E artíkulo akí ta trata algun pregunta ku kisas bo tin i e ta mustra bo unda pa haña e kontestanan den bo Beibel. Si bo ta deseá, Testigunan di Yehova gustosamente lo trata e preguntanan akí ku bo.

1. Kiko ta Dios su propósito pa e tera?

E tera ta hende su hogar. Despues ku Dios a krea angel pa biba den shelu, el a krea hende pa biba riba tera. (Jòb 38:​4, 7) Pues, Yehova a pone e promé hòmber den un bunita paradeis ku yama Edén i el a duna tantu e hòmber komo su futuro desendientenan e speransa di disfrutá pa semper di bida riba tera.​—Génesis 2:​15-17; lesa Salmo 115:16.

Un parti masha chikitu di e tera tabata un paradeis. E promé pareha, Adam ku Eva, ku tempu lo a haña yu. Segun ku e famia a krese, nan lo a kultivá e tera i hasié un paradeis. (Génesis 1:28) Nunka e tera lo a ser destruí.​—Lesa Salmo 104:5.

2. Dikon e tera no ta un paradeis aktualmente?

Debí ku Adam ku Eva a desobedesé Dios, el a saka nan for di Edén. Nan a pèrdè e Paradeis, i niun hende no a logra hañ’é bèk. Beibel ta bisa: “Tera ta keda entregá den man di e malbadonan.”​—Jòb 9:24; lesa Génesis 3:23 i 24.

Pero Yehova no a lubidá su propósito original pa humanidat, ni Dios no por faya nunka. (Isaias 45:18) Den futuro lo e sòru pa humanidat biba manera tabata su intenshon.​—Lesa Salmo 37:11.

3. Kon Dios lo bolbe trese pas riba tera?

Pa humanidat por tin pas, promé Dios mester kaba ku tur mal hende. Den e bataya di Armagedón, Dios su angelnan lo destruí tur hende ku ta oponé Dios. Satanas lo ser mará pa 1.000 aña, pero hende ku stima Dios lo sobrebibí pa disfrutá di Paradeis riba tera.​—Lesa Revelashon 16:​14 i 16; 20:​1-3; 21:3 i 4.

  4. Ki tempu sufrimentu lo kaba?

Durante e 1.000 aña, Hesus lo goberná e tera for di shelu i lo e hasi e tera un paradeis. Tambe, lo e kita piká di hende ku ta stima Dios. Pues Hesus lo eliminá malesa, behes i morto.​—Lesa Isaias 11:9; 25:8; 33:24; 35:1.

Ki tempu Dios lo kaba ku maldat riba tera? Hesus a duna un “señal” pa indiká ki ora e fin lo yega. E kondishonnan aktual di mundu ta menasá eksistensia di hende i ta mustra ku nos ta biba awor den e tempu di “fin.”​—Lesa Mateo 24:​3 i 7-14, 21 i 22; 2 Timoteo 3:1-5.

5. Ken lo bai biba den Paradeis?

Hesus a instruí su siguidónan pa hasi disipel i siña e disipelnan akí Dios su kamindanan di amor. (Mateo 28:​19, 20) Mundialmente, Yehova ta preparando miónes di hende pa biba den Paradeis riba tera. (Sofonias 2:3) Na Salòn di Reino di Testigunan di Yehova, hende ta siña kon pa ta un mihó kasá, tata i mama. Tantu yunan komo mayornan ta haña prueba konvinsente pa kere den un mihó futuro.​—Lesa Mikeas 4:​1-4.

Na Salòn di Reino, lo bo sera konosí ku hende ku stima Dios i ku ke siña agrad’é.​—Lesa Hebreonan 10:​24 i 25.

Pa mas informashon, wak kapítulo 3 di e buki akí, Kiko Beibel Ta Siña Realmente?, publiká pa Testigunan di Yehova.