Subara an Ira Pagtoo

“Ako Tinoo”

NAHAHANDURAW pa ni Marta an lubnganan han iya hinigugma nga bugto nga hi Lasaro, an lungib nga ginsadhan hin bato. An iya kasakit sugad kabug-at hito nga bato. Diri hiya makatoo nga upat ka adlaw na nga patay an iya bugto, ngan ito nga mga adlaw baga hin maiha na hinduro nga panahon hin kasakit ngan pagtaguminatay.

Hito nga takna, aada ha atubangan ni Marta an pinakaimportante nga tawo para kan Lasaro. Pakakita kan Jesus, inabat na liwat niya an duro nga kasakit kay ini la nga tawo an makakabulig unta ha iya bugto. Bisan pa hito, naliaw pa gihapon hiya ha presensya ni Jesus ha gawas han gutiay nga bungto han Betania. Diri pa la maiha nga magkaupod hira ni Jesus, kondi nadasig na liwat hiya han gugma nga iya nakita ha mga mata hito. Nagbangon hi Jesus hin mga pakiana nga nakabulig ha iya nga magpokus ha iya pagtoo ngan ha iya ginlalaoman nga pagkabanhaw. Dida hito nga pag-istorya, nayakan ni Marta an pinakaimportante nga mga pulong nga gumawas ha iya baba: “Ako tinoo nga ikaw amo hi Kristo nga Anak han Dios, nga nakanhi ha kalibotan.”—Juan 11:27.

Daku gud an pagtoo ni Marta. Bisan kon gutiay la an rekord han Biblia mahitungod ha iya, may-ada ito importante nga leksyon nga magpaparig-on han aton pagtoo. Aton paghisgotan an siyahan nga rekord han Biblia mahitungod kan Marta.

“Nasasakit Ka, Ngan Nalilisang”

Pipira ka bulan antes hito, buhi pa ngan mahimsog hi Lasaro. Mabisita ha iya balay ha Betania an pinakaimportante nga bisita, hi Jesu-Kristo. Naiiba an pamilya nira Lasaro, Marta, ngan Maria tungod kay bisan kon adulto na hira, ha usa nga balay la gihapon hira urosa nga naukoy. May mga researcher nga nasiring nga posible nga hi Marta an suhag tungod kay hiya an nag-aasikaso han ira panimalay ngan ha pipira nga higayon, hiya an siyahan nga ginngangaranan. (Juan 11:5) Pero diri kita maaram kon may nag-asawa ha ira. Anoman an ira kahimtang, duok hira nga kasangkayan ni Jesus. Ngani, durante  han ministeryo ni Jesus ha Judea, diin inatubang hiya hin duro nga pagkontra, ha ira balay hiya nahuron. Sigurado nga gin-apresyar gud niya an ira suporta ngan an kamurayawan han ira panimalay.

Maabiabihon hi Marta ngan iginhahatag niya an gimaopayi basi magin komportable an mga bisita. Sagipo hiya, maduruto, ngan baga hin diri nauubosan hin buruhaton, sugad la han binisita hi Jesus ha ira. Nagplano dayon hiya hin damu nga espesyal nga pagkaon para ha iya bisita ngan bangin para ha mga kaupod hito. Importante hadto an pagin maabiabihon. Kon may naabot nga bisita, ginhaharokan ito, ginhuhukasan hin sandalyas, ginhihimsawan, ngan ginhihisoan hin mahamot nga lana an ulo. (Lukas 7:44-47) Gin-aasikaso liwat hin maopay an urukyan ngan pagkaon hito.

Damu an sadang buhaton nira Marta ngan Maria. Hi Maria, nga usahay gintatagad nga amo an mas mahunahunaon, sigurado nga binulig anay ha iya bugto. Kondi han inabot hi Jesus, liningkod na ha may tiilan hito ngan namati. Para kan Jesus, panahon adto ha pagtutdo, ngan nagtutdo gud hiya! Diri pariho ha mga lider han relihiyon hadto, gintahod ni Jesus an kababayin-an ngan gintutdoan mahitungod han Ginhadian han Dios, an tema han iya ministeryo. Ngan nalipay gud hi Maria nga mamati ha iya.

Nahahanduraw mo ba an tensyon nga gin-abat ni Marta? Tungod han damu nga pagkaon nga kinahanglan niya lutoon ngan han iba pa nga kinahanglan niya buhaton para ha iya mga bisita, natarantar gud hiya. Namula ba hiya, nanhayhay, ngan nagmurusdot tungod han kasina nga nagliliningkod la an iya bugto ngan diri nabulig ha iya samtang sagipo nga naglalabaylabay hiya? Diri man urusahon kon ginbuhat niya ito tungod kay diri niya maaakos an ngatanan!

Ha urhi, waray na makakontrol hi Marta salit siniring hiya kan Jesus: “Ginoo, waray ka ba kabaraka nga an akon bugto ginpabay-an ako nga usa la, nga nagmamangno? Busa, pagyakni hiya nga buligan ako.” (Lukas 10:40) Mabug-at ito nga mga pulong, ngan ginhubad ito han pipira hini nga paagi: “Ginoo, diri ka ba napaid nga . . . ?” Katapos, ginhangyo niya hi Jesus nga sidngan hi Maria nga buligan hiya.

 Posible nga nahipausa hi Marta ha baton ni Jesus, sugad la nga nahipausa an damu nga magbarasa han Biblia. Makonsiderasyon nga siniring hi Jesus: ‘Marta, Marta, nasasakit ka, ngan nalilisang tungod han kadam-an nga bagay. Kondi usa [la] an kinahanglan; hi Maria nakagpili hin maopay nga bahin, nga diri makukuha tikang ha iya.’ (Lukas 10:41, 42) Ano an karuyag sidngon ni Jesus? Iginpapasabot ba niya nga materyalistiko hi Marta? Diri ba niya naaapresyar an pagpangandam ni Marta han ira pagkaon?

Diri man sugad. Matin-aw nga nakita ni Jesus an gugma ngan maopay nga motibo ni Marta. Dugang pa, diri man niya gintatagad nga sayop an engrande nga pagpakita hin pag-abiabi. Kinaburut-on nga tinambong hiya ha “daku nga panagtawo” nga gin-andam ni Mateo para ha iya. (Lukas 5:29) An pagpangandam ni Marta diri amo an isyu, kondi an iya prayoridad. Nakapokus hiya ha pagpangandam hin damu nga pagkaon salit waray na niya matagad kon ano an pinakaimportante. Ano ito?

Hi Jesus, an bugtong nga Anak ni Jehova nga Dios, aada ha ira balay basi magtutdo han kamatuoran. Waray na mas importante pa hito, bisan an mga pagpangandam ni Marta ngan an magrasa nga pagkaon. Sigurado, nasubo hi Jesus nga diri natatagad ni Marta inin talagsahon nga higayon nga mapahilarom an iya pagtoo, pero ginpabay-an la hiya ni Jesus ha pagdesisyon kon ano an iya bubuhaton. Pero waray hi Marta katungod ha pagdesisyon para kan Maria.

Salit makonsiderasyon nga ginsaway ni Jesus hi Marta. Mahigugmaon nga gin-uroutro ni Jesus an ngaran ni Marta basi mapakalma hiya, ngan ginpasarig nga diri hiya kinahanglan ‘masakit ngan malisang tungod han kadam-an nga bagay.’ Igo na bisan an usa o duha la nga putahe, labi na kon may espirituwal nga mga butang nga mapapahimulosan. Salit diri gud ni Jesus kukuhaon kan Maria an “maopay nga bahin” nga ginpili hito—an paghibaro tikang ha iya!

Damu nga leksyon tikang hito nga panhitabo an mahibabaroan han mga sumurunod ni Kristo yana. Diri naton sadang tugotan an bisan ano nga makaulang ha aton pagkuha hin “espirituwal nga mga butang.” (Mateo 5:3, NW) Bisan kon karuyag naton masubad an pagin mahinatagon ngan pagin maduruto ni Marta, diri naton karuyag nga magin sobra nga ‘nasasakit ngan nalilisang’ ha diri importante nga mga aspekto han pagkamaabiabihon nga tungod hito napapabay-an na an pinakaimportante. Nakikig-upod kita ha mga igkasi-tumuroo diri basi mag-andam o kumaon hin magrasa nga pagkaon, kondi basi magdinasigay ngan magbinalyoay hin espirituwal nga mga butang. (Roma 1:11, 12) Ha sugad nga mga okasyon, igo na bisan an pinakasimple nga pagkaon.

Hinigugma nga Bugto nga Namatay Ngan Ginbanhaw

Ginkarawat ba ni Marta an makonsiderasyon nga pagsaway ni Jesus ngan nahibaro tikang hito? Sigurado. Han unabihon ni apostol Juan an makalilipay nga sumat mahitungod kan Lasaro, hiya nagpahinumdom ha aton: “Yana hi Jesus naghigugma kan Marta, ngan han iya bugto nga babaye, ngan kan Lasaro.” (Juan 11:5) Mga bulan na an naglabay tikang han gin-unabi nga pagbisita ni Jesus ha Betania. Matin-aw, waray hi Marta magdinulo o magdinumot kan Jesus bisan kon ginsaway hiya; lugod, ginkarawat niya ito. Hini nga bahin, nagpakita liwat hiya hin maopay nga susbaranan ha pagtoo tungod kay usahay, kita ngatanan kinahanglan sawayon.

Han nagkasakit hi Lasaro, nagin sagipo hi Marta ha pag-ataman hito. Ginbuhat niya an ngatanan basi maibanan an kasakit hito ngan maopay. Bisan pa hito, nagtikagrabe la an sakit ni Lasaro. Ha ngatanan nga panahon, waray gud hiya bayai han iya kabugtoan, lugod gin-ataman hiya. Mationan-o daw la kaagsob nga ginkinita ni Marta an makalolooy nga nawong han iya bugto, samtang nahihinumdoman an damu ka tuig han makalilipay ngan makasurubo nga ira pag-upod?

Kondi, han baga hin diri na maoopay hi Lasaro, nagpadara hira Marta ngan Maria hin mensahe kan Jesus nga hito nga panahon nagsasangyaw ha lugar nga madadangat hin duha ka  adlaw nga pagbaktas. Simple la an ira mensahe: “Ginoo, kitaa, an imo hinigugma masakit.” (Juan 11:1, 3) Maaram hira nga hinigugma ni Jesus an ira bugto, ngan natoo hira nga bubuhaton niya an ngatanan ha pagbulig hito. Naglaom ba hira nga maabot hi Jesus antes pa magin urhi an ngatanan? Kon amo, nahanaw an ira paglaom. Namatay hi Lasaro.

Nagtaguminatay hira Marta ngan Maria. Ira gin-asikaso an pagpangandam para ha lubong ngan an damu nga bisita tikang ha Betania ngan ha mga lugar nga kahirani. Kondi, waray pa sumat mahitungod kan Jesus. Sigurado nga samtang nalabay an mga adlaw, nababaraka na gud hi Marta. Paglabay hin upat ka adlaw, hinbaroan niya nga tiabot na hi Jesus. Bisan pa kon nagtataguminatay, gumawas la gihapon hiya ngan gintapo hi Jesus nga waray magsumat kan Maria.—Juan 11:20.

Han nakita ni Marta an iya Agaron, iya ginyakan an mga pulong nga pipira ka adlaw na nga nakakagupong ha ira ni Maria: “Ginoo, kon nakanhi ka unta, waray kamamatay an akon bugto.” Bisan pa hito, buhi pa gihapon an paglaom ngan pagtoo ni Marta. Hiya nagdugang: “Ngan bisan yana ako maaram, nga bisan ano an imo pangaroon ha Dios, an Dios mahatag ha imo.” Katapos, ginyakan dayon ni Jesus an mga pulong nga magpaparig-on han iya paglaom: “An imo bugto mababanhaw.”—Juan 11:21-23.

Kahuna ni Marta nga an tidaraon nga pagkabanhaw an ginhihisgotan ni Jesus, salit hiya binaton: “Ako maaram, nga hiya mababanhaw ha pagkabanhaw ha kataposan nga adlaw.” (Juan 11:24) Daku gud an iya pagtoo hito nga katutdoan. May Judio nga mga lider han relihiyon hadto, nga tinatawag nga Saduseo, an diri natoo ha pagkabanhaw bisan kon matin-aw nga igintututdo ito han Kasuratan. (Daniel 12:13; Markos 12:18) Kondi, maaram hi Marta nga igintutdo ni Jesus an paglaom nga pagkabanhaw ngan nagbanhaw pa ngani hiya. Pero diri pariho han iya mga ginbanhaw, upat na ka adlaw nga patay hi Lasaro. Diri maaram hi Marta kon ano an mahitatabo.

Katapos, iginyakan ni Jesus inin diri mangangalimtan nga mga pulong: “Ako amo an pagkabanhaw, ngan an kinabuhi.” Oo, gintagan ni Jehova an iya Anak hin awtoridad nga magbanhaw han mga patay ha bug-os nga tuna ha tidaraon. Ginpakianhan ni Jesus hi Marta: “Natoo ka ba hini?” Katapos, binaton hi Marta han mga pulong nga mababasa ha tinikangan hini nga artikulo. Natoo hi Marta nga hi Jesus an Kristo, o Mesias, nga hiya an Anak han Dios nga hi Jehova, ngan hiya an igintagna han mga propeta nga maabot ha kalibotan.—Juan 5:28, 29; 11:25-27.

Ginpapabilhan ba ni Jehova nga Dios ngan han iya Anak nga hi Jesu-Kristo an sugad nga pagtoo? Ginbabaton ito han sunod nga mga panhitabo nga nakita ni Marta. Nagdagmit hiya pagkadto kan Maria. Katapos, nakita niya nga nasusubo gud hi Jesus samtang nakikiistorya kan Maria ngan ha damu nga nagtataguminatay nga kaupod ni Maria. Nakita niya an mga luha ni Jesus tungod han duro nga kasubo ha kamatay ni Lasaro. Hinbatian niya an sugo ni Jesus nga kuhaon an bato ha ganghaan han lubnganan han iya bugto.—Juan 11:28-39.

Pero, nag-insister hi Marta nga naninimaho na an patay nga lawas ni Lasaro tungod kay upat na ka adlaw nga patay ito. Kondi, ginpahinumdoman hiya ni Jesus: “Waray ba ako sisiring ha imo, nga kon ikaw tumoo, makakita ka gud han himaya han Dios?” Tinoo hiya, ngan nakita gud niya an himaya han Dios. Hito mismo nga takna, gintagan han Dios an Iya Anak hin gahum ha pagbanhaw kan Lasaro. Handurawa an panhitabo nga magpapabilin ha hunahuna ni Marta ha iya bug-os nga kinabuhi: An sugo ni Jesus nga, “Lasaro, kadi gowa”; an haros diri mabatian nga aringasa tikang ha lungib diin ginlubong hi Lasaro samtang nabuhat ito ngan hinay-hinay nga nagawas nga nakaputos pa; an sugo ni Jesus nga “hubari hiya, ngan palakta hiya”; ngan syempre, an ira sobra nga kalipay ni Maria samtang nahangkop hira ha ira bugto. (Juan 11:40-44) Nawara an sobra nga kasubo ha kasingkasing ni Marta!

Iginpapakita hini nga asoy nga an pagkabanhaw diri inop la. Usa ito nga katutdoan han Biblia ngan tinuod nga panhitabo. Ginbabalosan ni  Jehova ngan han Iya Anak an mga tawo nga may pagtoo, pariho kanda Marta, Maria, ngan Lasaro. Makakarawat mo liwat an sugad nga balos kon magkakaada ka marig-on nga pagtoo pariho han kan Marta. *

“Hi Marta Nagmamangno”

Ha ultimo nga higayon, gin-unabi han asoy han Biblia hi Marta. Gin-unabi hiya ha tinikangan han ultimo nga semana han kinabuhi ni Jesus ha tuna. Maaram hi Jesus han kakurian nga iya maieksperyensyahan, ngan iya ginpili utro an pag-ukoy ha balay nira Marta ha Betania. Tikang didto, hiya magbabaktas hin tulo ka kilometro tipakadto ha Jerusalem. Samtang nakaon hira Jesus ngan Lasaro ha balay ni Simon nga sanlahon, gin-unabi hi Marta ha ultimo nga higayon: “Hi Marta nagmamangno.”—Juan 12:2.

Maduruto gud hi Marta! Ha siyahan nga higayon nga mababasa naton an mahitungod ha iya ha Biblia, nagtatrabaho hiya; ngan ha ultimo nga rekord, nagtatrabaho la gihapon hiya, ginbubuhat an bug-os nga mahihimo para ha iba. Daku nga bendisyon ha Kristiano nga mga kongregasyon yana an kababayin-an nga pariho kan Marta—bug-os an kasingkasing ngan mahinatagon, pirme iginpapakita an ira pagtoo pinaagi ha pagserbi ha iba. Posible nga padayon nga ginhimo ni Marta ito. Maaramon nga gumios hiya tungod kay may-ada pa hiya aatubangon nga kasakitan.

Pipira na la ka adlaw, aatubangon na han hinigugma nga Agaron ni Marta nga hi Jesus an masakit nga kamatayon salit kinahanglan niya magin marig-on. Labot pa, gin-iikaparatay liwat han mga nagpatay kan Jesus hi Lasaro tungod kay an pagkabanhaw hito nagpaparig-on han pagtoo han damu. (Juan 12:9-11) Ngan syempre, nautod an gugma nga nagbubugkos kan Marta ngan ha iya kabugtoan tungod han kamatayon. Diri kita maaram kon paonan-o o kon kakan-o ito nahitabo, pero makakasiguro kita nga an birilhon nga pagtoo ni Marta nakabulig ha iya nga makailob tubtob ha kataposan. Salit, maopay gud nga subaron han mga Kristiano yana an iya pagtoo.

[Footnote]

[Retrato ha pahina 11]

Bisan kon nagtataguminatay, nagpagiya hi Marta kan Jesus basi makapokus ha mga butang nga magpaparig-on han iya pagtoo

[Retrato ha pahina 12]

Bisan kon ‘nasasakit ngan nalilisang,’ mapainubsanon nga ginkarawat ni Marta an pagsaway

[Retrato ha pahina 15]

Ginbalosan an pagtoo ni Marta kan Jesus han nakita niya nga ginbanhaw an iya bugto