Me Sauma na iVolatabu

Na Cava na iNaki ni Kalou me Baleta na Vuravura?

Ena veivosakitaki ena ulutaga qo eso na taro o rairai dau lomatarotarotaka tu, o na raica tale ga na tikinivolatabu mo wilika kina na kena isau. Era marau na iVakadinadina i Jiova mera veivosakitaka kei kemuni na kena isau.

1. Na cava na inaki ni Kalou me baleta na vuravura?

E itikotiko ni kawatamata na vuravura. Ni buli ira oti na agilosi mera bula e lomalagi, a bulia na tamata na Kalou me marautaka na bula e vuravura. (Jope 38:​4, 7) A vakatikora gona o Jiova na imatai ni tamata ena dua na parataisi totoka e vakatokai o Iteni, qai solia vua kei ira na nona kawa na inuinui mera marautaka na bula e vuravura me tawamudu.​—Vakatekivu 2:​15-​17; wilika Same 115:16.

E dua ga na vanua lailai e kovuta na were o Iteni. A kena inaki me rau vakaluveni na imatai ni veiwatini o Atama kei Ivi. Ni tubu na kedra iwiliwili na kawatamata, a kena inaki mera teivaka na vuravura ra qai vakatetea na parataisi. (Vakatekivu 1:​28) Ena sega sara ni vakarusai na vuravura.​—Wilika Same 104:5.

2. Na cava sa sega ni parataisi kina na vuravura?

Erau talaidredre vua na Kalou o Atama kei Ivi, rau mani vakasavi mai Iteni. Sa sega ni parataisi kina na vuravura, e sega tale ga ni rawa ni vakalesuya mai e dua na tamata. E tukuna na iVolatabu: “Sa soli ko vuravura ki na ligadra nai valavala ca.”​—Jope 9:​24; wilika Vakatekivu 3:​23, 24.

Ia e se sega ni guilecava o Jiova na nona inaki taumada me baleta na kawatamata, ena vakayacora dina na nona inaki. (Aisea 45:18) Ena vakalesui keda ina bula a nakita taumada meda marautaka.​—Wilika Same 37:11.

3. Ena vakalesuya mai vakacava e vuravura na vakacegu na Kalou?

E vinakati me vakarusai ira e liu na tamata ca na Kalou me rawa nida bula vakacegu. O ira na agilosi ni Kalou era na vakarusai ira kece na meca ni Kalou ena ivalu na Amaketoni. Ena vesu me 1,000 na yabaki o Setani, ia o ira era lomana na Kalou era na bula ena dua na vuravura vou.​—Wilika Vakatakila 16:​14, 16; 20:​1-3; 21:​3, 4.

 4. Ena oti ninaica na rarawa?

Ena liutaki vuravura mai lomalagi o Jisu ena loma ni duanaudolu na yabaki qai vukica me parataisi. Ena bokoca tale ga na nodra ivalavala ca o ira era lomana na Kalou. Ni cakava qori, sa na oti tale ga na tauvimate, qase kei na mate.​—Wilika Aisea 11:9; 25:8; 33:24; 35:1.

Ena vakarusa ena gauna cava na veika ca e vuravura na Kalou? A tukuna o Jisu e dua na “ivakatakilakila” me dusia ni sa voleka na icavacava. E leqataki na noda bula ena ituvaki eda donuya tu qo, e vakaraitaka tale ga nida sa bula tu ena “ivakataotioti ni veika vakavuravura.”​—Wilika Maciu 24:​3, 7-​14, 21, 22; 2 Timoci 3:​1-5.

5. O cei ena bula ena Parataisi sa tu qo e matada?

A dusimaki ira na nona imuri o Jisu mera vakavulici ira na lewe ni veivanua mera tisaipeli, mera vakavulici tale ga mera vakatotomuria na loloma ni Kalou. (Maciu 28:​19, 20) O Jiova e sa vakarautaki ira tiko e milioni vakacaca e veiyasa i vuravura mera bula ena vuravura vou. (Sefanaia 2:3) E vakavulici ena nodra Kingdom Hall na iVakadinadina i Jiova na sala me tagane vakawati qai tama vinaka kina e dua, na sala tale ga me yalewa vakawati qai tina vinaka kina e dua. Era vulica vata na gone kei na itubutubu na veika mera yavutaka kina na nodra inuinui ni gauna se bera mai.​—Wilika Maika 4:​1-4.

O na sotavi ira ena Kingdom Hall o ira na lomana na Kalou ra qai via kila na sala mera vakamarautaki koya kina.​—Wilika Iperiu 10:​24, 25.

Me ikuri ni ivakamacala, raica na wase 3 ni ivola qo, Na Cava Sara Mada E KAYA NA IVOLATABU? tabaka na iVakadinadina i Jiova.