Ania ti Panggep ti Dios Para iti Daga?
Agsursuroka iti Sao ti Dios
Ania ti Panggep ti Dios Para iti Daga?
Idatag daytoy nga artikulo dagiti saludsod a nalabit nayimtuodmon. Ipakitana met ti pakabasaam kadagiti sungbat iti Bibliam. Maragsakan dagiti Saksi ni Jehova a mangilawlawag kadagiti sungbat.
1. Ania ti panggep ti Dios para iti daga?
Ti daga ti pagtaengan ti tao. Kalpasan a pinarsua ti Dios dagiti anghel tapno agbiag idiay langit, inaramidna ti tao tapno agbiag ditoy daga. (Job 38:4, 7) Gapuna, insaad ni Jehova ti umuna a tao iti nagpintas a paraiso a naawagan Eden. Impaayanna met ti tao ken ti tumaudto a kaputotanna iti gundaway a mangtagiragsak iti awan inggana a biag ditoy daga.—Genesis 2:15-17; basaem ti Salmo 115:16.
Ti hardin ti Eden ket bassit laeng a lugar ditoy daga. Maaddaan iti annak ti umuna a natauan a pagassawaan, da Adan ken Eva. Bayat a dumakkel ti natauan a pamilia, talonen ken pagbalinenda a paraiso ti daga. (Genesis 1:28) Saanto a pulos madadael ti daga.—Basaem ti Salmo 104:5.
2. Apay a saan a paraiso ti daga ita?
Gapu ta nagsukir da Adan ken Eva, pinaruar ida ti Dios iti Eden. Napukawda ti paraiso, ket awan ti tao a makaisubli iti dayta. Kunaen ti Biblia: “Ti met laeng daga nayawat iti ima daydiay nadangkes.”—Job 9:24; basaem ti Genesis 3:23, 24.
Ngem saan a nalipatan ni Jehova ti orihinal a panggepna para iti sangatauan, ken saanto a mapaay ti Dios. (Isaias 45:18) Isublinanto ti sangatauan iti nairanta a pagtaenganna.—Basaem ti Salmo 37:11.
3. Kasano nga isublinto ti Dios ti talna ditoy daga?
Tapno maadda ti talna iti sangatauan, masapul nga umuna nga ikkaten ti Dios dagiti nadangkes a tattao. Inton gubat ti Armagedon, dadaelen dagiti anghel ti amin a bumusbusor iti Dios. Maipupokto met ni Satanas iti 1,000 a tawen ket dagiti makalasat a tattao a mangay-ayat iti Dios agbiagdanto iti baro a sistema ti bambanag ditoy daga.—Basaem ti Apocalipsis 16:14, 16; 20:1-3; 21:3, 4.
4. Kaano nga agpatingga ti panagsagaba?
Bayat ti 1,000 a tawen, manipud langit iturayanto ni Jesus ti daga ken pagbalinenna manen a paraiso. Ikkatenna met dagiti basol dagidiay mangay-ayat iti Dios. Pukawento ni Jesus ti sakit, panaglakay, ken ipapatay.—Basaem ti Isaias 11:9; 25:8; 33:24; 35:1.
Kaanonto a dadaelen ti Dios ti kinadakes ditoy daga? Nangted ni Jesus iti “pagilasinan” a mangipasimudaag nga asidegen ti panungpalan. Agpegpeggad ti biag ti tao gapu iti kasasaad ti lubong ita ken ipakita daytoy nga agbibiagtayon iti “panungpalan ti sistema ti bambanag.”—Basaem ti Mateo 24:3, 7-14, 21, 22; 2 Timoteo 3:1-5.
5. Siasino dagiti agbiagto iti Paraiso?
Imbilin ni Jesus kadagiti pasurotna a mangaramidda kadagiti adalan ken isuroda kadakuada ti pagayatan ti Dios. (Mateo 28:19, 20) Iti intero a lubong, isagsagana ni Jehova ti minilion a tattao nga agbiag iti baro a sistema ti bambanag ditoy daga. (Sofonias 2:3) Kadagiti Kingdom Hall dagiti Saksi ni Jehova, masursuro dagiti tattao ti agbalin a nasaysayaat nga assawa ken nagannak. Agpadpada nga ad-adalen sadiay dagiti nagannak ken annak no apay a patienda nga adda nasaysayaat a masakbayan.—Basaem ti Mikias 4:1-4.
Maam-ammom idiay Kingdom Hall dagiti tattao a mangay-ayat iti Dios ken mayat a mangay-ayo kenkuana.—Basaem ti Hebreo 10:24, 25.
Para iti kanayonan nga impormasion, kitaem ti kapitulo 3 daytoy a libro, Ania a Talaga ti Isursuro ti Biblia? nga impablaak dagiti Saksi ni Jehova.