Magtuon sa Pulong sang Dios

Ano ang Katuyuan sang Dios sa Duta?

Makita sa sini nga artikulo ang mga pamangkot nga mahimo ginapaligban mo kag kon diin sa Biblia mabasa ang mga sabat. Nalipay gid ang mga Saksi ni Jehova nga buligan ka sa pagbinagbinag sini.

1. Ano ang katuyuan sang Dios sa duta?

Ang duta puluy-an sang tawo. Sang natuga na sang Dios ang mga anghel para magkabuhi sa langit, gintuga niya ang tawo para magkabuhi sa duta. (Job 38:4, 7) Gani, ginbutang ni Jehova nga Dios ang una nga tawo sa matahom nga paraiso nga gintawag Eden. May kahigayunan sia kag ang iya kaanakan nga mabuhi sing walay katapusan sa duta.—Genesis 2:15-17; basaha ang Salmo 115:16.

Gamay lang nga bahin sang duta ang hardin sang Eden. Magapanganak ang una nga mag-asawa, nga sanday Adan kag Eva. Samtang nagadamo ang mga tawo, himuon nila nga paraiso ang duta. (Genesis 1:28) Indi gid maguba ang duta.—Basaha ang Salmo 104:5.

2. Ngaa indi na paraiso ang duta subong?

Ginsupak nanday Adan kag Eva ang Dios, gani ginpagua sila sa Eden. Nadula ang paraiso, kag wala sing tawo nga nakapasag-uli sini. Ang Biblia nagsiling: “Ang duta ginhatag sa kamut sang mga malaut.”—Job 9:24; basaha ang Genesis 3:23, 24.

Pero wala malimtan ni Jehova ang iya orihinal nga katuyuan para sa mga tawo, kag wala sia nagakapaslawan. (Isaias 45:18) Himuon niya ang iya orihinal nga katuyuan para sa ila.—Basaha ang Salmo 37:11.

3. Paano ibalik sang Dios ang paghidait sa duta?

Para matabo ini, dulaon anay sang Dios ang mga malauton. Sa inaway sa Armagedon, laglagon sang mga anghel sang Dios ang tanan nga nagapamatok sa Dios. Bilangguon si Satanas sa sulod sang 1,000 ka tuig, pero ang mga nagahigugma sa Dios makaluwas kag magakabuhi sa bag-ong sistema sang kalibutan.—Basaha ang Bugna 16:14, 16; 20:1-3; 21:3, 4.

  4. San-o madula ang pag-antos?

Sa sulod sang 1,000 ka tuig, magahari si Jesus sa duta halin sa langit kag ibalik niya ang paraiso. Panason man niya ang mga sala sang mga nagahigugma sa Dios. Gani, wala na sing balatian, pagtigulang, kag kamatayon.—Basaha ang Isaias 11:9; 25:8; 33:24; 35:1.

San-o laglagon sang Dios ang malauton sa duta? Naghatag si Jesus sing mga “tanda” nga malapit na ang katapusan. Ang kahimtangan subong sang kalibutan nagahalit sa mga tawo kag nagapakita nga ara na kita sa “katapusan sang sistema sang mga butang.”—Basaha ang Mateo 24:3, 7-14, 21, 22; 2 Timoteo 3:1-5.

5. Sin-o ang maistar sa paraiso sa palaabuton?

Ginsugo ni Jesus ang iya mga sumulunod nga maghimo sing mga disipulo kag tudluan sila parte sa gugma sang Dios. (Mateo 28:19, 20) Ginahanda ni Jehova ang minilyon ka tawo sa bilog nga kalibutan para magkabuhi sa bag-o nga sistema sang kalibutan. (Sofonias 2:3) Sa Kingdom Hall sang mga Saksi ni Jehova, ang mga tawo nagatuon para mangin maayo nga mga bana, amay, asawa, kag mga iloy. Ginatun-an sang mga kabataan kag mga ginikanan ang basihan sang mas maayo nga palaabuton.—Basaha ang Miqueas 4:1-4.

Sa Kingdom Hall, makilala mo ang mga nagahigugma kag gusto magpahamuot sa Dios.—Basaha ang Hebreo 10:24, 25.

Para sa dugang nga impormasyon, basaha ang kapitulo 3 sini nga libro, Ano Gid ang Ginatudlo sang Biblia? nga ginhimo sang mga Saksi ni Jehova.