Pathian Thu Atangin Inzir Rawh

Leilung Atâna Pathian Thiltum Chu Eng Nge Ni?

He thuziak hian i lo ngaihtuah mai theih zawhnate zâwtin, i Bible-a a chhânna i hmuh theihna laite a târ lang a. Jehova Thuhretute chuan chûng chhânnate sawipui che chu an châk hle a ni.

1. Leilung atâna Pathian thiltum chu eng nge ni?

Leilung hi mihringte chênna in a ni a. Pathian chuan vâna awm tûra vântirhkohte a siam hnuah, leia chêng tûrin mihringte a siam leh a. (Joba 38:4, 7) Jehova chuan mihring hmasa ber chu Eden huan mawi taka dahin, a thlahte nên leia chatuana nun chen theihna chanvo a pe a ni.—Genesis 2:15-17; Sâm 115:16 chhiar rawh.

Eden huan chuan hmun a luah zau lo hle a. Chuta awm nupa tuak hmasa ber Adama leh Evi chuan fate an nei ang a; an chhûngkua an lo pun zêl chuan Eden huan chu zauh zêlin, lei pum pui hi paradis-ah an chantîr dâwn a ni. (Genesis 1:28) Lei hi tihchhiat ngai tûr a ni lo.—Sâm 104:5 chhiar rawh.

2. Engvângin nge lei hi tûnah paradis a nih loh?

Adama leh Evi chuan Pathian thu an âwih loh avângin Eden huan ata hnawh chhuah an ni a. Paradis chu hloh a ni ta a, mi tumahin an tung ding leh thei tawh lo. Bible chuan: “Lei hi mi suaksual kutah pêk a ni,” tiin a sawi a ni.—Joba 9:24; Genesis 3:23, 24 chhiar rawh.

Mahse, Jehova chuan atîr tê aṭanga mihringte tâna a thil tum chu a theihnghilh lo va, a hlawhchham thei bawk hek lo. (Isaia 45:18) Atîra a tum ang ngeiin mihringte chu awmtîr leh ang.—Sâm 37:11 chhiar rawh.

3. Engtin nge Pathianin leiah remna a awmtîr leh ang?

Mihringte’n remna an chen theih nân Pathianin mi suaksualte a tihboral vek phawt a ngai a. Pathian vântirhkohte chuan Pathian dodâltu zawng zawngte chu Armageddon indonaah a tiboral vek ang. Setana chu kum 1,000 chhûng phuar a ni ang a, Pathian hmangaihtute erawh chu khawvêl thara nung tûrin an dam khawchhuak ang.—Thu Puan 16:14, 16; 20:1-3; 21:3, 4 chhiar rawh.

 4. Engtikah nge hrehawm tawrhna a tâwp ang?

Kum 1,000 chhûng chuan Isua’n vân aṭangin lei hi a awp ang a, paradis-ah a siam leh ang. Pathian hmangaihtute rochun sualna zawng zawng pawh a thai bo vang. Chutiang chuan Isua’n natna te, tarna te, leh thihna te chu a tibo vang.—Isaia 11:9; 25:8; 33:24; 35:1 chhiar rawh.

Engtikah nge Pathianin lei ata sualna a tihbo vang? Isua chuan tâwpna a hnai tih hriat theihna tûrin “chhinchhiahna” min pe a. Tûn lai khawvêl dinhmun hian mihringte chu dam zêl beisei awm lo kawp dinhmun hlauhawmah a awmtîr a, chu chuan “khawvêl tâwpna” huna kan awm tawhzia a târ lang a ni.—Matthaia 24:3, 7-14, 21, 22; 2 Timothea 3:1-5 chhiar rawh.

5. Paradis-ah chuan tu nge awm ang?

Isua chuan a hnungzuitute chu zirtîrte siam a, Pathian hmangaihna kawng zirtîr tûrin a hrilh a. (Matthaia 28:19, 20) Khawvêl pum puiah, Jehova chuan mi maktaduai têlte chu khawvêl thara nung tûrin a buatsaih a ni. (Zephania 2:3) Jehova Thuhretute Kingdom Hall-ah chuan mite’n nupui pasal ṭha zâwk nih dân leh nu leh pa ṭha zâwk nih dân an zir a. Naupangte chuan an nu leh pate rualin nakina hun ṭha zâwk lo thleng tûr an rin theih chhante chu an zir a ni.—Mika 4:1-4 chhiar rawh.

Kingdom Hall-ah chuan Pathian hmangaihtute leh amah tihlâwm dân zir duhtute chu i hmu ang.—Hebrai 10:24, 25 chhiar rawh. (w11-E 04/01)

Hriat tam lehzual nân Jehova Thuhretute tihchhuah BIBLE ZIRTIRNA Dik Tak Chu ENG NGE NI? he lehkhabu bung 3-na hi en ang che.