Makanood sa Tataramon nin Dios

Ano an Katuyohan nin Dios Para sa Daga?

An artikulong ini nagpapalataw nin mga bagay na tibaad ihinapot mo asin ipinapaheling kaini kun saen mo mababasa sa Biblia an simbag. Maoogma an mga Saksi ni Jehova na ipakipag-olay sa saimo an mga simbag na ini.

1. Ano an katuyohan nin Dios para sa daga?

An daga iyo an istaran nin tawo. Pagkatapos na lalangon an mga anghel tanganing mag-istar sa langit, linalang nin Dios an tawo tanganing ikaogma an daga. (Job 38:4, 7) Huli kaini, ibinugtak ni Jehova an enot na tawo sa nakakaogmang marhay na paraisong inaapod na Eden asin itinao sa saiya saka sa magigin mga aki nia an paglaom na mabuhay nin daing katapusan sa daga.—Genesis 2:15-17; basahon an Salmo 115:16.

An hardin nin Eden sarong sadit sanang parte kan daga. An enot na mag-agom, si Adan asin Eva, magkakaigwa nin mga aki. Mantang nagdadakula an pamilya nin tawo, an daga kukultibaron ninda asin gigibohon na paraiso. (Genesis 1:28) Nungkang lalaglagon an daga.—Basahon an Salmo 104:5.

2. Taano an daga ta bakong paraiso ngonyan?

Si Adan asin Eva suminuway sa Dios, kaya pinalayas sinda sa Eden. Nawara an Paraiso, asin mayo nin siisay man na tawo na nagin mapangganang ibalik iyan. An Biblia nagsasabi: “An daga mismo itinao na sa kamot kan maraot.”—Job 9:24; basahon an Genesis 3:23, 24.

Alagad dai liningawan ni Jehova an orihinal na katuyohan nia para sa katawohan, ni sia man magigin bakong mapanggana. (Isaias 45:18) Ibabalik nia an katawohan segun sa katuyohan nia para sa sainda.—Basahon an Salmo 37:11.

3. Paano nin Dios ibabalik an katoninongan sa daga?

Tanganing makamtan nin katawohan an katoninongan, dapat ngunang haleon nin Dios an maraot na mga tawo. Sa ralaban sa Armagedon, lalaglagon kan mga anghel nin Dios an gabos na nagtutumang sa Saiya. Si Satanas ibibilanggo sa laog nin 1,000 taon, alagad an mga tawong namomoot sa Dios makakaligtas tanganing ikaogma an bagong sistema nin mga bagay sa daga.—Basahon an Kapahayagan 16:14, 16; 20:1-3; 21:3, 4.

 4. Noarin matatapos an pagsakit?

Durante kan 1,000 taon, an daga pamamahalaan ni Jesus hale sa langit asin gigibohon giraray na paraiso. Kakanselaron man nia an mga kasalan kan mga namomoot sa Dios. Sa siring na paagi, hahaleon ni Jesus an helang, paggurang, asin kagadanan.—Basahon an Isaias 11:9; 25:8; 33:24; 35:1.

Noarin nin Dios hahaleon an karatan sa daga? Si Jesus nagtao nin “tanda” tanganing iparisa kun noarin madali nang mag-abot an katapusan. Huli sa presenteng mga kamugtakan sa kinaban, namemeligro an buhay nin tawo asin ipinapaheling kaiyan na kita nabubuhay na sa “pagtatapos kan sistema nin mga bagay.”—Basahon an Mateo 24:3, 7-14, 21, 22; 2 Timoteo 3:1-5.

5. Sairisay an mabubuhay sa maabot na Paraiso?

Pinagbotan ni Jesus an mga parasunod nia na gumibo nin mga disipulo asin itokdo sa sainda an mga dalan nin pagkamoot nin Dios. (Mateo 28:19, 20) Inaandam ni Jehova an minilyon na tawo sa bilog na kinaban para sa buhay sa bagong sistema nin mga bagay sa daga. (Sofonias 2:3) Sa mga Kingdom Hall of Jehovah’s Witnesses, nakakanood an mga tawo na magin mas marahay na agom na lalaki asin ama saka mas marahay na agom na babae asin ina. Magkaibanan na nanonodan kan mga aki asin mga magurang an dapit sa basehan kun taano ta dapat magtubod na magkakaigwa nin mas marahay na puturo.—Basahon an Miqueas 4:1-4.

Sa Kingdom Hall, makakamidbid mo an mga tawong namomoot sa Dios asin gustong makanood kun paano sia mapapaogma.—Basahon an Hebreo 10:24, 25.

Para sa dugang pang impormasyon, helingon an kapitulo 3 kan librong ini, Ano Man Nanggad an Itinotokdo kan Biblia? na ipinublikar kan Mga Saksi ni Jehova.