Ithute Lentšung la Modimo

Morero wa Modimo ka Lefase ke Ofe?

Sehlogo se se rotoša dipotšišo tšeo o ka bago o ile wa di botšiša le go go bontšha moo o ka balago dikarabo gona ka Beibeleng ya gago. Dihlatse tša Jehofa di tla thabela go ahlaahla dikarabo tše le wena.

1. Morero wa Modimo ka lefase ke ofe?

Lefase ke legae la motho. Ka morago ga go hlola barongwa gore ba phele legodimong, Modimo o ile a bopa motho gore a dule lefaseng. (Jobo 38:4, 7) Ka go re’alo, Jehofa o ile a bea motho wa pele paradeiseng e kgahlišago yeo e bitšwago Edene gomme a mo nea tebelelo ya go phela ka mo go sa felego lefaseng gotee le ditlogolwana tša gagwe tša ka moso.—Genesi 2:15-17; bala Psalme 115:16.

Serapa sa Edene se be se tšea karolwana e nyenyane ya lefase. Batho ba babedi ba pele, Adama le Efa, ba be ba swanetše go ba le bana. Ge palo ya lapa la batho e be e gola, ba be ba swanetše go lema lefase gomme ba le dire paradeise. (Genesi 1:28) Lefase ka bolona le ka se tsoge le fedišitšwe.—Bala Psalme 104:5.

2. Ke ka baka la’ng lefase e se paradeise gona bjale?

Adama le Efa ba ile ba se kwe Modimo, ka baka leo ba rakwa Edene. Paradeise e ile ya lahlega, gomme ga go motho yo a ilego a atlega go e tsošološa. Beibele e re: “Lefase lona le gafetšwe seatleng sa yo kgopo.”—Jobo 9:24; bala Genesi 3:23, 24.

Eupša Jehofa ga se a lebala morero wa gagwe wa mathomong ka batho, e bile Modimo a ka se tsoge a paletšwe. (Jesaya 45:18) O tla tsošološa moloko wa batho gore o be ka mokgwa woo a bego a o rerile mathomong.—Bala Psalme 37:11.

3. Modimo o tla tsošološa bjang khutšo lefaseng?

Gore batho ba be le khutšo, Modimo o swanetše go thoma ka go fediša batho ba kgopo. Ntweng ya Haramagedone, barongwa ba Modimo ba tla fediša bohle bao ba ganetšago Modimo. Sathane o tla golegwa nywaga e 1 000, eupša batho bao ba ratago Modimo ba tla phologa gomme ba thabela tshepedišo e mpsha ya dilo lefaseng.—Bala Kutollo 16:14, 16; 20:1-3; 21:3, 4.

  4. Tlaišego e tla fela neng?

Nakong ya nywaga e 1 000, Jesu o tla buša lefase a le legodimong gomme a le tsošološa gore e be paradeise. Le gona, o tla phumola dibe tša bao ba ratago Modimo. Ke moka Jesu o tla fediša bolwetši, botšofadi le lehu.—Bala Jesaya 11:9; 25:8; 33:24; 35:1.

Modimo o tla fediša bobe neng lefaseng? Jesu o ile a nea “pontšho” ya go bontšha ge bofelo bo le kgauswi. Maemo a gona bjale a lefase a bontšha gore batho ba kotsing le gore ga bjale re phela mehleng “ya bofelo bja tshepedišo ya dilo.”—Bala Mateo 24:3, 7-14, 21, 22; 2 Timotheo 3:1-5.

5. Ke bomang bao ba tlago go phela Paradeiseng ya nakong e tlago?

Jesu o laetše balatedi ba gagwe gore ba dire barutiwa le go ba ruta ditsela tša Modimo tša lerato. (Mateo 28:19, 20) Jehofa o lokišetša batho lefaseng ka bophara gore ba tle ba phele tshepedišong e mpsha ya dilo mo lefaseng. (Tsefanya 2:3) Batho Diholong tša Mmušo tša Dihlatse tša Jehofa ba ithuta kamoo ba ka bago banna ba bakaone le botate ba bakaone le kamoo ba ka bago basadi ba bakaone le bomma ba bakaone. Bana le batswadi ba ithuta gotee mabapi le motheo wa go dumela gore go tla ba le bokamoso bjo bokaone.—Bala Mika 4:1-4.

Holong ya Mmušo o tla kopana le batho bao ba ratago Modimo le bao ba nyakago go ithuta go mo kgahla.—Bala Baheberu 10:24, 25.

Bakeng sa tsebišo e oketšegilego, bona kgaolo 3 ya puku ye, Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.