Diospa Siminmanta yachachikuykuna

¿Imatan Dios munan kay Hallp’apaq?

Kaypin Bibliaykiwan tapukuyniykikunaman kutichiykunata tarinki. Munaqtiykiqa Jehová Diospa testigonkunan yanapasunkiman kay tapuykunata t’aqwinaykipaq.

1. ¿Imatan Dios munan Hallp’apaq?

Angelkunata kamasqan qhepamanmi Diosqa runakunata kamarqan Hallp’api tiyanankupaq (Job 38:4, 7). Jehová Diosqa ñawpaqkaq runatan Edén nisqa sumaq huertaman churarqan. Chhaynapin paykunapas mirayninkupas wiñaypaq kawsayta atinkuman karqan (Génesis 2:15-17; leey Salmo 115:16).

Edén huertaqa huch’uyllan karqan, Adan Evan wawakunayoq kaspa Hallp’antinman hunt’aykunanku karqan. Chhaynapin pisi-pisimanta hallp’antinta paraisoman tukuchipunanku karqan (Génesis 1:28). Biblian willawanchis kay Hallp’aqa wiñaypaq kananmanta. (Leey Salmo 104:5.)

2. ¿Imaraykun Hallp’a mana paraisochu?

Adanwan Evawanqa manan kasukurqankuchu Diosta, chaymi Edén huertamanta wikch’uchikamurqanku. Chayraykun paraisoqa chinkapurqan. Manataqmi pipas hukmanta chhayna huertata hina ruwayta atirqanchu. Chaymi Biblia nin: ‘Millay runakunan kay Hallp’ata munaychakunku’, nispa (Job 9:24; leey Génesis 3:23, 24).

Jehová Diosqa manan qonqarqanchu ñawpaqpi ruway munasqanta, hunt’anqapunin rimasqantaqa (Isaías 45:18). Diosqa ñawpaqpi imaynatas runakuna kawsananta munarqan chhaynatan kawsachinqa. (Leey Salmo 37:11.)

3. ¿Imatan Dios ruwanqa yapamanta thak kawsay kananpaq?

Thakpi kawsanapaqqa Diosmi millay runakunata chinkachinan. Chayqa Armagedón guerrapin sucedenqa. Diospa angelninkunan chinkachinqaku pay contra kaqkunata. Chay qhepamanmi Satanás waranqa wata wisq’asqa kanqa, Diosta munakuqkunan ichaqa mosoq pachapi tiyanqaku. (Leey Apocalipsis 16:14, 16; 20:1-3; 21:3, 4.)

 4. ¿Hayk’aqmi ñak’ariy tukunqa?

Waranqa watan Jesús kay pachata hanaq pachamanta kamachimunqa, chay tiempopitaq paraisoman tukuchinqa. Hinaspapas Dios sonqo runakunaq huchantan chinkachinqa, chhaynapin onqoy, machuyay wañuypas manaña kanqachu. (Leey Isaías 11:9; 25:8; 33:24; 35:1.)

¿Hayk’aqmi chayta ruwanqa? Tukukuy tiempo chayamushasqanta yachanapaqmi Jesús huk señalta willarqan. Kay tiempopi imaymanaq sucedesqanmi rikuchin runaq kawsaynin peligropi kasqanta ‘kay tiempo p’uchukapunanpaqña kashasqantapas’. (Leey Mateo 24:3, 7-14, 21, 22; 2 Timoteo 3:1-5.)

5. ¿Pikunan paraisopi tiyanqaku?

Jesusmi qatikuqninkunata kamachirqan Diospa nisqanta yachachinankupaq munakuq Diosman rikch’akunankupaqpas (Mateo 28:19, 20). Jehová Diosqa llapa nacionkunamantan millonninpi runakunata preparashan mosoq pachapi tiyanankupaq (Sofonías 2:3). Jehová Diospa testigonkunaq huñunakuyninman riqkunaqa yachamunkun allin qosa, allin esposa, allin tayta-mama kayta. Famimliantinmi yachamunku imaraykus confiankuman hamuq tiempopi aswan allin kawsay kananpi. (Leey Miqueas 4:1-4.)

Testigokunaq huñunakunanku wasipin Diosta munakuq paypa munayninman hina kawsaq runakunata reqsinki. (Leey Hebreos 10:24, 25.)

Astawan yachayta munanki chayqa ¿Imatapunin Biblia yachachin? nisqa librota qhaway 3 capitulota, chaytaqa Jehová Diospa testigonkunan ruwan.