Lirongera ko kononkango daKarunga

Yisinke sitambo saKarunga kevhu?

Sirongwa esi kwa tumbura mapuro gamwe aga nampo wa lipura nokukakulikida asi kupi oku no vhura kuresa moBibeli zoge o gwane malimbururo. Nombangi daJehova nava ka yi hafera pokukazogera kumwe nove malimbururo ogo.

1. Yisinke sitambo saKarunga kevhu?

Evhu embo lyovantu. Konyima zokusita vaengeli va tunge meguru, Karunga kwa ungire vantu va hafere evhu. (Joba 38:4, 7) Jehova kwa tulire muntu gokuhova moparadisa zongwa ava tumbura asi Edeni nokumupa ehuguvaro lyokuhafera eparu lyanarunye pevhu kumwe noruvharo rwendi rokomeho.—Genesis 2:15-17; resa Episarome 115:16.

Sikunino saEdeni kwa kere tupu karuha kokanunu kevhu. Oku ngano va retere vana vawo valikwali wokuhova, Adamu naEva. Ngomu epata lyovantu lya ya ligwedererere, awo ngano va pakerere mbili evhu nalinye nokulininka paradisa. Evhu kapi ngava li zonagura po.—Resa Episarome 104:5.

2. Morwasinke evhu lina dilire kukara ngesi paradisa?

Adamu naEva kapi va limburukwire Karunga, yiyo va va tjidire mo moEdeni. Paradisa za zumbanene, ano kwato muntu gokuvhura kuzitengwidira po. Bibeli kutanta asi: “Karunga kwa gava uzuni kovadinikarunga.”—Joba 9:24; resa Genesis 3:23, 24.

Nye Jehova Karunga kapi ga divara sitambo sendi kovantu, ntani kapi ngayi mu sumpira mokusisikisa mo. (Jesaya 45:18) Age nga ka tengwidira po sitambo sendi kovantu monkedi omu ga yi harererere.—Resa Episarome 37:11.

3. Ngapi nga ka tengwidira po Karunga mbili pevhu?

Mokuninka asi vantu va ka hafere mbili, pomuhowo Karunga ga hepa kukagusa po vadinikarunga. Poyita yaHarumagedoni, vaengeli vaKarunga ngava ka zonagura po navenye ava ava rwanesa Karunga. Satana ngava ka mu manga nomuvho eyovi limwe, nye vantu ava va hara Karunga ngava ka paruka nokukahafera mouzuni woupe pevhu.—Resa Ehororo 16:14, 16; 20:1-3; 21:3, 4.

 4. Siruwoke ngaru ka haga po ruhepo?

Mosiruwo sonomumvho eyovi, Jesus nga ka pangera evhu kutundilira meguru nokukalininka li ka kare paradisa. Ntani hena, age nga dongonona po nonzo dava va hara Karunga. Jesus nga ka gusa po mauvera noukurupe nonomfa.—Resa Jesaya 11:9; 25:8; 33:24; 35:1.

Siruwoke nga ka hagekesa po Karunga udona pevhu? Jesus kwa geve “sidiviso” souhura wouzuni ou. Nkareso zouzuni ou kuna kutjilisa vantu ntani kulikida asi ose kuna kuparuka mosiruwo “souhura wouzuni.”—Resa Mateusa 24:3, 7-14, 21, 22; 2 Timoteusa 3:1-5.

5. Wolye ngava ka paruka moParadisa ezi zina kuwiza?

Jesus kwa vyukisire vasikuli vendi va tulise po varongwa nokuvaronga nonzira daKarunga deharo. (Mateusa 28:19, 20) Mouzuni mudima, Jehova kuna kuwapaikira mamiliyona govantu va ka gwane eparu mouzuni woupe pevhu. (Sefaniya 2:3) KoYinyanga yoUhompa yoNombangi daJehova, vantu kulironga ko omu nava kara vanturagumbo novaguhya novagolikadi novazinya wovawa. Vanona novakurona kulironga kumwe kuhamena meho zongwa.—Resa Mika 4:1-4.

KoSinyanga soUhompa, ove ngo ka gwanekera novantu ava va hara Karunga nokuhara kulironga mokumuhafesa.—Resa Vahebeli 10:24, 25.

Komauzera gomanzi, tara egaununo 3 mobuke ezi Yinke azi rongo Bibeli sili?, va nduruka Nombangi daJehova.