Paibangat ed Salita na Dios

Antoy Gagala na Dios Parad Dalin?

Nabasa ed sayan artikulo iray maslak ya itetepet na totoo tan no iner ed Biblia so pakaromogay ebat. Maliket ya ipaliwawa ed sika na saray Tasi nen Jehova irayan ebat.

1. Antoy gagala na Dios parad dalin?

Say dalin so ayaman na too. Kayarin pinalsa na Dios iray anghel a manayam ed tawen, pinalsa to met so too pian manayam ed dalin. (Job 38:4, 7) Inyan nen Jehova so inmunan too ed marakdakep a paraiso a tatawagen ya Eden tan inter ed sikato tan saray magmaliw ya anak to so pankanawnawan manbilay ya anggapoy anggaan diad dalin.​—Genesis 2:15-17; basaen so Salmo 115:16.

Say hardin na Eden et wala labat ed melag a parte na dalin. Say inmunan sanasawan si Adan tan Eva et kaukolan a nawalaay ananak. Legan na idarakel da, kaukolan dan asikasoen so dalin tan pagmaliwen a paraiso. (Genesis 1:28) Tan agbalot naderal so dalin.​—Basaen so Salmo 104:5.

2. Akin et aliwan paraiso so dalin natan?

Ag-inunor di Adan tan Eva so Dios, kanian pinapaway ira ed Eden. Naandi so paraiso, tan anggapoy toon akapangipawil ed satan. Ibabaga na Biblia ya: “Say dalin niiter ed lima na marelmeng [odino mauges].”​—Job 9:24; basaen so Genesis 3:23, 24.

Balet ag-alingwanan nen Jehova so gagala to parad totoo, tan sikatoy agbalot ompalpak. (Isaias 45:18) Ipawil to imay ginetma ton orihinal ya kipapasen na too.​—Basaen so Salmo 37:11.

3. Panon ya ipawil na Dios so kareenan diad dalin?

Pian walay kareenan na totoo, kaukolan nin ekalen na Dios iray mauges. Diad guerra ya Armagedon, deralen na saray anghel na Dios so amin ya onkokontra ed Sikato. Ikulong si Satanas ed loob na 1,000 taon, balet saray totoon mangaaro ed Dios et niliktar tan panliketan day balon sistema diad dalin.​—Basaen so Apocalipsis 16:14, 16; 20:1-3; 21:3, 4.

  4. Kapigan manampot so paniirap?

Legan na 1,000 taon, manlapud tawen et uleyan nen Jesus so dalin tan pagmaliwen ton paraiso. Ontan met, perdonaen to so kasalanan na saray mangaaro ed Dios. Insan ekalen nen Jesus so sakit, itatatken, tan ipapatey.​—Basaen so Isaias 11:9; 25:8; 33:24; 35:1.

Kapigan ekalen na Dios so kaugsan ed dalin? Angiter si Jesus na “tanda” a pakanengnengan ya asingger lay anggaan. Saray nagagawa natan et mamepeligro ed bilay na too, tan mangipapanengneng a manbibilay tayo la ed “kasampotan na sistema na mundo.”​—Basaen so Mateo 24:3, 7-14, 21, 22; 2 Timoteo 3:1-5.

5. Sioparay manbilay diad nipawil a Paraiso?

Ingganggan nen Jesus iray papatumbok to ya ibangat ed totoo so maaron paraan na Dios tan gawaen iran disipulo. (Mateo 28:19, 20) Ipaparaan nen Jehova iray minilyon a totoo ed interon mundo a manbilay ed balon sistema na dalin. (Sofonias 2:3) Diad Kingdom Hall na saray Tasi nen Jehova, naaaralan na totoo no panoy pagmaliw a maong ya asawa, ama, tan ina. Saniban nanaaralan na ananak tan atateng no akin et napanisiaan so balibalin nagawa ed arapen.​—Basaen so Miqueas 4:1-4.

Diad Kingdom Hall, nakabat mo ray totoon mangaaro ed Dios tan manaaral no panon a sikatoy napaliket da.​—Basaen so Hebreos 10:24, 25.

Parad kaaruman ya impormasyon, nengnengen so kapitulo 3 na sayan libro Anto So Peteg Ya Ibabangat Na Biblia?, ya in-publish na saray Tasi nen Jehova.