomi mate. Nia rona Jesus haruka ema atu duir fatuk neʼebé taka rate, iha neʼebé sira hakoi nia alin-mane.—Joao 11:28-39.

Marta neʼebé sempre hanoin ba buat hotu, nia fó sai katak mate-isin iis ona tanba hakoi tiha ba loron haat. Jesus fó-hanoin ba nia: “Haʼu la dehan ba ó katak ó fiar karik, ó sei haree Maromak nia glória?” Marta fiar duni, no ho nia matan rasik nia haree Maromak Jeová nia glória. Iha tempu neʼebá kedas Maromak fó kbiit ba nia Oan atu halo Lázaro moris hiʼas fali! Hanoin toʼok, iha Marta nia moris tomak nia sei nunka haluha buat neʼebé akontese tuirmai neʼe: Jesus koʼalia hodi bolu, “Lázaro, sai mai liʼur!”; depois Marta rona barullu ida husi fatuk-kuak nuʼudar Lázaro hamriik, ho ninia isin neʼebé falun hela, neineik-neineik nia hakat sai mai liʼur; depois Jesus haruka ema atu “kore tiha” hena neʼebé falun Lázaro hodi “husik nia laʼo bá”; no klaru katak ho laran-kontente tebes Marta no Maria halai hasoru Lázaro no hakoʼak nia. (Joao 11:40-44) Sin, Marta la sente laran-todan tan ona!

 Istória kona-ba moris-hiʼas husi mate laʼós istória neʼebé ema inventa deʼit; neʼe mak buat furak neʼebé Bíblia hanorin no ema barak bele fó sasin kona-ba ida-neʼe. Maromak Jeová no ninia Oan hakarak duni fó bensaun ba fiar-naʼin sira, hanesan sira halo ba Marta, Maria, no Lázaro. Sira mós sei fó bensaun hanesan neʼe ba Ita se Ita mós haburas fiar-metin hanesan Marta. *

Marta kontinua “serbí”

Bíblia temi Marta nia naran dala ida tan. Neʼe mak iha semana ikus ba Jesus nia moris iha rai. Jesus hatene katak lakleur tan nia sei hasoru susar sira, no dala ida tan nia deside atu hela iha Betânia hamutuk ho ninia belun sira. Husi neʼebá nia sei laʼo ba kilómetru 3 atu toʼo Jerusalém. Jesus no Lázaro han daudauk iha Simão neʼebé uluk moras-lepra, ninia uma. Iha neʼe mak Bíblia temi ba dala ikus kona-ba Marta katak nia “serbí” sira.—Joao 12:2.

Loos, feto neʼe sempre badinas! Kuandu ita foin lee ba dala primeiru kona-ba Marta, nia serbí daudauk ema; no kuandu Bíblia temi ba dala ikus ninia naran, nia serbí nafatin hodi tau matan ba ema sira-nia presiza. Ohin loron, kongregasaun kristaun sira haksolok hodi haree iha feto sira hanesan Marta, neʼebé hatudu aten-brani no laran-luak, no hatudu sira-nia fiar hodi serbí sira-nia maluk. Karik Marta kontinua atu halo hahalok diʼak hanesan neʼe. No ida-neʼe importante tebes tanba lakleur tan nia sei hasoru susar seluk tan.

Iha loron balu tan, Marta haree nia Naʼi Jesus neʼebé nia hadomi, hetan terus no mate. Liután neʼe, ema aat neʼebé buka atu oho Jesus buka mós atu oho Lázaro, tanba ho ninia moris-hiʼas halo ema barak tau fiar ba Jesus. (Joao 12:9-11) Ita mós hatene katak ikusmai mate haketak Marta husi ninia alin sira. Ita la hatene loloos horibainhira no oinsá mak Marta mate, maibé ita bele fiar buat tuirmai neʼe: Marta nia fiar neʼebé metin ajuda nia atu tahan toʼo rohan. Tan neʼe, diʼak ba ema kristaun ohin loron atu banati-tuir Marta nia fiar.

[Nota–rodapé]

[Dezeñu iha pájina 11]

Maski sente laran-triste, Marta husik Jesus atu ajuda nia hanoin nafatin ba buat neʼebé hametin ninia fiar

[Dezeñu iha pájina 12]

Maski Marta “hanoin resin kona-ba buat barak”, maibé nia haraik an hodi simu konsellu

[Dezeñu iha pájina 15]

Tanba fiar ba Jesus, Marta hetan bensaun hodi haree Lázaro moris hiʼas fali